Read Sangir SAMUEL HUMOTONG 17 Bible Online

SAMUEL HUMOTONG 17 - Sangir bible

SAMUEL HUMOTONG 17

¹Piạ sěnsul᷊e tau Pilistin mapasěbangu sordadone mědeạu mẹ̌sekẹ. I sire něngatorẹ̌ buntuange su soang Sokho, su ral᷊ungu wanuang Yehuda ringangu měnakẹ tentane su wěllạu Sokho ringangu Azeka, marěduhu Efes-Damim.

²I Saul dingangu kal᷊awọu tau Israel nẹ̌tampung kạpia ringangu nẹ̌daseng su Wal᷊ang Ela; i sire mẹ̌dẹ̌dariahi waugu tumatěngo pěngangalon tau Pilistin.

³Kerene ghapaěngu tau Pilistin měmpạhundarisị su wěntihe sěmbua ringangu wuntuangu tau Israel su wěntihe wal᷊ine, ringangu sutal᷊oarane piạ bal᷊ane sěmbaụ.

⁴Piạ tau sěngkatau makul᷊i mẹ̌kakoka arenge i Goliat, bọu soang Gat, siměbang bọu pẹ̌darasengangu tau Pilistin mẹ̌deạu rumokạ tau Israel. Karangẹ e manga těllu meterẹ̌;[50]

⁵dingangu i sie něnakạ u sapeọ e tambaga ringangu pakeangu sekẹ e tambaga kụ běhạ e mangawe limam pul᷊o pitu su kilone.

⁶Laede niěllungangu tatakạ laedẹ̌ wọu tambaga, ringangu su wěmbange i sie mẹ̌masaěng běngko wọu tambaga.

⁷Pul᷊ung běngkone kasariane kere kalu su apal᷊iwụ u kakahiwuang, dingangu horoʼm běngkone běhạ e manga pitung kilo. Sěngkatau tahapẹ̌sekẹ e rimal᷊eng su těngone apidu kapẹ̌bawane kěllunge.

⁸I Goliat něngědung, kụ bọu ene nẹ̌bansagẹ̌ su manga sordadong Israel, ”Kaia nạung kẹ̌koateng i kamene sene? Kai mẹ̌paraěng i kamene? Iạ kai tau Pilistin, ei manga ěllang i Saul! Pěmileko sěngkatau wọu tal᷊oarang kamene kụ bahani lumintụ mẹ̌sekẹ dingangku.

⁹Kereu su ral᷊ungu tandingu pẹ̌sasekẹ ene iạ e mate, i kami e sadia makoạ ěllangu, arawe kamagengu iạ kawe makauntu ringangu makapate, ute i kamene e sarung makoạ ěllang i kami.

¹⁰Kụ orasẹ̌ ini lai takụ dokateng sordadong Israel; pěmileko sěngkatau baugu ipẹ̌tanding kụ pěndokạ si siạ!”

¹¹Piạ i Saul dingangu taumatane nakaringihẹ̌ sungkal᷊ene ene, himěkose i sire ringangu něngkatakụ marasai.

¹²I Daud kai anạ i Isai tau Efrata, wọu Betlehem su Yehuda. Isai piạ anạ e ual᷊ung katau manga esẹ, dingangu su tempong pẹ̌paparentan Saul, i Isai e seng maghurang-gurang.[51]

¹³Anạ i Isai tatěllu kal᷊aiakanenge seng dimal᷊eng nẹ̌sekẹ timol᷊e si Saul. Kaiakanenge arenge i Eliab, karuane i Abinadab, dingangu katěllune i Syama.

¹⁴I Daud anạ e katuariange. Su tempong i sire těllu manga tuhange mal᷊aiakang ene kapẹ̌sẹ̌sekẹ e ringang i Saul,

¹⁵i Daud kạdingạ měnẹ̌něntang i Saul dingangu mapul᷊ẹ sarang Betlehem baugu měngahạ manga dombang amange.

¹⁶Karěngụ u ěpạ u pul᷊o su ěllone, apang kamal᷊ukadẹ̌ dingangu wawěllo, i Goliat rimani wuntuangu tau Israel kụ něndokạ si sire.

¹⁷Piạ sěhěllo i Isai nẹ̌bera si Daud, ”Pěngal᷊ạko gandung tinapa mapul᷊ong kilo ringangu borotẹ̌ ini e mapul᷊o, kụ bawako su manga tuhangu su pẹ̌darasengangu sordado.

¹⁸Bawako l᷊ai keju ini mapul᷊om baụ baugu komandaěngu pasukang. Kiwal᷊oiko kereapa kakakoạ u manga tuhangu ringangu pẹ̌bawako tatiala waugu iạ, u i kau seng nẹ̌sombang dingang i sire kụ i sire e mapia wue.

¹⁹I sire e kai su Wal᷊ang Ela ringangu Ratu i Saul, dingangu patikụ taumatang Israel kapẹ̌sẹ̌sekẹ e ringangu tau Pilistin.”

²⁰Sěngkarịěllone mal᷊uka-l᷊ukadẹ̌, i Daud nẹ̌bangung mase nẹ̌sasadia. Dombane niaresẹ̌ su taumata měndariagạ e, wọu ene i sie něngal᷊ạ bawawaěnge kụ nẹ̌buạ, natuhụewe kere su parentang amange. I sie nahumpạu pẹ̌darasengang su tempon tau Israel nẹ̌buạ sarang pẹ̌seketang kapẹ̌mansageng bansagu sekẹ.

²¹Sordadong Pilistin dingangu sordadong Israel mẹ̌tẹ̌tatěngo ringangu měmpẹ̌dẹ̌dariahi waugu mẹ̌sekẹ.

²²Mase i Daud něngarangu apal᷊iwụ e ene su měndariagạ manga apal᷊iwụ u sordado, ringangu timal᷊ang sarang tampạ u pẹ̌seketang mẹ̌deạu mẹ̌sombangu manga tuhange.

²³Arawe i sie kapẹ̌bẹ̌bisarane ringang i sire, i Goliat tamai sarang horone kụ dimokạ tau Israel, mẹ̌sul᷊ungu kere wiasa kẹ̌koatenge. I Daud mal᷊aing dimaringihẹ̌ kal᷊awọu wawerang dumokạ e

²⁴Tawe nararěnnạ sarangke tau Israel nakasilo si Goliat, i sire timal᷊angu takụ.

²⁵”Kakěllạe i sie!” angkuěng i sire sěndinganenge. ”Daringihẹ̌ko kal᷊awọu wawerane rumokạ e! I Saul datung kitẹ e seng nẹ̌diandi u i sai-saing kụ měmate si Goliat, sarung gělikangu poroseěng kụ gẹ̌guwạ. Datu e mal᷊ain sarung mapẹ̌kawingu tau ene ringangu sangiange. Dingangu walagi amangu tau ene e sarung ipakal᷊iu wọu pajakẹ̌.”[52]

²⁶Bọu e i Daud nẹ̌bera, ”Bahani kahěngang tau Pilistin kapirẹ̌ ene e rumokạ sordadon Duata kụ biahẹ̌ e!” Bọu ene i sie nakiwal᷊o su sěngkatau wọu tal᷊oaran tahasekẹ e, ”Kai a sarung onggotang su taumata kụ makapate tau Pilistin ene ringangu měngěmụ lahinakang bọu Israel?”

²⁷Kawanua e měhabarẹ̌ si sie, apang kụ seng niriandin datu.

²⁸I Eliab tuhang i Daud i akange nakaringihẹ̌ si Daud nẹ̌bisara ringangu manga tahasekẹ. I sie nẹ̌bawal᷊uang si Daud, dingangu nẹ̌bera, ”Unụe i kau e naramahi? I sai nioronu piněngurusẹ̌ manga dombanu piram baụ ene su kěhu l᷊inggi? Iạ masingkạ, i kau makịtodẹ u wahani; i kau naramahi kětạeng baugu makasilo pẹ̌sasekẹ arau ěng?”

²⁹Angkuěng i Daud, ”Kai a sal᷊aku? Iạ karạ tumbạu makịbal᷊o!”

³⁰Bọu e i sie rimal᷊eng kụ nakiwal᷊ong hal᷊ẹ̌ mẹ̌sul᷊ung su apan tahasekẹ bal᷊ine, kụ i sie mal᷊aing nakaěbạ sasimbahẹ̌ kerene.

³¹Kaiso pirang katau taumata kụ nakaringihẹ̌ baweran Daud, něhabaru ene si Saul, kụ i Daud nikuiange pẹ̌těngo.

³²Angkuěng i Daud si Saul, ”Tuang datu, i kitẹ manịeng tawe matakụ u tau Pilistin ene! Ěllangu e sadia rumokạ si sie.”

³³”Kumbahang,” angkuěng i Saul. ”Kai makoạ kerea, i kau e mẹ̌tanding dingange? I kau e wědang mangudạ marau arawe i sie e seng tiasa mẹ̌sekẹ deng bědang tempong i sie mangudạ e.”

³⁴Arawe i Daud nẹ̌bera, ”Tuang! ěllange wiasa wue měngahạ dombang amangku. Mạengu piạ singa arau běruang kụ duměnta měněmbo domba,

³⁵binatang dul᷊u ene, takụ sahusuang dingangu takụ pal᷊okang, mase domba e takụ ambangeng. Dingangu kamagengu singa arau běruang ene rumokạ ěllang, tangú ěllange měngělọ lehẹ e kụ tangkul᷊ang sarang pakapate.

³⁶Ěllang e seng němate singa arau lai běruang, dingangu tau Pilistin kapirẹ̌ ene lai sarung mẹ̌sul᷊ungu manga binatang ene, ual᷊ingu i sie e wahani měhinakang sordado wọu Ruata kụ biahẹ̌.

³⁷MAWU e seng něngambang ěllangu wọu singa arau běruang. Kụ l᷊ai sarung měngambang ěllang bọu tau Pilistin ene.” Mase angkuěng i Saul si sie, ”Mapiạewue, karimạko MAWU e mẹ̌tul᷊ung i kau.”

³⁸I Saul něngonggọu pakeangu paraěnge, kụ kai pakeang uase sěmbaụ si Daud, kụ i Daud něluhe. Wọu ene i Saul něnakẹ u sapeọ tambaga su těmbọ i Daud.

³⁹Pěngěnsueěnge i Daud něngikịu pedan Saul su pakeang uase ene, wọu ene něnal᷊ukạ dimal᷊eng, kaiso tawe makakoạ, batụu i Daud tawe nanarang mẹ̌pakẹ pakeangu paraěng. ”Ěllange tawe makaral᷊engu pakeang ini,” angkuěnge si Saul. ”Ěllange tawe makakoạ mẹ̌pakẹ u ini.” Mase kal᷊awọu pakeangu paraěng ene e nitěntange.

⁴⁰Bọu ene i sie něngal᷊ạ těkingu lukade, dingangu němile watu maral᷊imbolong limam baụ bọu sal᷊ụ, kụ bọu ene nitahone su ral᷊ungu papodẹ e. Kụ katipolẹ̌ kạl᷊ahěgo su l᷊imane, tamaị e i sie nẹ̌sombang i Goliat.

⁴¹Pira tempo nal᷊iu i Goliat kụ nạung nikal᷊imonaěngu mẹ̌bawawa kělunge, nanětạe rimal᷊eng mẹ̌těngkaranin Daud.

⁴²Kaiso su tempong i sie nakasilo si Daud dingangu kạpandane, i Goliat liměge mělẹ̌heghesẹ̌ batụu i Daud kai wědang tumanịu mangudạ dingangu mal᷊epatẹ̌.

⁴³Angkuěng i Goliat si Daud, ”Kai waugu apa těking ene? Lẹ̌ěnaěngu kai asu iạ ini?” Mase i Daud nianeěnge waugu manga mahan duatane.

⁴⁴Kutẹu l᷊ai i sie rumokạ si Daud, angkuěnge, ”Kutẹu mahịe! badangu hědon takụ ionggọ su manga manụ u winalangeng dingangu manga binatang pakikinạ.”

⁴⁵Arawe i Daud simimbang, ”I kau e riměnta rumokạ si siạ dingangu peda, wěngko, ringangu kal᷊aị, arawe iạ e ruměnta rumokạ si kau ringangu arengu MAWU Kụ Limembong Kawasa, Duata sordadong Israel kụ lẹ̌hinakanengu ene.

⁴⁶Ěllo ini lai MAWU sarung měnarakang i kau si siạ; i kau sarung takụ ikawatạ dingangu těmbọu sarung takụ pentehang. Badangu ringangu wadangu manga tahapẹ̌sekẹ u tau Pilistin sarung takụ ionggọ su manga manụ u winalangeng dingangu manga binatang pakịkinạ. Tangú kasěllahu dunia e sarung masingkạ u i kami tau Israelẹ̌ e mạnaghuang Duata kụ sẹ̌sěmbaěng i kami,

⁴⁷kụ kěbị taumata sini sarung makasilo u MAWU e tawe mẹ̌gausẹ̌ peda arau wěngko waugu měngambang umatʼE. Seng i Sie e kụ měnantu ral᷊engu pẹ̌sasekẹ ini ringangu i Sie e sarung měnarakang i kamene su l᷊imang kami.”

⁴⁸I Goliat nanětạe tamai mẹ̌těngkarěduhi Daud, mase ringangu masahawụ i Daud timal᷊ang sarang buntuangu tau Pilistin baugu mẹ̌těngon sie.

⁴⁹I Daud něndau papodẹ e, něngal᷊ạ batu sěmbaụ kụ niěnạe sarang anung Goliat. Batu ene nihino su rěhụ i Goliat hakịu nahěmpung daran těmbọ e, kụ i sie nawatang dingangu ghatine su ěntana.

⁵⁰I Daud timal᷊ang sarang anung Goliat, bọu e rimarisị su rěduhi Goliat, kụ i sie něngal᷊ạ pedang Goliat mase nisawụ e wọu homane, mase nipentehe těmbọ u tau Pilistin ene. Kerene i Daud němatạ dingangu němate si Goliat, kětạeng dingangu katipolẹ̌ dingangu watu! Piạ e tau Pilistin nakasilo u wahanin sire e seng nate, tangú timal᷊angke i sire e.

⁵¹

⁵²Tau Israel dingangu tau Yehuda e němpẹ̌gẹ̌gahẹ̌ dingangu měnẹ̌nahusu tau Pilistin sarang Gat[53] dingangu tukadu pasěllangengu Ekron. Tau Pilistin něngkal᷊esẹ e měngkate apa su l᷊imbatang kanandun dal᷊eng sarang Saaraim ene.

⁵³Bọu ene tau Israel nẹ̌sul᷊e wọu měnẹ̌nahusu tau Pilistin, mase něhampasẹ̌ lohong pẹ̌darasengang i sire.

⁵⁴I Daud něngal᷊ạ těmbo i Goliat, kụ niwawane sarang Yerusalem; kaiso manga aghidʼi Goliat niresọ e su ral᷊ungu tentane hala.

⁵⁵Piạ i Saul nakasilo si Daud tamai rimokạ si Goliat, nakiwal᷊ọ e i sie si Abner mol᷊onsekẹ e, ”Abner kai anạ i sai i sie?” ”Ěllangu e wěga wue, Tuang,” angkuěng i Abner.

⁵⁶Bọu e angkuěng i Saul, ”Dakọko kụ pakiwal᷊ong hal᷊ẹ̌ ene.”

⁵⁷Kụ piạ i Daud nẹ̌sul᷊e sarang pẹ̌darasengang bọuten němate si Goliat, i sie niwawang Abner nẹ̌těngon Saul. I Daud bědang mẹ̌měbẹ těmbọ i Goliat.

⁵⁸Bọu ene nakiwal᷊ọ e i Saul si sie, ”Ei amang! Kai anạ i sai i kau?” I Daud simimbang, ”Ěllang ini e anạ i Isai wọu Betlehem.”