Read Sangir PĚLAL᷊AHẸ 6 Bible Online

PĚLAL᷊AHẸ 6 - Sangir bible

PĚLAL᷊AHẸ 6

¹Bọu ene iạ nakasilo Ahusu Domba ene něměka segelẹ̌ humotong bọu tal᷊oarang segelẹ̌ pitu e. Mase iạ nakaringihẹ̌ sěmbaụ bọu riadikang ěpạ ene nẹ̌berau, ”Mahịe!” Tingihe al᷊ingkai tingihu rěllụ.

² Ene iạ němandạ e, kutẹu sěngkakakělla kawe piạ kawal᷊o mawira sěmbaụ. Sumasakene kai mạngumbelẹ papitị, kụ nighěllirangu makotane sěmbaụ. Kụ i sie rimal᷊eng mẹ̌sul᷊ungu tau nakawatạ tamai manaweng batạ e.

³Bọu ene Ahusu Domba e něměka segelẹ̌ karuane kụ iạ e nakaringihẹ̌ diadikang karuane nẹ̌bera, ”Mahịe!”

⁴ Mase piạewe kawal᷊o wal᷊ine sěmbaụ siměbang kapia. Kawal᷊o ene awạ e mahamụ. Sumasakene nighěllirangu kawasa iapạngal᷊ạ pẹ̌darame wọu wowon dunia, tadeạu taumata e měmpẹ̌papate. Kụ i sie nighěllirangu aghide peda masaria.

⁵ Mase Ahusu Domba e něměka segelẹ̌ katěllune. Kụ iạ e nakaringihẹ̌ diadikang katěllune nẹ̌bera u, ”Mahịe!” Iạ němandạ e, sěngkakakělla kawe kawal᷊o mitung sěmbaụ. Sumasakene mạngumbelẹ timbangeng sěmparẹ̌.

⁶Kụ iạ e nakaringihẹ̌ piạ apa kụ daringihang mẹ̌sul᷊ungu tingihẹ̌ lụěnggo wọu tal᷊oarang diadikang ěpạ ene. Ungkuěngu tingihẹ̌ ene e, ”Gětung mapia sěliterẹ̌ e arěgang saghedẹ̌ su sahěllo, dingangu gětung gahị e wal᷊ine těllung literẹ̌ e mal᷊aing arěgang saghedẹ̌ su sahěllo. Kaiso kumbahangbe mẹ̌gagholọ u manga kalung zaitun dingangu waelu anggorẹ̌ e!”

⁷Bọu ene Ahusu Domba e něměka segelẹ̌ kaěpạ e. Kụ iạ e nakaringihẹ̌ diadikang kaěpạ e nẹ̌bera u, ”Mahịe!”

⁸ Iạ e timatingang, katẹ u sěngkakakěllạ e piạ kawal᷊o sěmbaụ gatine wilosẹ̌. Sumasakene arenge i Papate. Kụ bọu l᷊ikude i sie tẹ̌tol᷊eěng i Runiang Papate[4] e marědu-rěduhẹ̌. Kụ irẹ̌dua e piněgělikangu kawasa su kaěpạ u ral᷊ohon dunia e, tadeạu i sire makapěmate lumiung pẹ̌sasasekẹ e, lumiung karal᷊unusẹ̌, lumiun sahindạ dingangu lumiun manga binatang dul᷊u.

⁹Bọu ene Ahusu Domba ene něměka segelẹ̌ kal᷊imane. Ene iạ nakasilo su al᷊ungu pananěmbaěnge piạ manga himukudu taumata apan pinate ual᷊ingu i sire měmpanoghasẹ̌ tatanatan Duata ual᷊ingu pẹ̌sasahidin sire.

¹⁰I sire nẹ̌kiạen tingihẹ̌ maihạ, ”Mawu Kasěllahenge, susi ringangu kahěngang! Delaing kạděngụ e, kụ i Kau Mawu wuhụ e managhupia ral᷊ohon dunia kụ měhukung i sire ual᷊ingu seng němate si kami?”

¹¹Sěngkatau-sěngkatau wọʼi sire e nighěllirangu lakụ e mawira manandụ. Mase i sire nipěngiloahẹ̌ kạdodọ, sarang seng natimụ e manga ringangi sire apan munara sěmbaụ e ringangu manga anạ u sěmbaụ i sire, sarung pateěng kere i sire.

¹² Mase iạ nakasilo Ahusu Domba e něměka segelẹ̌ kaěnnunge. Tangu nělinuhe maihạ-ihạ. Matangěllo nẹ̌těngkaitungke kere hekạ kasahẹ̌, dingangu wul᷊ange nẹ̌těngkahamụ kere raha.

¹³ Manga wituinge něngkahondosẹ̌ bọu l᷊angị sol᷊ong bowon dunia mẹ̌sul᷊ungu wuang ara mangangudạ nighinggọu anging mal᷊aihạ.

¹⁴ Langị e napuạ kere karětasẹ̌ nirul᷊ung kụ kěbị bawul᷊urange ringangu tatoarenge nipẹ̌baweho wọu ěnnạ e.

¹⁵ Mase mararatun dunia e, ringangu masasariane, mawawahanine, mararotong, dingangu mangangawasa, ringangkewelain taumata wal᷊ine e, baewe ěllang arau wal᷊ine, kěbị e měmpẹ̌kěmbuni su ral᷊ungu manga liang dingangu su manga kěllẹ u watung bul᷊ude.

¹⁶ Su manga wul᷊ude ringangu manga watu e, i sire lụěnggo u, ”Kaěnsạ e si kami! Buniko i kami wọu matan Sie kụ mạdimạ su kaderang kawantugẹ̌ e, ringangu wọu ral᷊angehu Ahusu Domba e.

¹⁷ Ěllon gěnggange seng narěnta, ini i sire seng měngukahu ral᷊angehʼi sire, kụ tawẹu sarang sěngkatau makapẹ̌tatohạ su těngon sire!”