Read Sangir RUTẸ̌ 1 Bible Online

RUTẸ̌ 1 - Sangir bible

RUTẸ̌ 1

¹Su tempo nạung kạngerẹ kal᷊amonang Israel piạ datune sěngkatau, wanuang Kanaan kawe nihombangengu karal᷊unusẹ̌. Su tempo ene tangú kai piạ tau esẹ arenge i Elimelekh. I sie wọu ghal᷊ipohong Efrata, kụ mạtanạ su Betlehem su wahageangu Yehuda. Ual᷊ingu hombangu karal᷊unusẹ̌ ene, tangú i sie nakoạ sol᷊ong soam Moab dingangu kawinge, i Naomi ringangu anạ e esẹ duang katau: I Mahlon dẹ̌duang Kilyon. Mase i sire nẹ̌tanạ sene. Piạ e i sire wẹ̌dang paị sene,

³i Elimelekh naminsul᷊ẹ̌ singongone. Tangú natanạ e i Naomi ringangu anạ e rarua.

⁴Anạ e rarua e němpẹ̌kawingu manga wawineng Moab isẹ̌sěbạ si Orpa rẹ̌duang Rutẹ̌. Mapul᷊o taung samuring ene ute,

⁵anạ i Naomi esẹ darua ene, mal᷊aing nate, hakịu i Naomi e kinailangengkeng kawing e ore lai anạ e rarua e.

⁶Tanararěnna wọu ene ute i Naomi e nakaringihẹ̌ u MAWU e seng něngal᷊amatẹ̌ tau Israel ringangu pananipo wuang kalu matimu. Ual᷊ingu ene i Naomi ringangu anạ e mirarating darua e nẹ̌bal᷊ikěkasẹ̌ naněntang u Moab.

⁷I sire něbuạ sěngkapẹ̌buạ napul᷊ẹ sol᷊ong Yehuda. Sutal᷊oaran dal᷊eng

⁸i Naomi e nẹ̌bera su anạ e mirarating darua e, ”I rua e měngkate kapul᷊ẹ sol᷊ong bal᷊eng ninang i rua e. Karimạko MAWU e mẹ̌koạ mapia si rua kerẹewe i rua e mal᷊aing mapia si siạ, dingangu si sire apan seng nate e.

⁹Karimạko MAWU e pakawala mẹ̌gěllị u jodon dua e tadeạu i rua e saụbe makapẹ̌dal᷊ahikingbe kapia.” Bọuten nẹ̌bera kerene, i Naomi e nẹ̌katạ i sire apidu riměngu si rẹ̌dua. Arawe i Orpa rěduang Rutẹ̌ měngkatewe nahunsangị maihạ-ihạ,

¹⁰dingangu něbera si Naomi, ”Tala, Inang! I Kandua e tumol᷊e si Mama sol᷊ong kawanuang Mama e.”

¹¹”Kumbahang bue manga inang!” angkuěng i Naomi, ”i rua e mapiawe kapul᷊ẹ. Kai waugu apa i rua tumol᷊e si siạ? Kai sen tawe waharia saụ makawantelu anạku esẹ mědeạu makoạ kawing i rua arau ěng?[1]

¹²Kapul᷊ẹ e i rua manga anạ, u iạ e kai sen tumanịu maghurang kụ sen tawe saụ makapẹ̌kawing kapia. Kụ manga andene wědaweng lai piạ u mẹ̌kawing dingangku sěhěbi ini kụ deng makaěbạ anạku esẹ,

¹³kụ ěnnaěng i rua relaing mahědo sarang ipakasaria? Unụe wue i rua sen tawe mẹ̌kawing u taumata wal᷊ine? Tala, kumbahang bue kerene i rua manga anạ! Iạ e kai masusa naungku kụ i rua e kawe harusẹ̌ měnal᷊udẹ̌ hukumang u MAWU e si siạ.”

¹⁴I Rutẹ̌ dẹ̌duang Orpa e saụewe němpahunsangị maihạ-ihạ kụ bọu ene i Orpa e nẹ̌katạ e apidu kạděngune si ninange kinaratingang kụ bọu ene i sie napul᷊ẹ.[2] Arawe i Rutẹ̌ tawe mapulu mẹ̌tal᷊ei wọu anung ninange kinaratingang e.

¹⁵Tangu nẹ̌berạe i Naomi si sie, ”Rutẹ̌, kakěllạ e! Ipagu e seng napul᷊ẹ anung kawanuane ringangu anung manga mahan duatane. I kau anạ dakọ e lai tol᷊e kapul᷊ẹ dingange!”

¹⁶Arawe i Rutẹ̌ simimbang, ”Inang, kumbahangbe i Ninang měndolohu iạ pakapul᷊ẹ paněntang i Ninang! Balạewe sarang apa i Ninang, iạ e mal᷊aing dingang. Suapa i Ninang matanạ, iạ e mal᷊aing matanạ sene. Bansang Ninang, ene mal᷊aing bansaku. Duata sẹ̌sěmbaěng i Ninang, mal᷊aing takụ sěmbaěng.

¹⁷Walạewe suapa kapateěng i Ninang sene lai takụ kapateng dingangu lěbingang. Karimạko MAWU e měhukung u iạ kereng kawěhạ e, kereu iạ e kawe mẹ̌tal᷊eing Ninang, tabeaụ katewe papate maměta si kitẹ!”

¹⁸I Naomi nakasilo u i Rutẹ̌ kai mang tumol᷊e kụ, i sie sen tawe lai nẹ̌berang apa-apa wědang!

¹⁹Ene i sire naněpaseng daral᷊eng sarang nahumpạ su Betlehem. Kerene sarangke i sire nasongọ e paị sene, kasěllahu soa ene nẹ̌gẹ̌gahẹ̌. Manga wawine sene e nẹ̌bera, ”Kahěngang bue i sie i Naomi?”

²⁰”Abe pẹ̌kui si siạ, Naomi,” angkuěng i Naomi, ”pẹ̌kuị e si siạ Mara,[3] batụu Ruata Limembong Kawasa e kai seng napakawalang iạ e pinẹ̌biahẹ̌ napenẹ u sigěsạ.

²¹Piạ e nạung iạ naněntangu tampạ ini e wiahẹ̌ku e masorogạ bue, arawe orasẹ̌ ini tangú MAWU e kai němaringang u iạ pinẹ̌sul᷊eng lima tawẹ lohone. Ual᷊ingu ene i kamene kěbị e kumbahang delaing měsẹ̌bạu iạ si Naomi, watụ u MAWU Limembong Kawasa kai seng něhukung u iạ dingangu kasasigěsạ l᷊awọ!”

²²Kerene wěkene kakakoạ i Naomi nẹ̌sul᷊e wọu Moab dingang i Rutẹ̌ anạ e mirarating e kụ tau Moab ene e. I sire nasongo su Betlehem su pěnanětạ u musungu pananipo wuang gandung.[4]