Read Sangir SAMUEL HUMOTONG 13 Bible Online

SAMUEL HUMOTONG 13 - Sangir bible

SAMUEL HUMOTONG 13

¹Piạ su sěhěllo, su tempong i Saul seng nakoạ datu,[30]

²i sie němile těllu hiwu su kataune tau Israel; bọu ene dua hiwu su kataune mạtanạ dingange su Mikhmas dingangu su wanua su wawul᷊urangu Betel, arawe sěhiwu e lai ute nakoạ dingang i Yonatan ahuse sarang Gibea su wanuang ghal᷊ipohong Benyamin. Lěmbene wọu kawanua ene pinakawala napul᷊ẹ sarang bal᷊en sire sěngkatau-sěngkatau.

³Bọu ene i Yonatan němate mol᷊ensekẹ u Pilistin[31] kụ su Geba, kụ tau Pilistin nakaringihẹ̌ karariading hal᷊ẹ̌ ene. Bọu e i Saul něngoro nipěniụ slompretẹ̌ su kạguwạu wanua mědeạu pẹ̌kui tau Ibrani mědeạu tamai pẹ̌sekẹ.

⁴Baugu kal᷊awọu tau Israel nipaul᷊ikangu i Saul seng němate mol᷊ensekẹ u Pilistin ene, ringangu lulun tau Pilistin ene e kai tumanịu wěnsingang su tau Israel. Ual᷊ingu ene kawanua e matuhụ su kakui waugu mẹ̌tatamba ringang i Saul su Gilgal.

⁵Těntal᷊ang ene tau Pilistin seng nẹ̌tampung lai waugu měnekẹ tau Israel; si sire piạ 30.000[32] karetan sekẹ, ěnnung u hiwu taumata mạhunsake kawal᷊o, dingangu manga tahapẹ̌sekẹ e kal᷊awọe kere ěnne su apeng. I sire němpẹ̌daseng su Mikhmas su sěmběkan dakị wọu Bet-Awen.

⁶Bọu ene i sire e naparal᷊engu pěngangalo marehe waugu tau Israel, hakịu tau Israel mambeng su ral᷊ungu kakakoạ e makạtatakụ. Pirang katau wọu tau Israel kụ mẹ̌kẹ̌kěmbuni su ral᷊ungu liang dingangu lohange kadodọ su wul᷊ude arau su ral᷊ungu manga wěllạ u himang, arau su ral᷊ungu sumu ringangu lohange su ěntana,

⁷piạ u l᷊ai lụl᷊iu Sal᷊ụ u Yordan dingangu masuẹ̌ su wanuang Gad dingangu Gilead. I Saul bědang su Gilgal, dingangu kawanua apang mạhuntol᷊e si sie mạhungkenden takụ.

⁸ I Saul měngẹ̌ngampal᷊ẹ̌ si Samuel pitu ěllo karěngụ e, natuhụewe kere su tatanatang Samuel si sie, arawe i Samuel bědang tawe lai nahumpạ u Gilgal, arawe i Saul nanětạ e nitěntangu kawanua e.

⁹Ual᷊ingu ene i sie nẹ̌bera si sire, ”Bawako ramahi sasěmba tẹ̌tutungang dingangu sasěmbang pẹ̌darame ene.” Bọu e i sie sẹ̌sane mạněmbang sasěmba tẹ̌tutungang ene.

¹⁰Kaiso wuhụewe lai i sie nasueng koạ e, narěntạ e i Samuel. I Saul něněnsomahẹ̌ si sie kụ mapulu mẹ̌gěllịu adatẹ̌;

¹¹kaiso i Samuelẹ̌ e nakiwal᷊o, ”Kai apạe seng nịkakoạ u mawu ratu?” Sasimbangi Saul, ”Iạ e nakasilo u kawanua e nanětạ e něněntangu iạ, arawe mawu ratu e tawe riměnta su tempo kụ seng nipoěng i tuang. Kutẹu l᷊ai, tau Pilistin seng nẹ̌tampung su Mikhmas.

¹²Mase su tiněnnaku e, kibasịu sordadong Pilistin tawẹ kararěnane lai měngalo si siạ sini su Gilgal, sumbal᷊iau iạ e wědang tawe nẹ̌gẹ̌gausẹ̌ tatal᷊ěntụu MAWU. Ual᷊ingu ene iạ e měngal᷊ạ e putusangu waugu mẹ̌gěllịu sasěmba ene.”

¹³Nakaringihẹ̌ ene e i Samuel nẹ̌bera si Saul, ”Kakanoạ u mawu ratu ene e apạe kal᷊ongonge. Manga andene mawu ratu e rụdaringihẹ̌ titaʼm MAWU Ruata e si tuang, nal᷊ahẹ u MAWU e sarung mapakatatapu mawu ratu e ringangu hitene makoạ datu waugu Israel sarang marěngụ-děngụ.

¹⁴ Arawe orasẹ̌ ini e pẹ̌paparentaʼm mawu ratu e sarung tawe marehọ. Ual᷊ingu mawu ratu e tawe tumatuhụ titaʼm MAWU e, tangú MAWU e seng němile taumata wal᷊ine kụ ikẹ̌kapulu-Ne mědeạu hengketang makoạ datu waugu umatʼE.”

¹⁵Bọu ene i Samuel něněntangu Gilgal dingangu něněpasu raral᷊enge sarang Gibea su wanuang Benyamin. Těntal᷊ang ene i Saul němarikẹ̌sa wuntuange, kal᷊awọe manga 600 su kataune.

¹⁶Kerene i Saul dẹ̌duang Yonatan ahuse, ringangu taumatan sire e nẹ̌daseng su Geba su wanuan Benyamin; těntal᷊ang tau Pilistin e nẹ̌daseng su Mikhmas.

¹⁷Su tempo ene lai těllung kamonaěng tahapěhampasu Pilistin nẹ̌buạ bọu pẹ̌darasengangu Pilistin mědeạu měmpẹ̌hampasẹ̌: kamonaěnge sěmbaụ dimal᷊eng nẹ̌timona sarang Ofra su wanuang Syual,

¹⁸kamonaěnge karuane mẹ̌tẹ̌timona Bet-Horon dingangu kamonaěnge lai sěmbaụ e mẹ̌tẹ̌timona sarang pẹ̌saraěng kụ tụtatěngo Wal᷊an Zeboim dingangu wanua l᷊inggi.

¹⁹Su kasěllahu Israelẹ̌ e tawẹ apa kipung, batụu tau Pilistin e tawe němalan tau Ibrani e něněsal᷊ẹ̌ peda ringangu kal᷊aị.

²⁰Kụ tau Israelẹ̌ e harusẹ̌be tamai sarang anun tau Pilistin kereu hinong měngasa horong bajake, pacole, wal᷊iunge ringangu sanggute;[33]

²¹sewane ute roitẹ̌ loborẹ̌ sěngkal᷊ěpa baugu měngasa wal᷊iung dingangu měngul᷊ị papatakụ sapi,[34] ringangu roitẹ̌ loborẹ̌ duang kal᷊ěpa ipěngasa horoʼm bajakẹ̌ arau pacolẹ̌.

²²Kai ual᷊ingu ene, hakịu su ěllong pẹ̌seketang su Mikhmas ene, tawẹu sarang sěngkatau wọu kawanuang Israel kụ piạ pedane arau kal᷊aị e, su l᷊iung Saul dẹ̌duang Yonatan ahuse.

²³Tau Pilistin něměllọu suěngu pěndal᷊ukadeng baugu mẹ̌tahutěndạ u kěllẹ u wul᷊ude sěmbaụ su Mikhmas.