Read Sangir SAMUEL HUMOTONG 10 Bible Online

SAMUEL HUMOTONG 10 - Sangir bible

SAMUEL HUMOTONG 10

¹Bọu ene i Samuel něngal᷊ạ e poci lohong lanang zaitun, bọu ene lana ene nisěbohe su těmbo i Saul, kụ diměngu si Saul apidu nẹ̌bera, ”MAWU e seng nělanisẹ̌ si kau e nakoạ datung Israel umatʼE. I kau sarung mẹ̌parenta umatʼE kụ maněntanudẹ̌ si sire wọu manga sědụ i sire. Kai ini tatialane si kamene u MAWU e seng němile si kau[23] nakoạ datu waugu umatʼE:

²Sarạeng i kau e seng naněntang u iạ su sěhěllo ini, i kau e sarung mẹ̌sombang u manga esẹ duang katau su rěduhu lěbing i Rahel su Zelzah su wanuang Benyamin. I sire e sarung mẹ̌bera si kau, kere ini: Manga kalide rẹ̌deakengu ene e seng kinareạ. Orasẹ̌ ini i amang u e seng tawe ghiměnggang u manga binatang ene e, kaiso kawe mang makịbal᷊o měnsang apạ e hinong koatenge mědeạu makapẹ̌sombang i kau.”

³I Samuel saụ nẹ̌bera, ”U wọu tampạ ene i kau e měngkate ral᷊eng sol᷊ong kalu tampạ u pẹ̌kakal᷊iomanengang su Tabor. Paị sene i kau e sarung mẹ̌sombang u esẹ těllung katau rụdal᷊eng sol᷊ong Betel mědeạu mẹ̌koạ sasěmba su Mawu. Sěngkatau měngengahạ anạ u kambing tatěllu, sěngkatau ewe lai mẹ̌bẹ̌bawa borotẹ̌ těllum baụ dingangu l᷊ai sěngkataụ mẹ̌bẹ̌bawa kawihẹ̌ pisị lohong anggorẹ̌.

⁴I sire sarung mẹ̌gěllị u adatẹ̌ si kamene ringangu i kau sarung gěllirang u borotẹ̌ duam baụ kụ harusẹ̌be tarimạ u.

⁵Bọu ene i kau harusẹ̌ tamai sol᷊ong bongkon Duata su Gibea, tampạ u pẹ̌darasengang u tau Pilistin. Su tukadẹ̌ sasuěkang sol᷊ong soa, i kau sarung mẹ̌sombang dingangu ghapaěng u manga nabi rụděsung bọu wongkom pěnaněmbaěng. I sire měmpẹ̌sẹ̌sal᷊ai ringangu měmpẹ̌bẹ̌bansagẹ̌, měnẹ̌nalang u gambusẹ̌, arabanạ, suling dingangu kěcapi.

⁶Su tempo ene lai i kau sarung pẹ̌kawasaěng u Rohkẹ̌ u MAWU ringangu i kau e sarung tumol᷊e pẹ̌sasal᷊ai ringangu manga wansagi sire ene, bọu ene i kau e ghěllikang u lulu wuhu hakịu makoạ taumata naněntani.

⁷Kụ kereu kěbị ene e mariadi, pěmpẹ̌koạ e walạ e měnsang apa kụ piněndangengu e mapia, batụu Mawu e maněntanudẹ̌ si kau.

⁸Bọu ene i kau e harusẹ̌ tamai sol᷊ong Gilgal kụ pěngampal᷊ẹ̌ sene arěgang pitu ěllo. Iạ hědo ruměnta mẹ̌gěllị u sasěmba tinongkạ dingangu sasěmbang pẹ̌darame ringangu maul᷊ị u apang hinong koatengu waugi kamene.”

⁹Tawẹ kararẹ̌nane i Saul měněntang i Samuel, Saul něnarimạ u lulu wuhu wọu anun Duata. Dingangu kal᷊awọu apang nihabari Samuel si sie mal᷊aing nariadi su ěllo ěndaị ene.

¹⁰Piạ i Saul dingangu mẹ̌tatangkiange nahumpạ u Gibea, i sire nẹ̌sombang u ghapaěng u nabi. Su tempo ene lai i Saul pinẹ̌kawasaěngu Rohkẹ̌ u Mawu, kụ i sie tụtol᷊e manga sal᷊ai ringangu wansagu manga nabi e.

¹¹Taumata nạung masingkạ i sie nạung tempo tamai e, makạsilo lulune e, bọu e mẹ̌kẹ̌kakiwal᷊o sěmbaụ su wal᷊ine, ”Kai apạ e nariadi su anạ i Kish ene? Kai nakoạ nabi lai i Saul tangú?”

¹² Bọu e sěngkatau e nạung natanạ sene nakiwal᷊o, ”Kai kereapa ringangu manga nabi wal᷊ine ene — tumuhụ singkạ i kamene kai i sai tangú i amang i sire?” Kai ene tětạ u sasihing ini, ”Kai nakoạ nabi lai i Saul tangu?”

¹³Sarạeng i Saul něngědo nẹ̌sal᷊ai ringangu nẹ̌bansagẹ̌ e, simakạ e i sie sol᷊ong pěnaněmbaěng su wěntihe.

¹⁴Tuaring papạ i Saul nakasilo si sie ringangu mẹ̌tatangkiange, mase nakiwal᷊o si sire, ”Kai wọu apạ i kamene?” i Saul simimbang, ”Mẹ̌dẹ̌deạ kalide endai nailang e ringangu piạ e kinaẹ̌bakeng i kami tangú i kami nakoạ sol᷊ong anun Samuel.”

¹⁵”Kụ apạ e niwerane si kau?” kakiwal᷊ong tuaring papạ e.

¹⁶I Saul simimbang, ”I sie naul᷊ị u manga binatang ene seng nikareạ.” Arawe i Saul tawe nẹ̌běke su tuaring papạ e u i sie seng nihengkẹ pinakakoạ datu, kahian Samuel.

¹⁷Tangú i Samuel nẹ̌kui kawanuang Israel tadeạu apẹ̌komol᷊ẹ̌ su Mizpa,

¹⁸kụ i sie nẹ̌bera si sire, ”Seng ini e piněhengetangu MAWU, Ruatang Israel, ’Iạ e seng naněbang i kamene wọu Misirẹ̌ dingangu něliwiri kamene wọu kawasan tau Misirẹ̌ dingangu patikụ bansa kụ měmpělẹ̌linda si kamene.

¹⁹Iạ e seng něliwirʼi kamene wọu kal᷊awọu sunsara ringangu likibe, kaiso orasẹ̌ ini e i kamene seng něnuhudu Iạ, Duatanu, batụu i kamene e mědẹ̌dorong tadeạu Iạ e měněbọu sěngkatau ratu waugi kamene. Kụ, kerenẹ e, pẹ̌tampungke su těngo-Ku, MAWUnu, tuhụ ghal᷊ipoho ringangu walagu.’ ”

²⁰Bọu e i Samuel něngoro kěbị ghal᷊ipoho apědẹ̌deạ sarang horone ringangu ghal᷊ipohoʼm Benyamin kinapile.

²¹Ene piạ e manga walagẹ̌ su ral᷊ungu ghal᷊ipohong Benyamin ene nioro pědẹ̌deạ těngone, tangú walagʼi Matri e kinapile. Pěngěnsueěnge siměpụ e kal᷊awọu manga esẹ su ral᷊ungu walagʼi Matri,[24] ringangu i Saul anạ i Kish nạung kinapile. Bọu e i sire nẹ̌deạ si Saul, kaiso i sie e tawẹ dise.

²²Ual᷊ingu ene taumata e nakiwal᷊o su MAWU, ”O MAWU, měnsang tau ene e seng ene sini?” Sasimbangu MAWU, ”I Saul nẹ̌kěmbuni su l᷊ikudu manga apal᷊iwụ dariahi.”

²³Bọu e ringangu masahawụ i sire něněnsomahẹ̌ si Saul wọu ene, ringangu nẹ̌bawa si sie sutal᷊oarang kawanua. Tangú rimarisị e i Saul sutal᷊oaran sire, kụ seng i sie e karangetange; taumata wal᷊ine e kětạeng sarang pal᷊ukane.

²⁴Bọu e i Samuel nẹ̌bera su kawanua, ”U seng ini e taumata, kụ nipileng MAWU e tawẹ sihinge sutal᷊oarang kitẹ kěbị e.” Kal᷊awọu wansa ene e němpẹ̌gio, ”U wiahẹ̌ datu e!”

²⁵Bọu e i Samuel něnualagẹ̌ su wansa ene e mạanung buạ dingangu munaran datu, wọu e niwohẹ e su ral᷊ungu bukẹ̌ kụ niresọ e su tampạ kụ susi e. Bọu ene i Samuel něngoro kal᷊awọu wansa ene pakapul᷊ẹ sarang bal᷊en sěmbaụ-sěmbaụ e.

²⁶I Saul mal᷊aing napul᷊ẹ sarang bal᷊ene su Gibea, nitakinangu pirang katau kụ bawahani[25] kụ seng niapakanoạ naunge kahiang MAWU.

²⁷Kaiso taumata ral᷊akisẹ̌ pirang katau e němpẹ̌bera, ”Piạbe gunane suapa sarung taumata ini e waugʼi kitẹ?” I sire e tawe měndarekeng i Saul dingangu tawe mẹ̌gaghěllị u poroseěng si sie. Kaiso i sie měllewe wěga.