Read Sangir PĚLAL᷊AHẸ 9 Bible Online

PĚLAL᷊AHẸ 9 - Sangir bible

PĚLAL᷊AHẸ 9

¹Bọu e malạekatẹ̌ kal᷊imane nẹ̌tiụeng napirine, kụ iạ nakasilọ e wituing sěmbaụ nanawo wọu l᷊angị sol᷊ong bowon dunia. Bituing ene nighělirangu kakunsịʼu tigal᷊ụʼu papate e.[5]

² Tangu wituing ene e nělekese tigal᷊ụ u papate e, kụ tipu e siměbangke wọu ral᷊unge kere tipun sunggilẹ̌ gagherẹ. Matangěllo ringangu winangaeng narěndungken tipu wọu tạgial᷊ụ ene.

³ Mase wọu ral᷊ungu tipu e nahunsěbangke manga kal᷊imbotong kụ diměllusẹ̌ sol᷊ong dunia e. Manga kal᷊imbotong ene nighěllirangu kawasa mẹ̌sul᷊ungu kere nighěllị su manga wakunang.

⁴ I sire isẹ̌sěding měmate rěmpugẹ̌, arau manga kakaluang, arau mangạewe sasuang bal᷊ine. I sire kětạeweng botonge tuměmbo taumata su apang děhụ e tawẹ segele wọu Mawu Ruata.

⁵Manga Kal᷊imbotonge tawe nipakawala měmate si sire ene, kaiso kětạben pěmẹ̌manti si sire gěnnangu l᷊ima wul᷊ang. Giadu pananunsarang manga kal᷊imbotonge mẹ̌sul᷊ungu ghiadu kiking bakunang.

⁶ Su ghěnnangu l᷊ima wul᷊ang ene, i sire mětẹ̌tawakal᷊i sarang měmpẹ̌kate, kaiso i sire mang tawe měmpẹ̌kate; i sire mapulu mate, kaiso papate e kai marau wọʼi sire.

⁷ Kakakoạ u kal᷊imbotong e mạnihing kawal᷊o kụ seng sadia měmpẹ̌sekẹ. Su těmbọ i sire kai piạ apa kere makota wul᷊aeng. Gatin sire mẹ̌sul᷊ungu ghatin taumata.

⁸ Utạ i sire mẹ̌sul᷊ungu utạ u manga wawine, ringangu isin sire mẹ̌sul᷊ungu isin singa.

⁹ Sěbạ i sire nihawengangu apa mangawẹ lakụ uase. Tingihu papanidʼi sire e mẹ̌sul᷊ungu tingihu ghapaěngu kareta wẹ̌bol᷊engangu kawal᷊o kụ němpěngalo su ral᷊ungu pẹ̌seketang.

¹⁰Piạ tol᷊en sire ringangu piạ sasipị e kere sasipị u wakunang. Kụ su tol᷊ene ene e piạ toghase ipanunsara taumata su ghěnnangu l᷊ima wul᷊ang.

¹¹Piạ datun sire kụ měpẹ̌parenta si sire, kụ datu ene ute malạekatẹ̌ ěndaị mětẹ̌tal᷊ung tigal᷊ụ u papate. Arenge su werang Ibrani e Abadon; dingangu su werang Yunani e Apolion (kụ mangal᷊ene ”Měnggaghoghahẹ̌”).

¹²Silakạ humotonge nal᷊iụ e. Bọu ene piạko l᷊ai silakạ darua himombang.

¹³ Tuhụ e malạekatẹ̌ kaěnnunge nẹ̌tiụ e napirine. Tangu iạ e nakaringihe tingihẹ̌ nasẹ̌bang bọu wukung pananěmbaěng bul᷊aeng ěpạ e su těngon Mawu Ruata.

¹⁴Tingihẹ̌ ene e nẹ̌bera su malạekatẹ̌ kaěnnunge u, ”Lukako malạekatẹ̌ ěpạ kạl᷊aikị su Sal᷊ụ u Efrat e!”

¹⁵Kụ malạekatẹ̌ ěpạ e nịdal᷊ukạ e. I sire seng niriahi nipẹ̌tatudẹ baugu orasẹ̌, ěllo, wul᷊ang dingangu taung ipạmate sěngkatěllung bahageange wọu patikụ taumata.

¹⁶Iạ e nipaul᷊ikangu kakěpal᷊u mẹ̌sasekẹ su wowong kawal᷊o e rua hasụ su yutane.

¹⁷Kụ su ral᷊ungu papasilo, tinganengku e ute kai manga kawal᷊o ene ringangu manga sumasakene. Manga sumasakene měmpělẹ̌luhen lakụ uase awạe mahamụ sal᷊a ruděllị birụ mẹ̌sul᷊ungu watung paramata, ringangu maririhẹ̌ kere malelang. Těmbọu manga kawal᷊ọ e měpẹ̌papangawẹ u těmbọ u singa ringangu wọu mohonge sěsẹ̌bangengu putung, tipu ringangu malelang.

¹⁸Sěngkatěllung bahageange wọu taumata nate ual᷊ingu hombang tatěllu e; putung, tipu ringangu malelang kụ sụsěbang bọu mohongu manga kawal᷊o ene.

¹⁹Katatoghasu manga kawal᷊o ene kai su mohong i sire ringangu su tol᷊en sire. Tol᷊en sire e kai mẹ̌sul᷊ungu těmpu piạ těmbọ e. Kụ dingangu tol᷊en sire tangu kawal᷊o e mạnunsara taumata.

²⁰ Kai lěmben taumata apan ta nikapateng hombang ene, tawe lai měmpěněntangu koạ u l᷊imang sire hala e. I sire tawe měmpangědo mẹ̌suba manga rohkẹ̌ dal᷊akisẹ̌ dingangu manga pakal᷊uang bọu wul᷊aeng, sal᷊aka arau tambaga, watu ringangu kalu kụ tawe makasilo ringangu makaringihẹ̌, arau l᷊ai makaral᷊eng.

²¹I sire mal᷊aing tawe měněntangu kakanoạ i sire ral᷊akisẹ̌ kere, pěmamate, daghusẹ̌, pẹ̌sasundal᷊ẹ̌ dingangu tako.