Read Sangir SAMUEL HUMOTONG 1 Bible Online

SAMUEL HUMOTONG 1 - Sangir bible

SAMUEL HUMOTONG 1

¹Piạ sěngkatau esẹ arenge i Elkana, wọu hěntong Efraim. I sie mạtanạ su soan Rama su wanuang bawul᷊udang u Efraim. I Elkana e kai anạ i Yeroham pulung i Elihu. I sie kai nasowa su walagu Tohu, lelangu ghal᷊ipohon Zuf.

²I Elkana piạ kawinge rarua, i Hana ringangi Penina. I Penina piạ anạ e, arawe i Hana e tala.

³Su apan taung i Elkana e mạněntang u Rama mědeạu mẹ̌kal᷊iomaneng su Silo ringangu mẹ̌bawa sasěmba su MAWU Limembong Kawasa. Nakoa imang u MAWU su Silo ute kai i Hofni rěduang Pinehas, manga anạ i Eli.

⁴Walạewe apang i Elkana manarakang u sasěmba, i Penina ringangu kěbị anạ e sěngkatau-sěngkatau nionggotange sěmbahageang bọu ghẹ̌sin sasěmba ene.

⁵Arawe i Hana e nighěllirang u tumbạ u sěmbahageang batụu[1] MAWU e tawe nẹ̌gěllị u anạ si sie. Maningbe kerene i Elkana e mang mapia-pia si Hana.

⁶I Hana měngkate hanesẹ̌ ipakạtědụ naunge ringangu lẹ̌heghesang i Penina, dokạ e ene, ual᷊ingu MAWU e tawe nẹ̌gěllị u anạ si sie.

⁷Ene tangú nariadi wọu taung sarang taung; kereu i sire makoạ sol᷊ong Bal᷊en MAWU, sidutu i Hana e mang ipakạtědụ naunge kahiang Penina. I Hana měngkatewe sụsangị dingangu tawe kumakaěng ual᷊ingu i sie lẹ̌heghesang.

⁸Mase suapang i Elkana, kawinge nakiwal᷊o, ”Unụ e i kau sụsangị Hana? Unụ e i kau madiri kumaěng dingangu měngkate masusa naungu? Iạ kai bal᷊inẹbe limembong karěgane si kau e wọu manga anạ u esẹ mapul᷊oe?”

⁹Piạ sěhěllo i sire kụkaěng su Wal᷊en MAWU su Silo. I Hana nẹ̌buạ bọu medang kakanengang. Su tempo ene Imang i Eli kụ ene lai su Ghaheda e, kụkaiang su kaderane masandigu tukadẹ̌. Ual᷊ingu susa naung i Hana někal᷊iomaneng su MAWU apidu kạsangị e marehe.

¹¹ Bọu ene i Hana nẹ̌diandi, angkuěnge, ”MAWU Kasěllahenge, kakěllai wue ěllangʼU ini! Kakěllạ e sigěsạ u ěllangʼU. Tahěndunge wue ěllang dingangu abe kiwul᷊ei. Kereu i Kau e měngonggọ u anạ esẹ sěngkatau su ěllangʼU, iạ mẹ̌diandi sarung měngonggọ i sie si Kau kanandung pẹ̌bawiahe. ĚllangʼU e mẹ̌diandi lai u utạ u anạ tawe pakipotọ.”[2]

¹²Diọ piạ kararěnane i Hana nẹ̌doa, kụ i Eli měmẹ̌manda mohong u mawine ene.

¹³I Hana nẹ̌doa su ral᷊ungu naung, kụ kětạeng biwihe tụtal᷊imoadẹ̌, arawe tingihe tawe i kararingihẹ̌. Ual᷊ingu ene i sie tẹ̌tikateng i Eli u kawe wukang.

¹⁴Tangú i Eli mal᷊aing nẹ̌bera si sie, ”Unụ e i kau kawe wukang sini! Abe kawe saụ pěnginung anggorẹ̌ lai!”

¹⁵Arawe i Hana e simimbang, ”Iạ e wal᷊inewe wukang, Tuang, iạ e mamben tawe něnginung anggorẹ̌! Iạ e tawe kimewạ kụ kạpẹ̌dẹ̌doane mạul᷊ịeng kal᷊awọu sigěsạku e su MAWU.

¹⁶Kumbahang bue iạ ini koateng kere mawine ral᷊akisẹ̌. Iạ mẹ̌kěkal᷊iomaneng kere ini ual᷊ingu iạ měngkate lụlahunsusa.”

¹⁷Bọu e angkuěng i Eli, ”Kamageng kerene kapul᷊ẹ su pědarame. Karimạko Ruatang Israelẹ̌ e rumaringihẹ̌ kakindoạ u.”

¹⁸Sasimbang i Hana, ”Karimạko ia makahombang al᷊amatẹ̌ boʼi Amang.” Bọu e i sie natamai kụ mase kimaěng, kụ semben tawe saụ nasusa naunge.

¹⁹Sěngkariěllone i Elkana ringangu ral᷊ohom bal᷊ene nẹ̌bangung deng mal᷊uka-l᷊ukadẹ̌ kụ bouten nẹ̌kaliomaneng su MAWU, napul᷊ẹ e i sire sol᷊ong Rama. Bọu ene i Elkana nẹ̌sěngkapẹ̌tikị dingangi i Hana kawinge ene, kụ MAWU e rimaringihẹ̌ kakal᷊iomaneng i Hana.

²⁰Bawine ene piạ e kapapia ringangu němantelu anạ e esẹ. Kụ nisěbạ e si Samuel[3] angkuěnge, ”Seng takụ nirorongang bọu anung MAWU.”

²¹Nidatingken tempone i Elkana ringangu i sire tahanạ taraị sol᷊ong Silo kapia měnarakang u sasěmba ghěnnang u sěntaung su MAWU. Su l᷊iung ene i Elkana seng nẹ̌diandi waugu měnarakang u sasěmba těntani.

²²Kaiso sěnsul᷊e ini i Hana tawe timol᷊e. Angkuěnge su kawinge, ”Hědong niědo bọu susu, i Samuel takụ i ěntudẹ̌ sol᷊ong Bal᷊eng MAWU, kụ i sie mẹ̌tanạ sene karěngụ u pẹ̌bawiahe.”

²³I Elkana simimbang, ”Kerenẹ e, koạ e apang hinong kakěllaěngu e mapia; katanạ e su wal᷊e sarang tempone i kau mapěngědong anạ i kitẹ bọu susu. Kụ karimạko MAWU e mapakariadin diandinu[4] e kahěngang.” Kụ i Hana mẹ̌tanạ su wal᷊e sarang tempone anạ e niědo wọu susu.

²⁴Sarangke i Samuel niědo wọu susu, i sie niěntudʼi mamạ e su Wal᷊eng MAWU su Silo. Su tempo ene i sie wědang kạdodọ-dodọ. I Hana nẹ̌bawa l᷊ai sapi esẹ umbure těllu taung,[5] gandung mapul᷊ong kilo, dingangu kal᷊ombạ pisị sěmbaụ natuelu anggorẹ̌.

²⁵Sapi ene nipotọ, bọu e i Samuel niěntudẹ̌ sol᷊ong anung Eli.

²⁶I Hana nẹ̌bera si Eli, ”Mẹ̌dorong ampung Tuang. Bědang nakatahěndung ngae si siạ i Tuang? Iạ ini e kai wawine nạung bọu kinasilon Tuang dụdarisị sini kapẹ̌kẹ̌kal᷊iomanenge su MAWU.

²⁷Seng ini e rariọ takụ nirorongang su MAWU. Kakal᷊iomanengku e seng niraringihang,

²⁸kụ ual᷊ingu ene anạ ini takụ i sarakang mědeạu makoạ tataghuaneng u MAWU e kanandung pẹ̌bawiahe.” Bọu ene i sire[6] mẹ̌kal᷊iomaneng su MAWU.