Read Sangir SAMUEL HUMOTONG 12 Bible Online

SAMUEL HUMOTONG 12 - Sangir bible

SAMUEL HUMOTONG 12

¹Mase nẹ̌berạ e i Samuel su kal᷊awọu tau Israel, ”Iạ e seng něngganapẹ̌ kal᷊awọu rorongu, ringangu něhengkẹ u sěngkatau ratu waugʼi kamene.

²Měnětạ bọu orasẹ̌ ini e seng i sie e makoạ pangahạ i kamene. Kakěllạ e, iạ ini e seng maghurang dingangu seng něngowang. Iạ e seng marěngụ kahěngang něngahạ si kamene — den dokeng su kangangudạku sarang orasẹ̌ ini. Karal᷊ahẹ e ute manga anạku e seng gaghuwạ ene.

³Seng orasẹ̌ ini e, iạ dumarisị su těngong kamene! Kereu iạ seng nẹ̌koạ pẹ̌sasal᷊a, ute ěnsilẹ e iạ su těngom MAWU ringangu su těngon datu kụ nipile-Ne. Iạ e wọu něngal᷊ạ sapi arau kaliden taumata wal᷊ine tangú? Arau wọu něngakal᷊ẹ̌, arau nẹ̌tahuěllang, arau něnarimạ sasorokẹ̌ tangú? Pẹ̌berạ e, tadeạu walạewe měnsang apa takụ al᷊akeng, botongewe takụ isul᷊e.”

⁴I sire ene němpẹ̌simbang, ”Tala, i Tuang tawe něngẹ̌ngakal᷊ẹ̌ arau nẹ̌tahuěllang i kami; i Tuang tawe něngẹ̌ngal᷊ạ manga apa tataghuaneng i sai-sai.”

⁵Mase nẹ̌berạ e i Samuel, ”Su ěllo ini e MAWU ringangu ratu kụ nipile-Ne nakoạ sahidi u iạ e nal᷊ahẹ u tawẹ sal᷊aku sarang kadidị-didị.” ”Mambeng kahěngang, MAWU e makoạ sahiding kitẹ,” sasimbang i sire.

⁶ Bọu e i Samuel nẹ̌bera kạpia, ”Seng MAWU e němile si Musa ringangi Harun, kụ němpěněbangu manga i upung i kamene e wọu Misirẹ̌.

⁷Kụ ini e, abeko tamai kal᷊imona. Iạ e hědong měngěnsilẹ̌ si kamene su těngoʼm MAWU. Tahěndungeko[26] patikụ karal᷊ondong MAWU kụ seng nilahẹʼE si kamene, ringangu su manga i upungu.

⁸ Piạ e i Yakub dingangu walage nahunděnta sarang Misirẹ̌ e, dingangu tau Misirẹ̌ e mẹ̌tahuěllang i sire,[27] i upungu e mẹ̌gẹ̌gausẹ̌ tul᷊umang bọu MAWU, mase MAWU e něndolohʼi Musa rẹ̌duang Harun. I rẹ̌dua ene e němpaněbang u manga i upungu e wọu Misirẹ̌ dingangu nẹ̌tul᷊ung i sire e něngindunụ su wanua ini.

⁹ Kaiso wọu ene i sire e niwul᷊eng MAWU, Ruatan sire, ual᷊ingu ene i Sie napakawalan sire e nialoěng dingangu kinawatạ i Sisera, mol᷊ensekẹ u sordado su Hazor, dingangu kahian tau Pilistin ore lai ratung Moab.

¹⁰ Bọu ene i sire nẹ̌kal᷊iomaneng su MAWU ringangu něngakung dosan sire; angkuěng i sire, ’I kami e seng nẹ̌dosa ual᷊ingu nẹ̌bihu wọu anu-Nu, o MAWU, ringangu něněmbako manga tul᷊adang mahan duata i Baal dingangi Asytoret. Arawe orasẹ̌ ini e, ambangeko i kami e wọu manga sědụ i kami e, tangú i kami e sarung mẹ̌tahamawu si Kau!’

¹¹ Bọu ene MAWU e něndolohʼi Gideon, mase i Barak,[28] bọu ene i Yefta, kụ pěngěnsueěnge iạ. I kami e sěngkatau-sěngkatau seng napakal᷊iwirʼi kamene wọu sekẹ i kamene, hakịu i kamene nakapẹ̌biahẹ̌be ringangu tawẹ konsange.

¹² Kaiso su tempong i kamene nakasilo u i kamene sarung aloěng i Nahas datung Amon, i kamene e tawe měnarimạ u MAWU tabidạu ratung kamene ringangu mẹ̌bera si siạ, ’I kami e mapulu parentaěngu sěngkatau ratu.’ ”

¹³”Ini e, kakěllạe, seng ini e i sie, datu nạung nipileng kamene ene. I kamene seng nẹ̌dorong ene, ringangu MAWU e seng něngonggọu ene si kamene.

¹⁴Kariangkamang i kamene kereu i kamene měngadatẹ̌ MAWU ringangu mẹ̌tahamawu si Sie, ore lai rumaringihẹ̌ mase tumuhụ tita-Ne, něngalembọ e lai kereu i kamene ringangu ratunu e těbewe satia su MAWU Ruatanu.

¹⁵Su sěmběkane, kereu i kamene tawe rumaringihẹ̌ MAWU, katewe mundangu lumewang tita-Ne, nal᷊ahẹ u i kamene ringangu ratunu e[29] sarung dokateng u MAWU.

¹⁶Ini e, raringihẹ̌ko lai! Tatinganeko karal᷊inạu masaria e sarung koateng u MAWU su těngong matanu.

¹⁷Iạ e sarung kumahiorọ su MAWU, ringangu manilaing orasẹ̌ ini e musungu měhangu kai MAWU e sarung mapal᷊intụ u rěllụ dingangu tahiti kere sasimbahu kakal᷊iomanengku. Su tempo ene, i kamene sarung makahěngang u apạe kasariane rosanu e su MAWU ual᷊ingu mẹ̌gẹ̌gausẹ̌ sěngkatau ratu.”

¹⁸Mase nẹ̌kal᷊iomanengke i Samuel, dingangu su ěllo ini e lai MAWU maparěntan děllụ dingangu tahiti. Kal᷊awọu wansa ene něngkatakụ su MAWU ringangu si Samuel.

¹⁹Bọu e nẹ̌berạ e i sire si Samuel, ”Tul᷊ungko, Amang, pẹ̌kal᷊iomanengko waugʼi kami ini e su MAWU Ruatanu, tadeạu i kami e kumbahangbe mate. Orasẹ̌ ini e i kami nakahěngangke, u sul᷊iun dosang kami kal᷊imona e, i kami e selaing nẹ̌dosa ual᷊ingu mẹ̌dẹ̌dorong sěngkatau ratu.”

²⁰I Samuelẹ̌ e mal᷊aing simimbang, ”U kumbahang matakụ, manilaing i kamene e seng nẹ̌koạ karal᷊akisẹ̌ ene, kumbahangbe mẹ̌bihu wọu anung MAWU, kaiso pakatatapẹ̌ko mẹ̌tahamawu si Sie ringangu kạguwạu naungu.

²¹Kumbahangbe tumol᷊e manga mahan duata kụ tawe makatul᷊ung dingangu tawe makasal᷊amatẹ̌ si kamene, ual᷊ingu i sire tuhụ hinone tawẹ apa.

²²MAWU e seng nẹ̌salu, u i Sie sen tawe sarung měněntang i kamene ual᷊ingu i Sie e seng němutusu waugu mapakariading kamene umatʼE hala e.

²³Mạanung batangengku, mal᷊owọko iạ e kumbahangbe sarang mẹ̌dosa su MAWU ual᷊ingu tawe nẹ̌kal᷊iomaneng i kamene. Su sěmběkane iạ e mal᷊aing sarung tiniạ maněntiro si kamene kal᷊awọu apang mapia ringangu těngadẹ̌.

²⁴Pěngadatẹ̌ko MAWU dingangu pẹ̌tahamawu si Sie pakasatia ringangu kạguwạu ral᷊ungu naungu. Pẹ̌tahěndungko manga kakanoạ gaghaghuwạ kụ seng kinoạʼE waugʼi kamene.

²⁵Arawe kamagengu i kamene e tiniạ lai mẹ̌kẹ̌koạ dosa e, tangú i kamene ringangu ratung kamene e sarung mawinasa.”