Read Sangir SAMUEL HUMOTONG 15 Bible Online

SAMUEL HUMOTONG 15 - Sangir bible

SAMUEL HUMOTONG 15

¹ Piạ sěhěllo i Samuel nẹ̌bera si Saul, ”Seng MAWU e něngoro si siạ něhengkẹ i Tuang nakoạ datu su Israel umatʼE. Ual᷊ingu ene, kěnangko i Tuan Datu raringihẹ̌ parentaʼm MAWU Kụ Limembong Kawasa.

² I Sie sarung měhukung tau Amalek, ual᷊ingu i upung i sire e rụdokạ tau Israel piạ tau Israel nasongo wọu Misirẹ̌.

³Kụ, dakọ e ringangu seketẹ e tau Amalek dingangu gagholọ e kal᷊awọu tataghuaneng i sire. Abe těntang kal᷊awọu manga apa; patẹ e kěbị apang manga esẹ, manga wawine, manga rariọ dingangu manga rariọ dararodọ; manga lai sapi, domba, onta, ringangu kalide.”

⁴Mase i Saul něndiahing sordadone kụ nirekenange su Telaim; ute rua hasụ su hiwune su kataune tahapẹ̌sekẹ bọu Israel dingangu mapul᷊o hiwu su kataune wọu Yehuda.

⁵Bọu ene rimal᷊engke i Saul dingangu manga taumatane sarang soang Amalek kụ něhěgạ dokạ su wal᷊an sal᷊ụ mamara.

⁶I sie mal᷊aing něndingọ u tatanata, tatumbal᷊ung baugu tau Keni angkuěnge, ”Dakọ e kụ těntangko tau Amalek, tadeạu i kamene kumbahangbe takụ ěnsueěng dingang i sire, u kal᷊imona manga i upungu seng něnodẹ u lulung pẹ̌dal᷊ahapị u tau Israel piạ tau Israel simongo wọu Misirẹ̌.” Tangú něngal᷊ingke tau Keni wọu ene.

⁷Bọu ene i Saul nẹ̌sekẹ u tau Amalek, dingangu němatạ i sire kanandung dal᷊eng bọu Hawila sarang Syur su sěmběkan dakị wọu Misirẹ̌.

⁸Kal᷊awọu kawanua ringangu sordadong Amalek nipaten Saul. Arawe i Agag datun tau Amalek nisamẹ kụ niwala wiahẹ̌ kahiang Saul dingangu sordadone, kerene lai domba ringangu sapi kụ kapiaěnge, anạ u sapi arau lai anạ u domba katawaěnge,[46] ringangu kal᷊awọu sạbarang kụ mal᷊aarěga; kětạembeng binatang kụ tawẹ gunane ringangu tawẹ arěgane[47] samatang nipakawinasa.

¹⁰Mase něhengetangke MAWU si Samuel,

¹¹”Iạ e nẹ̌sasěsilẹ̌ kụ seng něhengkẹ i Saul nakoạ datu, u i sie seng timal᷊ikudẹ̌ si Siạ, kụ tawe nẹ̌koạ parenta-Ku.” I Samuelẹ̌ e masusa naunge, kụ kanandung hěbi e i sie rụdal᷊umpasiang su MAWU.

¹²Sěngkarịěllone mal᷊uka-l᷊ukadẹ̌, i Samuel nẹ̌buạ mẹ̌sombang i Saul. Si sie nipaul᷊ikangu i Saul seng nakoạ sarang soang Karmel baugu měndarisị u watu tatahěndungang baugu watangenge paị sene, mase natěpasu Gilgal.

¹³Piạ i Samuel nẹ̌sombang i Saul, nẹ̌berạe i Saul si sie, ”Mal᷊owọko MAWU e měngal᷊amatẹ̌ si Tuang! Iạ e seng něndal᷊engu titam MAWU.”

¹⁴Arawe i Samuel nakiwal᷊o, ”Mạeng kerene unụe takụ kinaringihẹ̌ sapi e mẹ̌munggal᷊ọ dingangu domba e lụěmbẹ?”

¹⁵Sasimbangi Saul, ”Manga binatang ene e nihampasẹ̌ bọu tau Amalek. Domba ringangu sapi kapiaěnge seng nial᷊ạ bọu kawanua mědeạu isěmba kere ghaghěllị su MAWU Ruatanu. Arawe lembone ute seng niwinasang kami pakaupu.”[48]

¹⁶Nakaringihẹ̌ ene, i Samuel nẹ̌bera, ”Pěngampal᷊ẹ̌ko kadodọ, iạ sarung měhabaru apa nipěhengetangu Ruata si siạ mẹ̌kalaeng ene.” ”Pẹ̌berako,” angkuěng i Saul.

¹⁷I Samuel nẹ̌bera, ”Kai wal᷊inewe i Tuang seng nakoạ měngangahạ u manga ghal᷊ipohong Israel, maningbe i Tuang měngẹ̌ngěnna batangenge u tawẹ mangal᷊ene? I Tuang kai seng nipileng MAWU makoạ datun tau Israel,

¹⁸kutẹu l᷊ai i Tuang nirolohu MAWU mapakawinasan tau Amalek kụ dal᷊akisẹ̌ ene. I Tuang datu e niorone pinẹ̌sekẹ dimokạ si sire sarang i sire e nasue kěbị.

¹⁹Unụe i Tuang tawe rimaringihẹ̌ parentam MAWU? Unụe i Tuang němpẹ̌gihingang něngal᷊ạ apal᷊iwụ pul᷊aho, kụ dingangu kerene tangú i Tuang e nakakewạ naungu MAWU?”

²⁰I Saul simimbang, ”Iạ seng timuhụ titam MAWU, ringangu tamai nẹ̌sekẹ natuhụewe su laoro-Ne si siạ; i Agag datung Amalek takụ nitaweng dingangu kěbị tau Amalek seng takụ nipate.

²¹Arawe taumataku e tawe němate kal᷊awọu binatang; i sire seng němile domba ringangu sapi kapiaěnge wọu lětạ u pul᷊aho e waugu isěmba su Gilgal kere ghaghěllị su MAWU Ruatanu.”

²²Arawe i Samuel nẹ̌bera, ”Sudẹ e něngalembong ikẹ̌kapulu MAWU, mararingihẹ̌, arau sasěmba gaghěllị? Matuhụ su MAWU limembong kapiane wọu měnarakangu sasěmba gaghěllị. Mararingihẹ̌ e limembong kapiane wọu tawan domba.

²³U lumewang su MAWU e, mẹ̌sul᷊ung karal᷊akise ringangu mẹ̌dal᷊ahopa, dingangu naung maobotẹ̌ e mẹ̌sul᷊ungu mẹ̌tahamawu mahan duata. Ual᷊ingu i Tuang kawe limawang titaʼm MAWU e, tangú MAWU e mal᷊aing tawe měngakun Tuang kawe kere ratu.”

²⁴Nakaringihẹ̌ ene i Saul něngaku si Samuel angkuěnge, ”Mamben těngadẹ̌ iạ e seng nẹ̌dosa. Iạ e limampa titam MAWU kụ tawẹ agise su sasal᷊ěntihọ i Tuang. Iạ e matakụ u taumataku kụ bọu ene takụ daringihang dorong i sire e.

²⁵Arawe ini e, iạ mẹ̌dorong si Tuang, ampungeko rosaku ringangu pẹ̌sul᷊ẹ e ringangku e sarang Gilgal, tadeạu iạ e makapẹ̌kal᷊iomaneng su MAWU.”

²⁶Arawe i Samuel simimbang, ”Iạ e madiri mẹ̌sul᷊e sěngkapẹ̌sul᷊e ringang i Tuang. I Tuang kai seng limawang titaʼm MAWU, kụ ini e i Sie sen tawe něngakun Tuang kawe ratung Israelẹ̌ e.”

²⁷Bọu ene i Samuel nẹ̌bihu rimal᷊eng, arawe i Saul něnguhung si sie ringangu něhěgo kakingkaenge, hakịu kakingkaenge ene e naghehẹ.

²⁸Mase nẹ̌berạ e i Samuel si sie, ”Su ěllo ini MAWU e seng něnggehẹ kararatuangu Israel bọʼi Tuang, dingangu něngonggọ ene su taumata wal᷊ine kụ limembong kapiane wọu i Tuang.

²⁹Bẹ̌bantugang Duatang Israel tawe nẹ̌konti ringangu lai tawe němal᷊ui lulu-Ne, batụu i Sie kai wal᷊inewe taumata.”

³⁰I Saul simimbang, ”Iạ e seng nẹ̌dosa. Katewe tul᷊ung bue Tuang, pẹ̌bal᷊ị e ringangku tadeạu iạ makapẹ̌kal᷊iomaneng su MAWU Ruata i Amang. Ual᷊ingu kerene i Amang e měngadatẹ̌ si siạ su těngoʼm manga pangahạ u wansaku ringangu su těngong kasěllahu Israelẹ̌.”

³¹Tangú nẹ̌sul᷊ẹ e i Samuel sěngkapẹ̌sul᷊e ringange sarang Gilgal, dingangu i Saul nẹ̌kal᷊iomaneng su MAWU.

³²Bọu ene i Samuel něngoro, ”Paringangko Ratu i Agag damahi,” i Agag diměnta su anun sie, napenẹeng pělaharapẹ̌ u i sie měngẹ̌ngěnna, ”Hombangu papate e seng nal᷊iu.”[49]

³³Mase i Samuel nẹ̌bera, ”Mẹ̌sul᷊ungu pedanu e seng nakakariading mal᷊awọ manga i ninang kụ kinailangengu manga anạ e, kerene lai i ninangu e sarung kailangengu anạ e.” Mase i Samuel něnanětadẹ̌ si Agag su těngong pananěmbaěng su Gilgal.

³⁴Bọu ene i Samuel nakoạ sarang Rama, kụ Datu i Saul napul᷊ẹ sarang bal᷊ene su Gibea.

³⁵Sarang pěngěnsueěngu wiahe, i Samuel tawe nẹ̌sombang i Saul kạpia. Arawe i Samuel masusa naunge watụ u MAWU kawe nẹ̌sasěsilẹ̌ něhengkẹ i Saul nakoạ datung Israel.