Read Sangir PĚLAL᷊AHẸ 5 Bible Online

PĚLAL᷊AHẸ 5 - Sangir bible

PĚLAL᷊AHẸ 5

¹ Ené iạ nakasilo bukẹ̌ madarul᷊ung sěngkal᷊ěpa su l᷊iman Sie kụ mạiang su kaderang kararatuange. Bukẹ̌ ene e napenẹ u wohẹ su ruamběka nịsasegelu segelẹ̌ pitumbaụ.

²Mase iạ e nakasilo malạekatẹ̌ sěngkatau matoghasẹ̌ kapělẹ̌luntingihe maihạ, ”Kai i sai wotonge maměka manga segelẹ̌ ini ringangu měmingkahẹ̌ bukẹ̌ ini?”

³Kaiso baẹ su sorga ore lai su dunia e, arau manilaing su al᷊ungu dunia e,[3] tawẹu sarang sěngkatau kụ makawingkahẹ̌ bukẹ̌ ini, ringangu makasilo sol᷊ong dal᷊unge.

⁴Tangu iạ e měngkatewe apa limungkang marehe batụu tawẹ u sarang sěngkatau relaing botonge mamingkahẹ̌ bukẹ̌ ene, ringangu makasilo sol᷊ong dal᷊unge.

⁵ Mase sěngkatau wọu i sire měngangahạe nẹ̌bera si siạ, ”Abe sangị! Kakělla! Singa wọu walagʼi Yehuda, pal᷊ahěnton Daud masěllahẹ̌ e, seng nakawatạ. I sie wotonge měměka segelẹ̌ pitu e ringangu měmingkahẹ̌ bukẹ̌ ene.”

⁶ Bọu ene iạ e nakasilo Ahusu Domba sěmbaụ dụdarisị sutal᷊oarang kaderang kararatuange, lẹ̌liwungang u riadikang biahẹ̌ ěpạ e ringangu kěbị pangahạ ene. Ahusu Domba ene kakěllaěng al᷊ingkai kere seng bọu nipotọ. I Sie piạ sungene pitu ringangu matane pitu: kụ kai rohkẹ̌ arẹ̌gam pitu wọu Mawu Ruata kụ seng nirolohẹ̌ sol᷊ong kạguwạu dunia.

⁷Bọu ene Ahusu Domba ene e himaung, kụ něngal᷊ạ bukẹ̌ mạdarul᷊ung ene e wọu l᷊ima koanengu tau mạiang su kaderang kararatuange.

⁸ Ene Ahusu Domba e kapẹ̌kẹ̌koạ e kerene tangu, riadikang biahẹ̌ ěpạ e ringangu manga měngangahạ e i sire ruam pul᷊o ěpạ e němpẹ̌těngkasumage su těngone. I sire nahiạeng kěcapi lẹ̌umbelekang e ringangu wohogẹ̌ bul᷊aeng lohone kamania kụ kai mangạ e kakal᷊iomaneng u kawanuan Duata e.

⁹ I sire měmpẹ̌kẹ̌kantarị u kantarị buhu sěmbua: ”I Kau e hinone makapěngal᷊ạ bukẹ̌ ene ringangu makapěměka manga segele. Batụu i Kau e kai seng nipate, ringangu kahiang kapapohonguʼE, taumata wọu kěbị hěnto, wọu kěbị haghing bera, něgara ringangu wansa e, niwělliangu waugʼu Ruata.

¹⁰ I Kau e seng napakariadin sire sěmbaụ bansa pamamileěng manga imang, tadeạu i sire mẹ̌tangkiang Duatang kitẹ, dingangu mẹ̌parenta su wowon dunia e.”

¹¹ Kutẹu iạ nakasilo kapia. Iạ nakaringihẹ̌ tingihu malạekatẹ̌ hiwune ringangu yutane kal᷊awọe. I sire mạhundarisị měmpělẹ̌liwung kaderang kararatuang dingangu riadikang biahẹ̌ ěpạ e ringangkewen manga měngangahạ e.

¹²Kụ i sire měmpẹ̌kẹ̌kantarị u tingihʼi sire mal᷊aihạ, ”Ahusu Domba kụ nạung seng nipotọ e, su hinone wue makatarimạ u kawasa, kakakalạ, kapelẹesa ringangu katoghasẹ̌ e; i Sie hinong adateng, bantughang dingangu hanesẹ̌ daloěng!”

¹³Mase iạ nakaringihẹ̌ patikụ diadikang su l᷊angị, su dunia, su al᷊ungu dunia ringangu su ral᷊ungu l᷊audẹ̌ — nimbụ e patikụ diadikang su kaguwạu dunia ini e — měkẹ̌kantarị, ”I Sie kụ mạiang su kaderang kararatuange, ore Ahusu Domba e, kai kal᷊ahumpakengu raralo, ringangu adatẹ̌, dingangu kawawantugẹ̌ dingangu kawasa waugu sarang karěngụ e!”

¹⁴Tangu riadikang ěpạ e němpẹ̌simbahẹ̌, ”Aming!” Kụ měngangahạ e mal᷊aing němpẹ̌těngkasumagẹ̌ němpẹ̌suba.