Read Sangir PĚLAL᷊AHẸ 21 Bible Online

PĚLAL᷊AHẸ 21 - Sangir bible

PĚLAL᷊AHẸ 21

¹ Mase iạ nakasilo langị buhu ringangu dunia wuhu. Langị humotong dingangu dunia humotonge kai něngkaghěngging, dingangu l᷊audẹ̌ e niwu.

² Tangu iạ e nakasilọ e soa susi e, mangal᷊ene Yerusalem buhu, natěntung bọu sorga bọu anun Mawu Ruata. Soa ene seng niriahi kere sěngkatau kaghiang bawine nilẹ̌gaheng baugu ipěněnsomahẹ̌ kaghiang esẹ.

³ Mase iạ nakaringihẹ̌ tingihẹ̌ bọu kaderang kawawantugẹ̌ mẹ̌bẹ̌bera maihạ ungkuěng, ”Orasẹ̌ ini katatanakengu Mawu Ruata e kai seng sěngkapẹ̌tanạ dingangu taumata! I Sie sarung mẹ̌daseng dingangʼi sire, kụ i sire sarung makoạ kawanuanʼE. Duata sẹ̌sane sarung ene ringang i sire kụ makoạ Duatan sire.

⁴ I Sie sarung měngěmụ ěllong mata wọu matan sire. Papate e semben lai tawẹ apa; kasasusa, sasangị arau kasasakị e seng sarung lai tawẹ apa. Apang nạung kal᷊imona e seng naghěngging.”

⁵Mase i Sie kụ mạiang su wowong kaderang kawawantugẹ̌ e něhengetang, ”Orasẹ̌ ini e kěbị seng Takụ ipakariadi wuhu!” I Sie něhengetang l᷊ai si siạ angkuěng, ”Bohẹko ini, u kal᷊awọu hengetang ini e kahěngang dingangu kapangimangeng.”

⁶ Mase i Sie něhengetang angkuěng, ”Seng nasueng koạ e! Iạ e kai kahumotongange ringangu pangěnsueěnge; Iạ e kai Mawu wọu panẹ̌takenge sarang pěngěnsueěnge. Apan Taumata kụ mạdou, sarung Takụ ipanginung tạ bawaehe wọu simbul᷊u akẹ makạgěllịu pẹ̌bawiahẹ̌.

⁷ I saing kụ makạuntung e sarung manarimạ u kěbị ene wọu Anu-Ku. Iạ e sarung makoạ Mawune, ringangu i sie sarung makoạ anạ-Ku.

⁸Arawe i saing bahaning kainggạ, taha pẹ̌sunial᷊ẹ̌, matatingkaị, tahapate, tahapẹ̌sundal᷊ẹ̌, tahapẹ̌bal᷊ikụ mata, tahapaněmba mahang duata, dingangu kěbị tahapẹ̌konti, sarung iwahung su ral᷊ungu l᷊audẹ̌ putung dingangu malelang dụděllị, mangal᷊ene papate rial᷊ẹ̌ karuane.”

⁹Sěngkatau wọu tal᷊oarang malạekatẹ̌ pitu kụ seng měngẹ̌ngumbelẹ bokorẹ̌ pitu kụ napenẹ u lohong papahang haghine pitu kasamuriange kụ diměnta su anuku ringangu nẹ̌bera u, ”Boete! Iạ e reng manodẹ u Kaghiang bawine si kau, mangal᷊ene ute makoạ kawingʼu Ahusʼu Domba e.”

¹⁰ Tangu Rohkẹ̌ u Ruata e nẹ̌karadiahang si siạ, kụ malạekatẹ̌ e němaringang si siạ sol᷊ong pusigu wul᷊ude marangẹ-dangẹ. I sie něnodẹ u Yerusalem si siạ, soa susi e, soa ene natěntung bọu sorga, bọu Ruata e,

¹¹dingangu l᷊ahiansang ore kawantugu Mawu Ruata. Soa ene kụkerong kere kakerongu watung paramata, kere watuʼng yaspis matilang kere kasěnaěng.

¹²Meselẹ̌ marangẹ masuwenehẹ̌ něliwung soa e, piạ pasěllangenge mapul᷊o dua kụ mạdariagạ su malạekatẹ̌ mapul᷊o dua. Suapan pasěllangenge kạbawohẹ arengu apạeweng balagẹ̌ mapul᷊o dua e kawanuan Israel.

¹³ Piạ pasěllangenge tatěllu kụ tụtatěngo apang pungu anging: tatěllu su sěmběkan daki; tatěllu su sěmběkan timuhẹ̌, tatěllu su sěmběkan sawěnahẹ̌, dingangu tatěllu su sěmběkam bahẹ.

¹⁴Meselu soa ene nipětị su wowom batu pondasi mapul᷊o dua. Suapang batu pondasi e niwohekangu arengu manga rarolohang u Ahusu Domba mapul᷊o dua e.

¹⁵ Malaekatẹ̌ kụ měbẹ̌bisara ringangku e piạ těkinge sasukạ nikoạ bọu wul᷊aeng, mědeạu ipanukạ soa ene, manga pasěllangenge ringangu mesele.

¹⁶Soa ene tangu nẹ̌buku ěpạ, kụ nandụ e mẹ̌sul᷊ungu wěnahe. Tangu malaekatẹ̌ ene něnukạ e soa e ringangu těking sasukạ e; nal᷊ahẹ e nandụ e ute 2400 su kilone;[9] běnahe ringangu rangẹ e mẹ̌sul᷊ungu nandụ e.

¹⁷Piạ e malạekatẹ̌ e nanukạ meselẹ̌, nal᷊ahẹ e u kai marangẹ[10] u meselẹ̌ e ěnnungu pul᷊o su metere.[11] Sasukạ kụ piněnukạ u malạekatẹ̌ e ute kai sasukạ pinanukạ u taumata.

¹⁸ Meselu soa e nịkakoạ bọu watuʼng yaspis, arawe soane hala e wọu wul᷊aeng sahị, matilang kere kasěnaěng.

¹⁹Manga watung pondasing soa ene e nilẹ̌gahengu patikụ haghing batu paramata. Batu pondasi humotonge nikoạ bọu watung yaspis, kụ karuane ute wọu watung nilam, katěllune wọu watung yakut, kaěpạ e wọu watu zamrud,

²⁰kal᷊imane wọu watu baiduri Sepah, kaěnnunge wọu watun dělima, kapitune wọu watun ratna cěmpaka kual᷊une wọu watum beril, kasione wọu watun Topas, kapul᷊one wọu watung Krisopras; kapul᷊oěsane wọu watung Lazuardi; kapul᷊o duane wọu watung amethist.

²¹Pasěllangeng mapul᷊o dua e nariadi wọu mutiara mapul᷊o dua, apan tukade nikoạ bọu mutiara pẹ̌sěmbaụ. Dal᷊eng su soa ene nikoạ bọu wul᷊aeng sahị, matilang kere kasěnaěng kụkerong.

²²Iạ e tawe nakasilo Wal᷊em Mawu su ral᷊ungu soa ene, batụu Wal᷊em Mawu e ute kai Mawu sẹ̌sane. Duata Limembong Kawasa, ringangu Ahusu Domba e.

²³ Soa ene ute tawe wahal᷊uasu tualagengu matangěllo arau wul᷊ang, batụu kawawantugu Mawu Ruata e mạnualagẹ̌, dingangu Ahusu Domba e kai sol᷊one.

²⁴ Manga wansa su dunia e sarung dumal᷊eng su ral᷊ungu tualage, dingangu manga ratu e mal᷊aing sarung měmpẹ̌bawa kakakalạ i sire sol᷊ong dal᷊ungu soa ene.

²⁵ Manga pasěllangengu soa ene e sarung mawuka kanandụeweng ěllo; tawe sarung hěpingang, batụu sene tawẹ apa hěbine.

²⁶Kasěllahẹ̌ dingangu kakakalạ u manga bansa e sarung bawaěng sol᷊ong dal᷊ungu soa ene.

²⁷ Arawe taumata kụ měmpẹ̌kẹ̌koạ hal᷊ẹ̌ kụ makạdarěnting, arau taumata kụ měmpẹ̌kẹ̌konti — nimbụe walạewe apa kụ kotorẹ̌ e, měngkatewe kumbahang-kumbahang masuẹ̌ su ral᷊unge. Makakasuẹ̌ ute kětạeweng taumata kụ arenge kạbawohẹ su ral᷊ungu Bukẹ̌ u Taumata Wiahẹ̌, bukẹ̌ u Ahusu Domba e.