Read Sangir SAMUEL HUMOTONG 14 Bible Online

SAMUEL HUMOTONG 14 - Sangir bible

SAMUEL HUMOTONG 14

¹Piạ sěnsul᷊ẹ tempo i Yonatan nẹ̌bera su manga kal᷊endesang mẹ̌bawawa aghide, ”Hotede, tamaị e sarang pěmamuěngangu tau Pilistin su sěmběkane pai!” Arawe i sie tawe mẹ̌dorong si amange.

²Su tempo ene i Saul kai nạung ene su al᷊ungu kalun delima su Migron, tawẹ kararaune wọu Gibea. Kawanua kụ tumatol᷊ene piạ u manga ěnnungu hasụ su kataune kal᷊awọe.

³(Imang kụ nẹ̌bawa efod ute kai i Ahiya anạ i Ahitub, kụ kai anạu sěngkataung Ikabod anạ i Pinehas, dingangu i Pinehas anạ i Eli, imangu MAWU su Silo.) Kawanua mal᷊aim běgang Yonatan kawe seng dimal᷊eng bọu tampạ ene.

⁴Mědeạu makaratingu pěmamuěngangu tau Pilistin ene, i Yonatan harusẹ̌ lumiung lěsabu wul᷊ude kụ pẹ̌tẹ̌tal᷊oaraěngu himang darua piạ manga sowenge, kụ sěmbaụ-sěmbaụ e piạ arenge Bozes dingangu Sene.

⁵Himang kụ su sěmběkan sawěnahẹ̌ e tụtatěngo sarang Mikhmas, dingangu apang su sěmběkan timuhẹ̌ e tụtatěngo Geba.

⁶Tangú nẹ̌berạe i Yonatan su kal᷊endesang ene, ”Bọete i kitẹ makoạ sarang pěmamuěngangu tau Pilistin kụ kapirẹ̌ ene. Aramanung MAWU mapulu mẹ̌tul᷊ung i kitẹ. Batụu MAWU e makaonggọu kal᷊auntu, baewe ringangu taumata l᷊awọ arau lai taumata mahal᷊i.”

⁷Kal᷊endesang ene e simimbang, ”Balạewe měnsang apa koateng i Tuang,[35] ěllangu e mal᷊uasẹ̌.”

⁸”Kerenẹ e,” angkuěng i Yonatan. ”Su tempong lumiu, i kitẹ e hědong mapakatodẹ u watangeng su tau Pilistin ene.

⁹Mạengu i sire e měndolohʼi kitẹ pěngěndung dingangu pěngampal᷊ẹ̌ sarang i sire e marěnta su anung kitẹ e, tangú i kitẹ sarung těbe mạtanạ sene kụ tawahal᷊uasu tamai lumiu.

¹⁰Kaiso kamagengu i sire e měndolohʼi kitẹ e aparěnta su anun sire, i kitẹ e matamai, u kai ene tatialane i sire e seng nisarakang u MAWU e si kitẹ.”

¹¹Piạ i rẹ̌dua e napasilom batangeng su tau Pilistin su suěngu pěndal᷊ukadeng ene, nẹ̌berạe tau Pilistin ene, ”Kakěllạ e piạ tau Ibrani nasěbang bọu manga lohange tampạ u pẹ̌kakěmbuniang i sire e!”

¹²Bọu ene i sire e nẹ̌kuị e si Yonatan dingangu ěllange, ”Awị e ramahi tadeạu i kami e mapasilong[36] hal᷊ẹ̌ sěmbaụ si kamene!” Bọu e nẹ̌berạ e i Yonatan su kal᷊endesang ene, ”Tol᷊eko si siạ, batụu i sire seng nisarakangu MAWU su Israel.”

¹³Ual᷊ingu tẹ̌tol᷊eěngu kal᷊endesang ene e i Yonatan taraị nẹ̌bakengkang. Su tempong i Yonatan nasěpụ, nẹ̌tatal᷊ětuhe tau Pilistin měngkanawo ual᷊ingu kẹ̌kokaěnge, arawe su l᷊ikude, kal᷊endesang ene e němate si sire.

¹⁴Su pěngangalo humotong ene e, i Yonatan dingangu kal᷊endesang ene němate manga ruam pul᷊o su kataune su wanua sariane sěngkapahiạ ěpạ su hektarẹ̌ e.[37]

¹⁵Hal᷊ẹ̌ ene nakapẹ̌gẹ̌gahẹ̌ tau Pilistin su pẹ̌darasengang dingangu su manga wimbaenge. Kal᷊awọu kawanuang Pilistin dingangu manga selong pěndal᷊ukadeng dingangu manga wuntuangu mělahampasẹ̌ e něngkatakụ; saral᷊aing banua e ghimanuẹ̌ kụ nariadị e wansagẹ̌ marehe.

¹⁶Těntal᷊ang ene e sordadon Saul kụ mẹ̌dẹ̌dariagạ su Gibea su wanuam Benyamin, nakasilo tau Pilistin měmpahuntal᷊ang tamai-ramahi kụ měngkate apa itẹ̌tal᷊abingọ e.

¹⁷Tangú nẹ̌berạ e i Saul su manga taumatane, ”Dekeneko apan tahapẹ̌sekẹ e kụ titikeko měnsang i sai tawẹdise.” I sire něndal᷊engu parenta ene kụ kinasingkatengke naung i Yonatan dingangu kal᷊endesang nạung mẹ̌bẹ̌bawa aghide e tawẹ dise.

¹⁸”Bawako efod[38] ene ramahi,” angkuěng i Saul su manga Imang i Ahia. (Su ěllo ene i Ahia nẹ̌bawa efod ene su těngon tau Israel.)[39]

¹⁹Piạ i Saul kapẹ̌bẹ̌bisarane ringangu imang ene, nẹ̌ganohạ su pẹ̌darasengangu tau Pilistin mangkeng kạtambane, hakịu i Saul nẹ̌bera su manga imang ene, ”I kitẹ e sen tawe nakareạ loahe lai waugu mẹ̌dorong sasal᷊ěntihọ bọu MAWU!”

²⁰Mase i Saul dingangu taumatane sěngkatiol᷊ẹ̌ sarang tampạ u pẹ̌seketang. Sene i sire nakasilo piạ pẹ̌kakarasẹ̌ sutal᷊oaran tau Pilistin mẹ̌pẹ̌papangalo sěmbaụ su wal᷊ine dingangu mẹ̌pẹ̌papate.

²¹Apan tau Ibrani kụ matanạ su wanuan tau Pilistin, dingangu apang kụ seng timol᷊e ringangu sordadon sire e němal᷊ị u mona[40] kụ nẹ̌tatamba ringangi Saul dẹ̌duang Yonatan.

²²Kerene lai tau Israel kụ mẹ̌kẹ̌kěmbuni su manga wongkong Efraim, apang kụ nakaringihẹ̌ u tau Pilistin e seng timal᷊ang, mal᷊aing timol᷊e ringangu něngalo tau Pilistin ene.

²³I sire e němpẹ̌sekẹ kanandun dal᷊eng sarang nasaheng Bet-Awen, MAWU e napakasal᷊amatu Israel su tempo ene.

²⁴Su ěllo ene tau Israel su karal᷊omene ual᷊ingu lunusẹ̌, batụu i Saul seng nẹ̌salu kere ini, ”Kai pisị taumata kụ kụkaěng apa-apa su ěllo ini kal᷊imonang iạ e měmal᷊isẹ̌ une su manga sedụku.” Ual᷊ingu ene tawẹ u sarang sěngkatau kụ kụkaěng kanandung ěllo ene.

²⁵Bọu ene nahumpạ e i sire kěbị[41] su kěhu sěmbaụ kụ nakaěbạ madu mal᷊awọ-l᷊awọ,

²⁶kai tawẹu sarang sěngkatau kụ kimaěng manga apa wọu madu ene, watụ u mạtakụ u kahinoěngu laane kụ ipẹ̌beran Saul.

²⁷Kaiso i Yonatan běga wue u i amange seng němatakụ kawanua ringangu laane ene; ual᷊ingu ene niul᷊uhe těking kụ niwawane, mase nipěntạ e su ral᷊ungu sal᷊ehu madu kụ nial᷊ạ e madu ene ringangu nikaěnge. Apidu i sie nakapěndang mapia wadange ringangu sahuneng natoghasẹ̌.

²⁸Bọu e sěngkatau wọu tahapẹ̌sekẹ ene nẹ̌bera si sie, ”I kami kěbị tawe makakoạ manga apa ual᷊ingu lunusẹ̌. Kaiso i amang i Tuang seng němatakụ si kami piạ salune angkuěnge, ’Kai wontogẹ̌ su taumata apang kimaěng su sěhěllo ini.’ ”

²⁹I Yonatan simimbang, ”Kai seng nahěmpal᷊iu pẹ̌kakoạ i amangku ene miěbạ kawanuang kitẹ e! Kakěllạ e, kakakoạku orasẹ̌ ini limembong kapiane marau sarětạeng iạ bọu kimaěng madu kadodọ e.

³⁰Manga andene kawanua e sěhěllo ini ipakawala kumaěng kaěng kụ nipul᷊ahone su piạ nakawatạ dokạ, nal᷊ahẹu limembong kal᷊awọe tau Pilistin botonge ikapateng kitẹ e!”

³¹Su ěllo ene tau Israelẹ̌ e němatạ tau Pilistin sarangke nẹ̌sekẹ kanandung dal᷊eng bọu Mikhmas sarang Ayalon. Katewe nal᷊iu wọu ene i sire e enẹ e něngkal᷊ome,

³²hakịu i sire e němpẹ̌mul᷊aho něngal᷊ạ apal᷊iwụ pul᷊aho kụ kinaěbakeng i sire e wọu rokạ; i sire němpěngal᷊ạ domba ringangu sapi wọu e němpěmotọ su tampạ ene lai, ringangu apidu kiminạ gěsi kụ bědang piạ dahane.

³³ Mase nihabarẹ̌ si Saul kere ini, ”Tuang, kawanua seng nẹ̌dosa su těngom MAWU, ual᷊ingu kiminạ gěsi ringangu rahane.” ”I kamene tahakontiang!” angkuěng i Saul. ”Pělunggiko watu gẹ̌guwạ sěmbaụ damahi.”[42]

³⁴Saụ kapia angkuěnge lai si sire apang nẹ̌bawa habarẹ̌ ene, ”Pěmpẹ̌kaesẹ̌ko i kamene sutal᷊oarang kawanua ringangu oroiko i sire pẹ̌bawa sapi ringangu dombane ramahi, tadeạu potokang su wowom batu ini ringangu kinaseng sini; kụ ual᷊ingu kere ini tangú i sire tawe kuminạ gěsi ringangu rahane ringangu tawe lai nẹ̌dosa su těngon MAWU.” Hěbi ene e lai kal᷊awọu kawanua e němpẹ̌bawa binatang i sire hampasẹ̌ e ringangu němpěmotọ sene.

³⁵Bọu e i Saul něndarisị u pananěmbaěng baugu MAWU; kụ kai ene e pananěmbaěng nirarisị e kakal᷊imonaěnge.

³⁶Bọu ene nẹ̌berạ e i Saul su apan taumatane, ”Ěndaị e i kitẹ měnekẹ tau Pilistin su hěbi ini wọu ene měhampasẹ̌ si sire sarang mal᷊ukadẹ̌ dingangu měmate si sire kěbị.” I sire simimbahẹ̌, ”Kerenẹ e Tuan Datu! koạ e apang mapia su pandaěng i Tuang.” Kaiso imang e nẹ̌bera, ”Mahiko i kitẹ deng mẹ̌dorong sasal᷊ěntihọ bọu anum Mawu Ruata kal᷊imona.”

³⁷Mase nakiwal᷊ọ e i Saul su Ruata, ”Botonge iạ měnekẹ tau Pilistin? Kụ isarakangʼU e i sire su tau Israel?” Kai su ěllo ene e Mawu Ruata e tawe simimbahẹ̌.

³⁸Ual᷊ingu ene nẹ̌berạ e i Saul su apang pangahạ u kawanua, ”Mahịe sarang ini kěbị dingangu parikẹ̌saiko kai rosạ e apa kụ seng nikakoạ su ěllo ini.

³⁹Iạ e mẹ̌diandi su arengu MAWU kụ biahẹ̌ e, kụ apan seng něngonggọu kal᷊auntu su Israel, u taumata kụ piạ sal᷊ane sarung ihukung pateěng, manilaing i sie kai i Yonatan ahusẹ̌ku.” Kai tawẹ u sarang sěngkatau e wahani sumimbahẹ̌.

⁴⁰Bọu ene nẹ̌berạ e i Saul su patikụ kawanuang Israel, ”I kamene kěbị e rimarisị su sěmběka sini.” Sasimbangi sire, ”Pẹ̌koạ e i Tuang apang kụ tiněnnan Tuange mapia.”

⁴¹ Bọu ene nẹ̌kal᷊iomanengke i Saul, ”MAWU, Ruatang Israel, unụe sěhěllo ini i Kau e tawe simimbang si siạ? MAWU, simbaheko iạ wọu manga watu kụ susi ini e. Kereu pẹ̌sasal᷊a ene e, ene si siạ arau si Yonatan, ute simbaheko ringangu watung Urim, kaiso kamagengu pẹ̌sasal᷊a ene e kawe su umatʼU Israel,[43] ute simbahẹeng batụn Tumim.”[44] Tangú sasimbahu MAWU e něněbọ si Yonatan dẹ̌duang Saul; kụ mạeng kerene ute kawanua e nal᷊ahẹ e tawẹ sal᷊ane.

⁴²Bọu e nẹ̌berạ e i Saul, ”O MAWU, pěnantuko wọu tal᷊oarang iạ dingang i Yonatan.” Tangú i Yonatan ute nilahẹ u nẹ̌sal᷊a.

⁴³Bọu ene angkuěng i Saul si Yonatan, ”Kai a nikakoạ u?” I Yonatan simimbang, ”Iạ kai seng kimaěng kadodọ madu kụ takụ nial᷊ạ u kotọ u těkingku; iạ e sadia waugu mate.”

⁴⁴Tangú angkuěng i Saul si sie, ”Mal᷊owọko iạ e ihukungu Ruata, kereu i kau e tawe ihukungu papate, Yonatan!”

⁴⁵Kutẹu kawanua e nẹ̌bera si Saul, ”Kai harusẹ̌ ihukungu papate i Yonatan tangú? Sumbal᷊iau kawe i sie nakawawa sarang kal᷊auntu masaria ini e? Tala! I kami e mẹ̌diandi kụ su arengu MAWU kụ biahẹ̌, u i Yonatan tawe wotonge kailangengu utạ sarang sěmbua wọu těmbọ e. Kai ual᷊ingu tul᷊umangu MAWU e, i sie seng nakahombang kal᷊auntu su sěhěllo ini.” Kerene i Yonatan niambangengu kawanua e wọu hukumangu papate.

⁴⁶Bọu ene tau Pilistin nẹ̌sul᷊e sarang banuan sire hala ual᷊ingu i Saul tawe něnahusu si sire kapia.

⁴⁷Sarangke i Saul naratụ e su Israel, i sie nẹ̌sekẹ suapan tampạ dimokạ kal᷊awọu sědụu Israel kụ kai tau Moab, tau Amon, dingangu tau Edom, mararatum banuan Zoba, ringangu tau Pilistin. Suapạeweng i sie mẹ̌paraěng, tiniạ i sie mang makawatạ.[45]

⁴⁸I sie nẹ̌sekẹ piạ bahanine ringangu němatạ tau Amalek, dingangu něliwiru tau Israel bọu kawasang taha pul᷊aho.

⁴⁹Manga ahusʼi Saul ute i Yonatan, Yiswi, dingangi Malkisua. Arawe sangiange kaiakanenge arenge i Merab, dingangu karuane tangú i Mikhal.

⁵⁰Bokine isẹ̌sẹ̌bạ si Ahinoam, anạ i Ahimaas; mol᷊ensekẹ e ute i Abner anạ i Ner, kụ kai i empong i Saul.

⁵¹I Kish i amang i Saul, dingangi Ner i amang i Abner, ute kai manga anạ i Abiel.

⁵²Karěngụ u pẹ̌bawiahe i Saul hanesẹ̌ mẹ̌sẹ̌sekẹ marasai rụdokạ tau Pilistin. Ual᷊ingu ene, kereu i Saul makasilo taumata kụ matoghasẹ̌ arau wahani, i sie apidu mapakariadi makoạ dal᷊ohong sordadone.