Read Sangir SAMUEL HUMOTONG 11 Bible Online

SAMUEL HUMOTONG 11 - Sangir bible

SAMUEL HUMOTONG 11

¹Bọu ene i Nahas, datung Amon, napasěbangu sordadone masene něliwung soang Yabesh su wanuang Gilead. Tumanạu Yabesh něnowang těgu kirini si Nahas, ”Koạko pẹ̌dariandi ringangi kami, tangú i kami e sarung mẹ̌samal᷊ẹ si kamene.”

²I Nahas simimbang, ”Asal᷊u piạ tandane kere ini e iạ mapulu mẹ̌taingu pẹ̌dariandi, ’Matang kamene koaneng e sěmbaụ-sěmbaụ takụ loekang kere lahinakang su kasěllahu Israel!’ ”

³Bọu e apam pangahạ u soang Yabesh němpẹ̌simbang, ”I kami e mẹ̌dorong tempo ghěnnangu pitu ěllo tadeạu i kami e makaringọben darolohang sarang kasěllahu ěntanang Israel. Kereu tawẹ apa kụ mapulu mẹ̌tul᷊ung i kami, tangú i kami e sarung měnarakang si kamene.”

⁴Kerene kakakoạ u manga rarolohang ene e sarang nahumpạ u Gibea, tampạ u katatanakeng i Saul. Piạ i sire naul᷊ị u habarẹ̌ ene, tangú němpẹ̌kiạ e kawanua ual᷊ingu kinahěpusangu ěnna.

⁵Su tempo ene i Saul buhụewe riměnta wọu lantange kụ nẹ̌bawa sapine. Ene i sie nakiwal᷊ọ e, ”Kai piạ a? Kawe unụe kěbị taumata e němpẹ̌kiạ?” Bọu e waugʼi sie nipaul᷊ikangu habarẹ̌ kụ nipaul᷊ị u rarolohang bọu Yabesh ene.

⁶Nakaringihẹ̌ ene e, i Saul pinẹ̌kawasaěngu Rohkẹ̌ u Mawu.

⁷Dingangu wawal᷊uange nahěmpal᷊iu i sie něngal᷊ạ sapi rarua bọu e nipẹ̌darurune nakoạ mal᷊awọ su rurune. Bọu ene sapi wọu pinẹ̌daruru ene e niringọ su kasěllahu ěntanang Israel, piạ laorone kere ini, ”I saing kụ tawe wahani mẹ̌sekẹ tumol᷊e si Saul rẹ̌duang Samuel, manga sapine sarung ipẹ̌papotọ lai kere ini!” Tau Israelẹ̌ e matakụ u apang kụ botonge koatengu MAWU, tangú kěbị taumata e tawẹ u tawe nẹ̌sasadia mẹ̌sekẹ sěngkapẹ̌sekẹ.

⁸I sire e nitampung dingangu nirekenang su Bezek: Tau Israel kal᷊awọe 300.000, ringangu tau Yehuda e 30.000.

⁹Samuring ene e waugu rarolohang bọu Yabesh nipaul᷊ikang kere ini: ”Paul᷊ịko su tumanạ u Yabesh, u riěllo mal᷊ukadẹ̌ e den ta nạěllo mal᷊ětu e, i sire sarung makaěbạ tul᷊umang.” Piạ e nạung tumanạ u Yabesh nakatarimạ u tatanata ini, apạ e mal᷊uasẹ̌ i sire e.

¹⁰Angkuěng i sire e si Nahas, ”U riěllo i kamene e sarung mẹ̌samal᷊ẹ, dingangu wotonge wue i kau mẹ̌koạ tuhụ kapulun naungu.”

¹¹Sěngkarịěllone mal᷊uka-l᷊ukadẹ̌, i Saul němahiạ taumatane nakoạ těllung kamonaěng. Kụ su tempong ěllo e mẹ̌běmbanaho i sire e něngalo sarang tal᷊oarang pẹ̌darasengangu tau Amon ene kụ něnekẹ si sire. Kal᷊amonang ěllo mal᷊ětu e, sordadon Saulẹ̌ e seng nakawatạ sekẹ. Tau Amon kụ nakakatal᷊ang e nẹ̌sal᷊iawuhẹ̌ hakịu tawẹ u pẹ̌tahạduang katau e makakatal᷊ang sěngkahindọ.

¹²Bọu ene nakiwal᷊ọ e tau Israelẹ̌ si Samuel, ”Kai suapa taumata nạung kal᷊imona e wahani makawera u i Saul tawe nihino makoạ datung kitẹ e? Hinong kawe i Amang měnarakang si kami e tadeạu pateěngkeng kami.”

¹³Arawe i Saulẹ̌ e nẹ̌bera, ”Manilaing sěngkatau kai tawe wotonge pateěng su sěhěllo ini batụu su sěhěllo ini e MAWU e seng něngambang Israel.”

¹⁴Mase nẹ̌berạ e i Samuel si sire, ”Bọete i kitẹ kěbị sarang Gilgal kụ deng mẹ̌sahiding Saulẹ̌ e mahengkẹ datung kitẹ.”

¹⁵Kerene i sire kěbị e nakoạ sarang Gilgal, dingangu su tampạ u pẹ̌kakal᷊iomanengang ene e, i Saul nihengkẹ nakoạ sěngkatau ratu. I sire něnarakangu sasěmbang pẹ̌darame, ringang i Saul ore lai kasěllahu tau Israelẹ̌ e měmẹ̌mantugu hal᷊ẹ̌ ene.