Read Sangir RUTẸ̌ 4 Bible Online

RUTẸ̌ 4 - Sangir bible

RUTẸ̌ 4

¹I Boas nakoạ e sol᷊ong tampạ u pẹ̌sasombangeng su tukadu pasěllangengu soa. Naiangke sene i sie, simahẹ e tau esẹ kụ tuhụewe su sipirang i Boas ute kai anạ u sěmbaụ i Elimelekh karěduhange. Bọu e i Boas nẹ̌kuị e si sie, ”Anu, mahiko kaiang ěndaung si!” Tau ene himaungke kụ naiang.

²Bọu ene i Boas němaringang matatimadu soa ene mapul᷊ong katau niapakaiang lai sěngkakaiang sene. Bouten i sire kimaiang,

³ute i Boas nẹ̌berạe su anạ u sěngkataune ene, ”I Naomi e seng nawal᷊ị bọu Moab. Ini e i sie mapulu mẹ̌bal᷊ụ u ěntana tataghuaneng u wahakạ i Elimelekh, anạ u sěngkataung kitẹ e.

⁴Dingangu iạ mạngiral᷊ing u i kau e harusẹ̌ masingkạ u hal᷊ẹ̌ ene. Kereu i kau e mapulu měmělli ene, ute pẹ̌berạ e su těngon taumata apang mạiang sini e. Kereu tala ute, pẹ̌berạe pakahatedẹ̌ u, kětạeng ikaduạ piạ hakẹ̌ e su hal᷊ẹ̌ ene; i kau e kahumotongange, bọu ene wuhụewe iạ.” Sasimbang u tau ene, ”Ore, iạ sarung měmělli ene.”

⁵Bọu e angkuěng i Boas, ”Kerenẹ e mạengbeng kerene. Kaiso kamageng u i kau e měmělli ěntana ene wọu i Naomi e, tangu i kau e harusẹ̌ lai pěngal᷊ạ si Rutẹ̌,[8] bawineng Moab, bal᷊ung bahakạ u anạ i Naomi. Batụu ěntana ene harusẹ̌be tatapẹ̌ makoạ tataghuaneng u hiten taumata kụ seng nate ene.”

⁶Angkuěng u tau ene, ”Mạeng kerene iạ e tawe makaumal᷊ẹ̌. Kụ ini e tangu mapiaewe takụ pěllokang hakẹ̌ku kere taumata kahumotongange hinong měmělli ěntana ene. Tawẹ gunane iạ měmělli watụ u ěntana ene nal᷊ahẹ u tawe sarung tataghuaneng u hiteku. Mapiawe i kau pěmělli.”

⁷ Su tempo ene kereu piạ u mẹ̌bal᷊ụ arau měnal᷊iu arětạ e, tangu waugu měněgadu tahutěngadu hal᷊ẹ̌ ene ute wiasane mẹ̌bawal᷊ụ e měluạ sandalẹ̌ e, kụ měnarakangu ene su taumata mamělli e. Kerene ral᷊enge tau Israel manahutěngadu hal᷊ẹ̌ u pẹ̌bawawal᷊ụ dingangu pẹ̌bawawělli ěntana e.

⁸Ual᷊ingu ene, piạ e tau ini nẹ̌bera si Boas, ”I kaụ e hala pamělli,” tangú i sie něluạ sandal᷊ẹ̌ e kụ nisarakang e si Boas.[9]

⁹Tangu angkuěng i Boas suapang pangahạ u kawanua ore lai kal᷊awọu taumata wal᷊ine apang ene sene, ”Sahěllo ini i kamene kěbị e nakoạ sahidi u iạ seng namělli wọʼi Naomi kal᷊awọu apan tẹ̌taghuanengu wahakạ i Elimelekh dingangu manga anạ e i Kilyon dẹ̌duang Mahlon.

¹⁰ Su l᷊iung ene lai iạ e něngal᷊ạ si Rutẹ̌ bawineng Moab, bal᷊ung bahakạ i Mahlon ene e makoạ kawingku. Maeng kerene tangu ěntana ene sarung makoạ tataghuaneng u anạ u sěngkatau taumata kụ seng nate ene. Kụ hitene e mal᷊aing sarung těbe ene sutal᷊oarang anạ u sěngkataune ringangu su soane. Pẹ̌tahěndungke wọu manga anạ u sěmbaụ, sahěllo ini i kamene kěbị e seng nakoạ sahidine.”

¹¹ Matatimadu kawanua ringangu taumata wal᷊ine e kụ ene sene němpẹ̌bera u, ”Ore, i kami e sahidine. Karimạko MAWU e mapakariading kawingu ini e kere i Rakhel dẹ̌duang Lea kụ namantelu anạ l᷊awọ baugʼi Yakub. Karimạko i kau e matul᷊ende sutal᷊oarang taumatang ghal᷊ipohong Efrata e ringangu karimạko i kau e tumeleng su Betlehem.

¹² Mal᷊owọko manga anạ kụ sarung ionggọ u MAWU e si kau wọu wawine mangudạ ini e sarung makakariading balagu e mẹ̌sul᷊ungu i Peres, anạ bọʼi Yehuda rẹ̌duang Tamar.”

¹³Tangu i Boasẹ̌ e mal᷊aing nangal᷊ạ si Rutẹ̌ nakoạ kawinge. MAWU e něngal᷊amatẹ̌ si Rutẹ̌ hakịu i sie piạ e kal᷊uwaenge kụ namantelu anạ e esẹ sěngkatau.

¹⁴Manga wawine ute nẹ̌bera si Naomi, ”Karaloko MAWU e! I Sie seng něngonggọu pulung esẹ sěngkatau si kau e su sahěllo ini e waugu mẹ̌padul᷊i si kau. Karimạko rariọ ene mambeng tumeleng su Israelẹ̌ e!

¹⁵Miraratingu ene e kereneng kapiane si kau e. I sie seng něngonggọ si kau e něngalembo wọu apang kinaghěllịu anạ esẹ i sire pitung katau e. Orasẹ̌ ini e i sie seng něngonggọu sěngkatau pulung esẹ lai e si kau, makatambang toghasẹ̌ buhu e si kau e, ringangu měhiking si kau su tempong kaghaghurangu e.”

¹⁶I Naomi e nangal᷊ạ e rariọ ene kụ nilahikinge ringangu kal᷊awọu tatal᷊ěntụ e.

¹⁷Manga wawine ipělẹ̌lampung i sire tangu nẹ̌sěbạu rariọ e si Obed. Baugeweng apan taumata e i sire nẹ̌bera u, ”I Naomi e seng piạ anạ e esẹ sěngkatau!” Kụ seng i Obed ini e kasamuriange nakoạ i amang i Isai, dingangu i Isai ini e kai i amang i Daud.

¹⁸Kai ini e běhị u salakẹ̌boěngi Daud, nanětạ bọʼi Peres, kụ kai: i Peres, i Hezron, i Ram, i Aminadab, i Nahason, i Salmon,[10] i Boas, i Obed, i Isai, i Daud.