Read Sangir RUTẸ̌ 2 Bible Online

RUTẸ̌ 2 - Sangir bible

RUTẸ̌ 2

¹I Naomi piạ sěngkatau ral᷊ohoʼm bal᷊ene wọu wahakạ u kinawinge i Elimelekh. Tau ene kalạ ore lai timeleng. Arenge i Boas.

² Piạ sěhěllo angkuěng i Rutẹ̌ si Naomi, ”Inang, iạ deng mẹ̌paramisiko makoạ sol᷊ong dahami měngemong gandung apang měngkạnawo wọu l᷊imaʼn sire měmpạměnsạ e. Pěndangengku e mang piạ u mapakawalang iạ mẹ̌koạ ene.” ”Ho, inang!” angkuěng i Naomi, ”dakọe!”

³Tangú rimal᷊engke i Rutẹ̌ sol᷊ong dahami, kụ něngemong gandung timol᷊e měmaměnsạ. Kutẹu nạung nẹ̌kětạkol᷊ai i sie nasuẹ̌ su rahamiʼm Boas.

⁴Tawe nararěnnạ wọu ene i Boas narěnta wọu Betlehem kụ něngonggọu adatẹ̌ si sire měmpạměnsạ. ”Karimạko MAWU e ruměndingang si kamene,” angkuěnge. Měmaměnsạ e simimbang, ”Mal᷊owọko MAWU e měngal᷊amatẹ̌ si Amang.”

⁵Mase i Boas nakiwal᷊o su mandorẹ̌ e, ”Kai i sai wawine ene?”

⁶Mandorẹ̌ ene simimbang, ”I sie kai tau wawine wọu Moab kụ buhụ e narěnta ringang i Naomi bọu wanuang Moab.

⁷I sie nẹ̌paramisi si siạ tadeạu tumol᷊e si sire měmaměnsạ kụ měngemong gandung hondose. Dokeng mal᷊ukadẹ̌ i sie mělẹ̌hal᷊ẹ̌ turusẹ̌, kụ orasẹ̌ ini e wuhụewe simohọ něngirul᷊e kadodọ tempo su suěng.”[5]

⁸Bọu e i Boas nẹ̌bera si Rutẹ̌, ”Kěnangko raringihẹ̌ kal᷊imona. Tawahal᷊uasʼu i kau tamai měngemong gandung rahamiʼm bal᷊ine. Pěmurụe sini ringangu mělahal᷊ẹ̌ku i sire manga wawine. Pẹ̌kakěllạe wue měnsang měměnsạ suapa ngae i sire. Tol᷊eị e i sire sěntiniạ kụ abe kararaun sire. Mạeng u i kau e marou, měngkate pěngal᷊ạ akẹ bọu ral᷊ungu manga wěnsadẹ̌ apan seng bọu nilohoěngu mělahal᷊ẹ̌ apang manga esẹ. Iạ sem bọu nẹ̌bera si sire abe pěnal᷊ukạ si kau.”

¹⁰Nakaringihẹ̌ ene, i Rutẹ̌ nẹ̌tumpěkuhẹ̌ su těngon Boas kụ apidu nẹ̌bera, ”Amang, iạ e tawe hinone měnarimạ u pẹ̌kakoạ kereng kapiane wọu i Amang. Iạ ini e kai taumata raghị kụ tawe hinone makoạ tasibung dal᷊ungu naung i Amang!”

¹¹I Boasẹ̌ e simimbang, ”Iạ seng nakaringihẹ̌ kal᷊awọeweng apa nạung seng kinoạ u waugu miěbạ si ninangu kinaratingang nanětạewe rokeng kawingu e nairị. Iạ masingkạ u i kau e sen naněntangu ghaghurangu ringangu wanuanu kụ diměnta ringangu natanạ sini ringangu taumata kụ bědang běganu.

¹²Mal᷊owọko MAWU e mamal᷊isẹ̌ kal᷊awọu kapianu. Karimạko i kau e měnarimạ u apang hinong ighěllị u MAWU e si kau, Ruatang Israel, ual᷊ingu i kau e seng diměnta kụ mẹ̌těngkaěllung si Sie!”

¹³I Rutẹ̌ simimbang, ”I Amang enẹ e kapiane si siạ, maningbe iạ bal᷊inewe mẹ̌sul᷊ungu mělahal᷊ẹ̌ i Amang. Kal᷊ahimumung Amang e apạ e makạhiborẹ̌ naungku e.”

¹⁴Kutẹu nạung seng tempone waugu kumaěng e, i Boas nẹ̌berạ e si Rutẹ̌, ”Bọete kumaěng. Ěndaung ini e sousẹ̌ e.” Tangú i Rutẹ̌ e kimaěngke ringang i sire apang měmaměnsạ. I Boas mal᷊aing nẹ̌gěllịu gandung tinapa si sie, kụ i Rutẹ̌ kimaěngke sarang nal᷊aedẹ̌. Bọuteng kimaěng ute piạ e lěmbene.

¹⁵Bọu ene i Rutẹ̌ saụewe rimal᷊eng něngemong gandung. Nal᷊ikude i sie, i Boas nẹ̌bera su manga měmaměnsạ e, ”Kereu i sie kawe měngemong gandung kụ sem bọu nipẹ̌papangikị, balaete wue. Kumbahang mapakameang sie arau pẹ̌bawal᷊uangeng i sie. Mapiawe měngkai pẹ̌tatatudẹ sẹ̌sawụ i kamene kadidị-kadidị bọu apan seng bọu pinẹ̌papangikị ene, ringangu mapakanawong ene waugʼi sie tadeạu i sie měngangemonge.”

¹⁷I Rutẹ̌ tatapẹ̌ měngẹ̌ngemong gandung su rahami e sarang bawěllo. Sarangke i sie nẹ̌mamahị kal᷊ěpang kalung gandung pěnẹ̌nontong manga wakị e wọu kalune, luhude i sie kawe seng nạung nakakomol᷊ẹ̌ gěnnangu mapul᷊ong kilo.

¹⁸Bọu ene i sie nẹ̌sul᷊e sol᷊ong soa e kụ nẹ̌bawa e lěnnạu pěngangomol᷊e ene kụ nitodẹ e si ninang e kinaratingange kal᷊awọeweng niemong e. Kụ i sie mal᷊aing nẹ̌gěllị si ninange kinaratingange ene kaěng kụ tawe nakasue i sie kimaěng.

¹⁹Tangú nẹ̌berạ e i Naomi si sie, ”Kai nikaěbakeng u suapa kěbị tamai ini e? Su rahamiʼn sai tangu piněhal᷊ěkangu sahěllo ini? Karimạko Mawu e měngal᷊amatẹ̌ taumata apan nẹ̌koạ mapia si kau e!” Ene i Rutẹ̌ nẹ̌běke si Naomi u rahami piněngemongange gandung e kai nạung tẹ̌taghuaneng u sěngkatau esẹ arenge i Boas.

²⁰ ”Inang, tau ene ute kai pamiling kitẹ marani-rani,” angkuěng i Naomi. ”Seng i sie ene harusẹ̌ měnal᷊udẹ̌ si kitẹ. Karimạko MAWU e měngkai měngal᷊amatẹ̌ si sie. MAWU e sěntiniạ měngkai mapakasěhụ u kědo-Ne, baewe su taumata kụ bědang biahẹ̌ arau lai si sire kụ apan seng nate.”

²¹Bọu ene i Rutẹ̌ nẹ̌bera kapia, ”Inang, tau ene mal᷊aing nẹ̌bera u iạ botonge wue turusẹ̌ měngemong gandung dingang i sire apang mamaměnsạ e sarangkewe kal᷊awọu ghěsin dahamine nasuẹeng pěnsạ e.”

²²”Ore, inang,” angkuěng i Naomi si Rutẹ̌, ”sembeng kapiaěnge i kau něhal᷊ẹ̌ sěngkapěhal᷊ẹ̌ dingang u manga wawine taumatan dahaming Boasẹ̌ e. Batụu, kereu i kau kawe sumuhi su rahamiʼn taumata wal᷊ine, i kau kạdingạ piạ u mẹ̌koạ dal᷊akị sene!”

²³Ual᷊ingu ene, i Rutẹ̌ tatapẹ̌ tụtol᷊e manga wawine taumatan dahaming Boas. I sie měngẹ̌ngemong gandung sene sarangkewe kal᷊awọu maghaghurang e seng nasueng pěnsạ e — baewe pěnsạ humotong arau waewe lai pěnsạ pangěnsueěnge. Kụ karěngụ u ene tangú i Rutẹ̌ mạtanạ dingangi ninange kinarating.