Read Sangir PĚLAL᷊AHẸ 20 Bible Online

PĚLAL᷊AHẸ 20 - Sangir bible

PĚLAL᷊AHẸ 20

¹Bọu ene iạ nakasilo malaẹkatẹ̌ sěngkatau natěntung bọu sorga. Su l᷊imane kạl᷊ahěgo kakunsị tigal᷊ụ u papate ringangu hante masaria sěmbua.

² Mase i sie něnamẹ nagạ ene, kụ kai těmpu maghurang, — kụ nạung kai setang arau rohkẹ̌ dal᷊akị e — kụ nihantene ghěnangu sěhiwu su taunge karěngụ e.

³Bọu ene malạekatẹ̌ e něhipeng nagạ ene sol᷊ong dal᷊ungu tigal᷊ụ u kawawinasa, mase nisukunge tigal᷊ụ ene kụ nisegelange, tadeạu nagạ e sen tawe makapěngakal᷊ẹ̌ patikụ umatẹ̌ e těntal᷊ang tempo sěhiwu su taunge tanạpaghohẹ̌. Bọu ene i sie harusẹ̌ ipěllọ gěnnangu kadodọ tempo.

⁴ Mase iạ nakasilo manga kaderang kawawantugẹ̌, dingangu i sire apang kumakaiange sene, nionggotangu kawasa waugu měmpěnawong hukumang. Iạ e mal᷊aing nakasilo himukudʼu taumata apan seng bọu nipotọ těmbọ i sire puhinengu i sire mẹ̌sẹ̌sahiding Mawu Yesus, dingangu měmpěngẹ̌ngekeng hengetangu Ruata. I sire ene tawe měmpěnaněmba binatang, arau mangạewe tul᷊adane. I sire e mal᷊aing tawe němpạnarimạu tatialan binatang e su rěhụ arau su l᷊iman sire. Tangu i sire saụ němpẹ̌biahẹ̌ kapia kụ němpẹ̌parenta kere sěngkatau ratu ringangʼi Kristus karěngụeweng sěhiwu su taunge.

⁵Seng ini e kahumotongangu taumata nate e nipẹ̌bangung kapia. (Arawe taumata apang nate wal᷊ine ute tawe saụ niapẹ̌biahẹ̌ kapia karěngụeweng sěhiwu su taunge.)

⁶Kariangkamang su taumata kụ apang niapẹ̌biahẹ̌ kapia ringang su pẹ̌bawangung humotonge. Su tampạ e wue i sire makoạ tataghuanengu Ruata. Papate su karuan sul᷊ene e tawe makapẹ̌kapura si sire. I sire kai sarung měngkakoạ manga imangu Mawu Ruata ringangu manga imang i Kristus; kụ i sire sarung sěngkapẹ̌parenta ringange sěhiwu su taunge karěngụe.

⁷Ene tempo sěhiwu su taunge nal᷊iụ e, setang e sarung illěsọ bọu ral᷊ungu tahungkụ e,

⁸ kụ i sie sarung dumal᷊eng měmitaugẹ̌ kal᷊awọu umatẹ̌ kụ nasawuhẹ̌ su kaguwạu dunia e, kụ kai tau Gog dingangu Magog. Setang e něngomol᷊ʼi sire mědeạu mẹ̌sekẹ, kụ dekenange ute enẹewe mal᷊awọ-l᷊awọ, kere kal᷊awọu ěnne su apeng.

⁹Tangu i sire měngkatewe němpẹ̌sal᷊iawuhẹ̌ su kạguwạu dunia e mase němpẹ̌liwung pẹ̌darasengangu kawanuan Duata ringangu soa ikẹ̌kěndagu Ruata. Kutẹu putunge kai natěntung bọu l᷊angị kụ něnahabẹ̌ si sire sarang nasue nupu.

¹⁰Bọu ene setang kụ namitaugẹ̌ si sire e, niwahung sol᷊ong dal᷊ungu l᷊audẹ̌ putung dingangu malelang. Kụ kai ěndaịse tampạu binatang dingangu mahang nabi e nihipe kakal᷊imonaěng e. I sire sarung sigěsakeng ěllo hěbi waugu sarang marěngụ-děngụ.

¹¹ Ene iạ nakasilo kạderang kawawantugẹ̌ masaria sěmbaụ kụ i Sie kụkaiang su wowone. Langị dingangu dunia e mapaghohẹ̌ bọu těngone, hakịu seng tawe ikasasilo saụ.

¹²Dingangu iạ nakasilo taumata apang nate e, gaghuwạ darodọ, mạhundarisị su těngong kaderang kawawantugẹ̌ ene. Tangu manga bukẹ̌ e niwingkahẹ̌. Mase bukẹ̌ sěmbaụ l᷊ai wal᷊ine niwingkahẹ̌, kụ kai nạung Bukẹ̌ u Taumata Wiahẹ̌. Bọu e hukumang ninawo su taumata nate, nipẹ̌bewẹeweng kakanoạ i sire, timuhụewe kere mạbawohẹ su ral᷊ungu manga bukẹ̌ ene.

¹³Bọu ene tangu l᷊audẹ̌ e něnarakangu taumata nate apang su ral᷊unge. Papate ringangu Duniaʼm Papate e mal᷊aing něnarakangu apan taumata nate kụ ene su ral᷊unge. Kụ kěbị apan taumata nate e ninawoěngu hukumang nipẹ̌bewẹeweng kakanoạ i sire.

¹⁴Bọu ene tangú Papate ringangu Duniaʼm Papate e nirěmmẹ e su ral᷊ungu l᷊audu putung. (L᷊audu putung ini e ute kai papate su karuan sul᷊ene.)

¹⁵Taumata apan ta nawohẹ arenge su ral᷊ungu Bukẹ̌ u Taumata Wiahẹ̌ e, nirěmmẹ sol᷊ong dal᷊ungu l᷊audu putung.