Read Sangir SAMUEL HUMOTONG 18 Bible Online

SAMUEL HUMOTONG 18 - Sangir bible

SAMUEL HUMOTONG 18

¹Bọuteng i Saul děduang Daud nasueng pal᷊ahumbisarane, i Daud nihengkẹ i Saul nakoạ sawohị e ringangu nanětạ bọu ěllo ene i sie tawe pinakawala napul᷊ẹ sarang bal᷊eng gaghurange. I Yonatan ahusʼi Saul sen nakaringihẹ̌ pal᷊ahumbisara ene. I sie nawirahing lai i Daud kụ kiměndagʼi sie kerẹewe lai kiměndagu watangenge.

³Ual᷊ingu ene i Yonatan nẹ̌salu sarung mẹ̌dal᷊ahapị i Daud, sarang marěngụ-děngụ.

⁴I Yonatan něluạ kakingkaenge wọu e nionggọ e si Daud, kerene lai pakeangu paraěnge, ore lai pedane, naěnakenge ringangu papehẹ e.

⁵I Daud nẹ̌koạ e pinakapia kal᷊awọu hal᷊ẹ̌ kụ nionggọ i Saul si sie. Ual᷊ingu ene i sie nihengkẹ i Saul nakoạ pěrwira su ral᷊ungu sordadone, ringangu i Daud makạl᷊ahimpulu kal᷊awọu tahapẹ̌sekẹ ore lai kahiang manga ěllang i Saul.

⁶Piạ i Daud nẹ̌sul᷊e wọu němatạ si Goliat tau Pilistin ene, ringangu kal᷊awọu tahapẹ̌sekẹ němpẹ̌buntuang simuẹ̌ su ral᷊ungu soa, manga wawine e nahunsěbang bọu kěbị soa su Israel waugu maněnsomahẹ̌ su Ratu i Saul. I sire nẹ̌pẹ̌kantarị u manga kakantarị u ral᷊uasẹ̌, dingangu měmpẹ̌sẹ̌sal᷊ai kapěnẹ̌nalange arabanạ dingangu kěcapi.

⁷ Kapẹ̌sal᷊aine manga wawine e kapẹ̌kẹ̌kantarị e kere ini, ”I Saul němate sědụ e hiwune, arawe i Daud kawe pul᷊one hiwu.”

⁸Nakaringihẹ̌ ene i Saul nẹ̌bawal᷊uang marehe. U su ěnnane, ”I Daud kai seng niěnna u nakawihua pul᷊one hiwu, arawe si siạ kawe kětạeng hiwune. Měntěhang lai semben tantu i sie ihengkẹ i sire makoạ datun sire!”

⁹Něnětạ bọu ěllo ene, i sie tawẹ dal᷊uase naunge si Daud.

¹⁰Sěngkarịěllone i Saul ene su ral᷊ungu wal᷊ene kạpẹ̌ngumbelẹ e wěngkone, kụ sěngkělěndịu i sie nirěntaěngu rohkẹ̌ dal᷊akisẹ̌ kụ nirolohu Ruata, hakịu i sie nẹ̌buntirisang kere tau pulu. Su tempo ene i Daud kapěnẹ̌nalange kere wiasa.

¹¹”Takụ leangeng běngko ini si Daud sarang pakatětelẹ̌ su rarěndung!” Su naungi Saul, mase i sie něleangkeng běngko ene rua sul᷊e si Daud, kaiso i Daud mang nakatihọ.

¹²I Saul nakapěndang u i Daud kawe tẹ̌těntanudangu MAWU, arawe i sie sẹ̌sane kawe nitěntangu MAWU. Ual᷊ingu ene i sie natakụ i Daud.

¹³Tangú i sie něngal᷊ing i Daud bọu rěduhu istana, kụ něhengkẹ i sie pinakakoạ těmbonangu sěhiwu su kataune tahapẹ̌sekẹ. Kụ ual᷊ingu ene tangú i Daud měngẹ̌ngahạ buntuange suapạewem pẹ̌sasekẹ e.

¹⁴I sie mạkaual᷊i su ral᷊ungu mẹ̌koạ hal᷊ẹ̌ e, batụu MAWU e mẹ̌tẹ̌tul᷊ung i sie.

¹⁵Piạ i Saul makạsilo si Daud sěntiniạ mang mạl᷊ětạ, ute mangkeng kakạtakụ e si sie.

¹⁶Kai kạguwạu Israelẹ̌ dingangu Yehuda e matal᷊ěntụ si Daud batụu i sie kai těmbonange mal᷊awọ budine.

¹⁷I Saul něhingidu tadeạu i Daud pakipate su tau Pilistin su ral᷊ungu pẹ̌seketang tadeạu wal᷊inewe i sie hala němate. Kụ piạ sěhěllo i Saul nẹ̌bera si Daud, ”I Merab sangiangku kaiakanenge takụ ipẹ̌kawing dingangu, asal᷊u i kau e mapasilong kawahaninu su ral᷊ungu mẹ̌sekẹ baugu MAWU.”

¹⁸I Daud simimbang, ”I sai tangú ěllang ini ringangu kaia mangal᷊ene walagʼi amangu ěllang su Israel, hakịu ěllangu e makoạ ahusu Ratu mirarating tangú?”

¹⁹Arawe nịdatingken tempone i Merab ipẹ̌kawing i Daud, kutẹu sangiang ene kawe nạung pinẹ̌kawingang i Adriel bọu Mehola.

²⁰I Mikhal sangiang i Saul bal᷊ine e natunọ e naunge si Daud. Piạ i Saul nakaringihẹ̌ ene tangú, i sie selaing kimire.

²¹Su tiněnnane, ”Mapiawe lai takụ isughighi i Mikhal si Daud tadeạu i Daud mahěbọ dingangu ikapaten tau Pilistin.” Kụ su karua sul᷊ene i Saul nẹ̌bera si Daud, ”Kụ ini e i kau e seng botonge makoạ ahusẹ̌ku mirarating.”

²²Bọu e i sie něngoro manga sawohị e tadeạu pẹ̌bera si Daud pakarěmmasẹ̌ kere ini, ”Datu e tụtal᷊ěntụ i kau kụ kerene lai patikụ apan sawohị e; kụ seng orasẹ̌ ini e tempone kapiange si kau rumal᷊engu wera su sangiange.”

²³Kaiso piạ i sire něhabaru těgu ene si Daud, i sie simimbang, ”Su naung i kamene kai tawẹ susane makoạ mirarating u ratu? Iạ e kai taumata kasiang dingangu tawẹ mangal᷊ene!”

²⁴Apan sawohị e něhabarẹ̌ si Saul sasimbang i Daud ene,

²⁵kụ i Saul něngoro si sire pinẹ̌bera si Daud kirini, ”I kẹ̌kapulun datu e kere wul᷊aengu kawing, kětạeng pisingkotọ u wadangu pělling manga esẹ u Pilistin 100 su kataune, kere wawal᷊ise su sědụ u ratu.” (Kai ini e kẹ̌karakiang i Saul waugu měmihua si Daud lumiu tau Pilistin.)

²⁶Apan sawohị i Saul něhabaru tatanata ene si Daud, kụ i Daud něnarimạ u sughighin datu ene. Ual᷊ingu ene, kal᷊imonang kẹ̌takengu tempo e seng masue, i sie nẹ̌buạ dingangu taumatane sarang banuang Pilistin. I sie němate tau Pilistin 200 su kataune wọu e nial᷊ạ kotọu pising badangu pěllin sire kụ nionggọ e si Saul kụ tawe apa ghainge sarang sěmbaụ. Bọu ene i Saul napẹ̌kawing i Mikhal si Daud.

²⁸Kerene i Saul nakahěngangke u i Daud kai tẹ̌těntanudangu MAWU dingangu l᷊ai tẹ̌tal᷊ěntụ i Mikhal sangiange.

²⁹Tangú mangkeng kakạtakụ e i sie si Daud dingangu i sie mạběnsing kananduʼm pẹ̌bawiahe.

³⁰Masaun sul᷊ene kereu sordadom Pilistin duměnta měngalo, i Daud limembong bahani měmatạ i sire sul᷊ungu manga pěrwiran Saulẹ̌ bal᷊ine e. Tangú mangkeng kakạtelenge i Daud.