Read Sangir SAMUEL HUMOTONG 16 Bible Online

SAMUEL HUMOTONG 16 - Sangir bible

SAMUEL HUMOTONG 16

¹Tawe nararěnnạ wọu ene MAWU e nẹ̌bera si Samuel, ”Karěngụ e lai wědang i kau e masusa naungu e Saul? Bal᷊inewe i sie seng tawe niaku kere ratung Israel? Ini e al᷊ạko lanang zaitun kụ kakoạko sarang Betlehem, sarang anung sěngkatau arenge i Isai, batụu sěngkatau wọu tal᷊oarang manga anạ e seng Takụ nipile nakoạ datu.”

²Arawe i Samuelẹ̌ e simimbang, ”Kereapa wue iạ e harusẹ̌ mẹ̌koạ ene? Kereu hal᷊ẹ̌ ene ikaringihʼi Saul nal᷊ahẹ u iạ pateěnge!” MAWU e simimbang, ”Bawako sapi mangudạ e sěmbaụ dingangu pẹ̌berako su kawanua i kau riměnta tamai kerene e kai waugu měnarakangu sasěmba su MAWU.

³Mase ghauseko i Isai sarang koạ u tundung pěnanarakang u sasěmba ene. Hědon sarung Takụ ihabarẹ̌ apa hinong koatengu e. Taumata kụ Takụ nitěbọ si kau e, hinon hengkẹu makoạ datu.”

⁴I Samuel nẹ̌koạ kerene kerẹewe seng nipěhengetangu MAWU. Ene i sie nahumpạ e su Betlehem, apang pangahạ u soa e něněnsomahẹ̌ dingangu himěkosẹ̌ kụ nakiwal᷊o, ”Pẹ̌tatiwong Tuang e kai wal᷊inewe mẹ̌bẹ̌bawa kasasal᷊amatẹ̌?”

⁵Sasimbang i Samuel, ”Mamben těngadẹ̌. Iạ e riměnta e waugu měnarakangu sasěmba su MAWU. Tangú pěnusiko watangengu e tadeạu makakatol᷊e tundun pananěmba ene.” Isai ringangu manga anạ e mal᷊aing niorone apạnusi watangenge sěngkatau-sěngkatau, ringangu ninotẹ̌ e sarang pananěmba ene.

⁶Piạ i sire seng natampung, kụ i Samuel nakasilo si Eliab anạ i Isai, su tiněnnane, ”Nal᷊ahẹu ini e sarung ipilem MAWU.”

⁷Arawe MAWU e něhengetang si Samuel, ”Kumbahang i kau kawitaugangu gahị e mal᷊ěnggihẹ̌ dingangu rangẹ u wadange; wal᷊inewe i sie kẹ̌kapulu-Ku e. Iạ tawe měngarěga kere taumata měngarěga e. Taumata e kai kụkakělla ghati, arawe Iạ e kụkakělla naung.”

⁸Bọu ene Isai nẹ̌kui si Abinadab, anạ e, mase niorone nẹ̌těngon Samuel. Kaiso i Samuel nẹ̌bera, ”I sie lai tawe nipilem MAWU.”

⁹Bọu ene i Syama nioro sarang těngone kahiang Isai, kai i Samuel nẹ̌bera, ”I sie lai tawe nipilem MAWU.”

¹⁰Kerene i Isai něngoro anạ e pitu nẹ̌tatuhụ nẹ̌těngon Samuel, arawe i Samuel nẹ̌bera si sie, ”I sire tawe nipilem MAWU.”

¹¹Bọu ene nakiwal᷊ọ i Samuel si sie, ”Kětạeng ini e kěbị manga anạ u esẹ e?” Sasimbangi Isai, ”Bědang piạ lai sěngkatau kahembokange, kaiso i sie kạpěngahạ e domba.” I Samuel nẹ̌bera, ”Oroko pẹ̌kui si sie, u i kitẹ e reng tawe kumaěng těntal᷊ang i sie e tawe nạděnta.”

¹²Bọu e i Isai něngoro pinẹ̌kui rariọ ene. Nal᷊ahẹ u i sie kai sěngkatau umbaseng mal᷊epatẹ̌ dingangu wadange mapia, mase matane matilang. Mase něhengetangke MAWU si Samuel, ”Seng ini e i sie; hengkẹ e i sie!”

¹³Dingangu masahawụ i Samuel něngal᷊ạ lanan zaitun ene kụ něnduị i Daud dingangu tundung pěndal᷊anisẹ̌ su těngoʼm manga tuhange. Su tempo ene lai i Daud nipẹ̌kawasaěngu Rohkẹ̌ u MAWU. Natětạ bọu ěllo ene ringangu sarang karěngụ e Rohkẹ̌ u MAWU e naněntanudẹ̌ si sie. Bọu ene napul᷊ẹ e i Samuel sarang Rama.

¹⁴Kutẹu i Saul seng nitěntangu Rohkẹ̌ u MAWU, kụ ini i sie nisigěsạ u rohkẹ̌ dal᷊akisẹ̌ kụ nirolohu MAWU.

¹⁵Ual᷊ingu ene manga ěllang i Saul nẹ̌bera si sie, ”I kami e masingkạ u rohkẹ̌ dal᷊akisẹ̌ e kụ nirolohu MAWU e piněnigěsạ si Tuang.

¹⁶Manga i Tuang mal᷊uasẹ̌, i kami e sadia mẹ̌deạ sěngkatau kụ pande měnalangu kěcapi. Kamagengu i Tuang kawe wantiangu rohkẹ̌ dal᷊akisẹ̌, ute tau ene makapěnalangu kěcapine, kụ i Tuang saụbe makapěndang mahuweka.”

¹⁷Bọu ene i Saul nẹ̌parenta si sire, ”Pẹ̌deạko sěngkatau kụ pande měnalangu musikẹ̌, kụ paringangko i sie ramahi.”

¹⁸Nakaringihẹ̌ ene sěngkatau ěllange nẹ̌bera, ”I Isai tumanạ u soam Betlehem piạ anạ e esẹ sěngkatau kụ tahanalangu musikẹ̌. I sie wahani, ringangu sěngkatau tahapẹ̌sekẹ mapia. Kutẹu lai i sie masadadạ dingangu tahawisara, kụ MAWU e sěntiniạ mẹ̌tẹ̌tul᷊ung i sie.”

¹⁹Tangú i Saul něndingọ u rarolohang sarang anung Isai pinẹ̌bawa tatanata ini, ”Dolohẹ̌ko anạu i Daud, kụ mẹ̌děndiagạ manga dombanu ene pẹ̌těngong iạ.”

²⁰Bọu ene Isai něnadiang kalide sěmbaụ, kụ pinělurangengu anạ u kambing sěmbaụ, borotẹ̌ dingangu kawihẹ̌ pisị lohong anggorẹ̌ napenẹ. Kěbị ene nionggọ i Daud mědeạu isarakang i Saul.

²¹Kerene i Daud riměnta su anun Saul kụ makoạ mẹ̌tatangkiange. I sie mamben tẹ̌tal᷊ěntukangi Saul kụ nihengkẹ nakoạ mẹ̌bawawa aghidẹ̌.

²²Bọu ene i Saul něndohon tatanata si Isai, ”Iạ e mapulun Daud. Pakawalako i sie tatapẹ̌ katanạ sini pẹ̌tangkiang si siạ.”

²³Bọu ene, suapạeweng i Saul děntaěngu rohkẹ̌ dal᷊akisẹ̌ ene, i Daud něngal᷊ạ kěcapine kụ něnalang. Kụ i Saul saụewe nakapěndang mal᷊enehẹ̌ o kawe lai mal᷊oahẹ̌, batụu kai seng bọu nitěntangu rohkẹ̌ dal᷊akisẹ̌ ene.