Read Sangir PĚLAL᷊AHẸ 22 Bible Online

PĚLAL᷊AHẸ 22 - Sangir bible

PĚLAL᷊AHẸ 22

¹ Malạekatẹ̌ e mal᷊aing napatodẹ si siạ sal᷊ụ kụ akẹ e makạonggọu pẹ̌bawiahẹ̌. Sal᷊ụ ene měngkate kụkuhěnabẹ̌ kere kasěnaěng dingangu mẹ̌lelehẹ̌ bọu kaderang kawawantugu Ruata ringangu Ahusu Domba e,

² sutal᷊oaran dal᷊eng su soa ene. Su wiwihu sal᷊ụ ene, su ruamběka e piạ kalu pungu pẹ̌bawiahẹ̌, kụ mẹ̌bẹ̌bua mapul᷊o dua su sul᷊ene sěntaung, mangal᷊ene sěmbul᷊ang sěnsul᷊e. Daung e ipěpẹ̌pakẹ baugu mạpakaul᷊en tědụ u kěbị umatẹ̌.

³ Su ral᷊ungu soa ghẹ̌guwạ ene e tawe kadiongeng kaěbakeng měnsang apạe kahinoěngu laaneng Duata. Kaderang kawawantugu Ruata e ringangu Ahusu Domba ene sarung ene su ral᷊ungu soa ene. Manga ěllangʼE sarung mẹ̌kal᷊iomaneng si Sie,

⁴ringangu makasilo ghatinʼE. ArengʼE sarung bohekang su rěhụ i sire.

⁵ I sire tawe wahal᷊uasu měgausẹ̌ sol᷊o arau tualagu matangěllo, batụu hěbi e semben tawẹ apa, dingangu kai Mawu Ruata sẹ̌sane sarung manualagẹ̌ si sire. Tangu i sire sarung mẹ̌parenta kere sěngkatau ratu e sarang kakalẹ̌.

⁶Tangu malạekatẹ̌ e nẹ̌bera si siạ, ”Manga wawera tamai ini e mamben těngadẹ̌ dingangu kapangimangeng. Mawu Ruata kụ seng něngonggọu Rohkẹ̌ʼE su manga nabi e seng něndolohu malạekatʼE něnodẹ su manga ěllangʼE apa kụ sarung lighạ mariadi.”

⁷”Pẹ̌daringihẹ̌ko ini e!” angkuěng u Mawu Yesus, ”Iạ e sarung lighạ duměnta! Kariangkamang i sain tụtuhụ manga wawerang hengetang su ral᷊ungu bukẹ̌ ini!”

⁸Iạ i Yohanes seng nakaringihẹ̌ dingangu nakasilo patikụ ini e. Sarangke iạ seng nakaringihẹ̌ dingangu nakasilo ute iạ e naěnsạ e su těngon malạekatẹ̌ kụ seng něnodẹ u kěbị ene si siạ, dingangu iạ e měnaung mẹ̌suba si sie,

⁹arawe i sie kawe nẹ̌bera si siạ, ”Kumbahang! Abe pẹ̌suba si siạ! Pẹ̌subawe su Mawu Ruata! Batụu iạ e mal᷊aing ěllang kere i kau, dingangu kere manga anạ u sěmbaụ manga nabi ringangu kěbị taumata apang kụ mạhuntuhụ manga tatanata su ral᷊ungu bukẹ̌ ini!”

¹⁰Mase i sie nẹ̌bera kạpia, ”Kumbahangbe mapakapěnisu manga wawerang hengetang kụ seng nitěbal᷊ẹ̌ su ral᷊ungu bukẹ̌ ini, u seng masandigẹ̌ tempone patikụ ini e sarung mariadi.

¹¹ Taumata ral᷊akị e, balạe pẹ̌kakoạ e ral᷊akị; taumata mal᷊amuhụ e walạ e apẹ̌těngkal᷊amuhụ u watangenge; i sain tụtol᷊e kapulun Duata e, balạ e hanesẹ̌ apatol᷊e kapulun Duata, dingangu i sain hanesẹ̌ měbẹ̌biahẹ̌ samatang baugu Ruata e, balạ e hanesẹ̌ apẹ̌biahẹ̌ samatang baugu Ruata.”

¹² ”Pẹ̌daringihẹ̌ko ini!” angkuěng u Mawu Yesus, ”Sen tawe mararěngụ Iạ sarung duměnta kụ mẹ̌bawa wawalarẹ̌ baugu mamal᷊isẹ̌ apan taumata tuhụewe apang kụ seng nịkakoạ e.

¹³ Kai Iạ e kahumotongange ringangu kasamuriange; Kai Iạ e Mawu wọu panẹ̌takenge sarang pěngěnsueěnge.”

¹⁴ Kariangkamang i saing měngẹ̌nguhasẹ̌ lakụ e sarang mawurěsi hakịewen i sire iapakawala mahungkaěng buang kalum pẹ̌bawiahẹ̌ dingangu sumuẹ̌ su ral᷊ungu soa ene lumawesẹ̌ pasěllangenge.

¹⁵Arawe i saing kụ měmpẹ̌kẹ̌koạ kal᷊awọu tatingkaị, apang měpẹ̌pakẹu wal᷊ikụ mata, tahapẹ̌sundal᷊ẹ̌, tahapate, tahapaněmba mahang duata, tahakontiang, bae su wawera ore lai ringangu kakanoạ e, kěbị i sire ene katatanakenge ute su l᷊ikudu soa ene.

¹⁶ ”Iạ e, i Yesus, seng bọu něndolohu malạekatẹ̌-Ku sol᷊ong anung kamene tadeạu i sie makapaul᷊ịu manga hal᷊ẹ̌ tamai ini waugu karal᷊ambang manga jamaatẹ̌. Iạ e kai hěnton Daud; kai Iạ e wituingu Raki kụ matuahẹ̌ e.”

¹⁷ Rohkẹ̌ u Ruata e ringangu kaghiang bawine e něhengetang u, ”Wọete!” I sai-sain kụ nakaringihẹ̌ ini e hinon lai mẹ̌bera u, ”Wọete!” I saing kụ narou, pěmpẹ̌haungke! Dingangu i saing kụ dụdul᷊agẹ̌ e ute i sie měngkate pěngal᷊ạ akẹ kụ makạonggọu pẹ̌bawiahẹ̌ e kụ tawẹ bawalare.

¹⁸ Baugu i sai-saing kụ makạdingihẹ̌ bawerang hengetang su ral᷊ungu bukẹ̌ ini e, tangu iạ, i Yohanes, mạngonggọu tatal᷊umbaghẹ ini; kereu piạu měnamba su wawera tamai ini, ute Mawu Ruata e sarung l᷊ai měnamba hukumang su taumata ene ringangu haghing hombang kụ seng nilahẹ su ral᷊ungu bukẹ̌ ini.

¹⁹Dingangu kereu piạu měnggaing bọu wawerang hengetang tamai ini, ute Mawu Ruata e mal᷊aing sarung měnggaing bahageange kere seng nilahẹ su ral᷊ungu bukẹ̌ ini — mangal᷊ene wahageange wọu kalum pẹ̌bawiahẹ̌ e ringangu wọu soa susi e.

²⁰I Sie kụ něhumpạu kěbị habarẹ̌ tamai ini e něhengetang, ”Těngadẹ̌, Iạ e sarung lighạ duměnta!” Aming! Děntạ e, o Mawu Yesus!

²¹Karimạko Mawu Yesus e mapẹ̌dal᷊embon tatal᷊ěntụʼE su kěbị kawanuan Duata e![12]