Read Sangir SAMUEL HUMOTONG 2 Bible Online

SAMUEL HUMOTONG 2 - Sangir bible

SAMUEL HUMOTONG 2

¹ Eneʼ i Hana nẹ̌doạ e, angkuěnge, ”MAWU e napakal᷊uasu naungku; kakanoạʼE makạl᷊uasẹ̌ himukudẹ̌ku. Dingangu karal᷊unsemahẹ̌ e takụ lẹ̌heghesang sědụku, watụ u mamben těngadẹ̌ Duata e seng nẹ̌tul᷊ungu iạ.

²Tawẹ u susi kere MAWU! Kětạeng i Sie makaghěllị u pẹ̌kakěllungang.

³Pạngintoěngko mẹ̌beraʼm bawera tạ mangal᷊ene! Ěnsuẹ e wawerang obotẹ̌ e! Batụu MAWU e kai Ruata limembong matahuěnna, kụ měhukung kal᷊awọu kakanoạ u taumata.

⁴Sěpụ u wawahani e seng napědi, kaiso mangkeng kakạtoghase taumata kụ lome e.

⁵Taumata nạung kal᷊amona e kẹ̌kal᷊aedang ual᷊ingu kaěng mạhěmpal᷊iu kal᷊awọe, ini e seng nakoạ mantorosẹ̌ sẹ̌sewaěng kětaeng baugu makareạ kaěng. Taumata naụng kal᷊amona e kẹ̌kal᷊unusang, orasẹ̌ ini e kẹ̌kal᷊aedang, ual᷊ingu wiahẹ̌ e mạhěmpal᷊iu. Marehokang nạung bantọ e, orasẹ̌ ini e lụl᷊iagẹ̌, u anạ e pitung katau e seng piněhěndinge! Arawe marehokang nạung anạ e mal᷊awọe, nitěntang, niwala taturuhe.

⁶MAWU e nạung makapate i Sie lai měmiahẹ̌. Taumata e iapạl᷊intụʼE sol᷊ong tampạ u taumata nate e. Kụ i Sie lai měngangaunge wọu ene.

⁷Piạ taumata kụ ipakạsunsaranʼE, piạ lai ipakạkalạʼE. Piạ taumata ipakạsanạʼE, piạ lai ipakạdangẹʼE.

⁸NihengkẹʼE apan tawẹ darotonge wọu kasasigěsạ, bọu kasasunsara e niliwirʼE apan taumata kasiang. I sire nikoạ hapị u mapapangkatẹ̌, dingangu nionggotangu diabatang lẹ̌adateng. Bal᷊an dunia e kai MAWU piạ, su wowone nipětịʼE runia.

⁹Taumata satia e sěntiniạ mang su ral᷊ungu kal᷊aěllung u MAWU. Arawe apan dal᷊akisẹ̌ e mạbihua su ral᷊ungu kalalělubẹ̌ dingangu kararěndung maěllị. Katatoghasu watangeng hala e tawe kapěngumbalaěng, katatoghasu taumata e tawe makaonggọ u watạ.

¹⁰Kal᷊awọu sědụ u MAWU e měngkawihua, i sire měngkạtakụ u, wọu l᷊angị e i Sie ghumal᷊ědụ. MAWU e sarung měhukungu kasěllahu dunia ini e, ringangu mangonggọ u kawasa mawantugẹ̌ e su ratu pinilenʼE.”

¹¹Bọu e napul᷊ẹ e i Elkana ringangu walage sol᷊ong Rama, arawe i Samuel, dariọ ene, natanạ su Silo kụ nẹ̌tangkiang MAWU su al᷊ungu kawasang Imang i Eli.

¹²Manga anạ Eli e raral᷊akisẹ̌ kahěngang. I sire tawe měndarekeng u MAWU

¹³ringangu su hal᷊ẹ̌ u imang tangú i sire mẹ̌bẹ̌batụ kapulun sire miěbạ tau Israel. Kereu andene piạ taumata kụ manarakang u sasěmba, ute lumaontol᷊u imang e ruměnta měbawa porokẹ̌ i sine tatěllu. Kạpẹ̌tẹ̌tuěng e ghẹ̌si e,

¹⁴porokẹ̌ ene e sẹ̌susukang sol᷊ong dal᷊ungu pantisẹ̌ tatahoěngu ghěsing binatang ene tẹ̌tuěngang, bọu e walạewe apa aungangu porokẹ̌ sol᷊ong likude tangú makoạ tataghuaneng u imang. Kěbị tau Israel apang diměnta sol᷊ong Silo baugu měnarakang u sasěmba laonggọ e, kẹ̌koateng kerene.

¹⁵Ore lai pẹ̌sěngkakuhuang mamaměllasẹ̌ ene e ruměnta kal᷊amonan tawane i hae mědeạu tongkateng, bọu e i sie mẹ̌bera si sain duměnta měnarakang u sasěmba ene, ”Onggotengkong gěsing binatang kụ bědang tamatạ su imang tadeạu sahabeng e; i sie mạdiri měnarimạ gěsing binatang nituěng.”

¹⁶Kereu taumata ene sumimbang, ”Kapiaěng i kitẹ e tumuhụ tiahane kụ mẹ̌tongkạ tawane kal᷊imona bọu ene i kau wotonge měngal᷊ạ tuhụ kapalunu,” tangú lumaontol᷊ẹ̌ ene e něbera, ”Tawe wotonge, su tempo ini i kau harusẹ̌ měnarakang, mạeng u tala tangú takụ al᷊akeng u sihasa.”

¹⁷Kerene anạ i Eli rarua ene nẹ̌dosa ghẹ̌guwạ su těngon MAWU, ual᷊ingu i rẹ̌dua tawe měngangarěgan sasěmba su MAWU e.

¹⁸Ene i Samuel deng kadodọ e měngkate sěntiniạ mẹ̌tẹ̌tangkiang MAWU. I sie mẹ̌pẹ̌pakẹ u pakeang e tani nikoạ bọu hekạ leneng, kere pakeang u manga imang.

¹⁹Taun-taung i ninange mẹ̌kẹ̌koạ lakụ kadodọ bọu e ighěllị e si Samuel, kereu wawine ene ringangu kawinge ruměnta měmpẹ̌bawa sasěmban taung.

²⁰Tangú i Eli něngal᷊amatẹ̌ si Elkana rẹ̌dua sěngkawingang, kụ i sie nẹ̌bera si Elkana, ”Karimạko MAWU e mẹ̌gěllị u pal᷊ahěnto kapia si kau wọu kawingu ini, mědeạu pěngaweng dariọ kụ seng nisarakang su MAWU e.” Bọu e napul᷊ẹ e i sire sol᷊ong Rama.

²¹I Hana nial᷊amateng u Ruata, hakịu němantelẹ̌ kapia anạ e esẹ těllung katau ringangu wawine ruang katau. I Samuel mang kakạsariane, i sie kạpẹ̌tẹ̌tangkiange Ruata.

²²I Eli e seng enẹ e kaghurange. I sie sěntiniạ dụdaringihẹ̌ kakalakẹ̌ u mạanung lulung manga anạ e miěbạ tau Israel. I Eli masingkạ l᷊ai u manga anạ e ene mẹ̌tẹ̌tikị dingangu manga wawine apang měndalukadẹ̌ tukadu Tenta Kasasongoěngu MAWU.

²³Ual᷊ingu ene nẹ̌bera e i sie su manga anạ e, ”Iạ e seng nakatarimạ laporang bọu patikụ umatẹ̌ mạanung lulunu ral᷊akisẹ̌ e. Unụ e i kamene měmpẹ̌kẹ̌koạ ene?

²⁴Kumbahangbe saụ mẹ̌koạ kerene; anạku. Apạ ewe ral᷊aị-laị apa i wẹ̌bisarang umat u MAWU e maanung kamene!

²⁵Kereu piạ u nẹ̌sal᷊a su taumata, Ruata e makatatawang bue; kaiso kereu taumata mẹ̌sal᷊a su těngon MAWU e, i sai tangú makaambang?” Arawe i sire kụ tawe měndarekeng u sasasang Eli i amang i sire e, u MAWU seng němutusu měmate si sire.

²⁶Su sěmběkane, i Samuel, anạ e ene, mangkeng kakạsariane, mal᷊aing mangkeng i kẹ̌kapulu, baẹ kahiang MAWU, arau baewe lai kahiang patikụ umate.

²⁷Piạ sěnsul᷊e simongọ e sěngkatau nabi si Eli kụ naul᷊ị u tatanatang MAWU si sie, angkuěngʼE, ”Piạ e i upung u kụ i Harun dingangu walage nakoạ ěllangu ratun Misirẹ̌ e, tangú Iạ e seng mẹ̌těngkatodẹ u watangeng-Ku si Harun.

²⁸ Bọu patiku hěnton Israelẹ̌ e balage sen Takụ nipile nakoạ imang-Ku mědeạu mẹ̌tangkiang su pananěmbaěng, měnutung kamania, ringangu měluheng pakeang u efod,[7] kụ kereu mẹ̌bisara ringang-Ku. Kụ baugi sire ringangkewen pal᷊ahěnton sire e sen Takụ nionggotangu hakẹ̌ e waugu měngal᷊ạ sěnggạ bọu binatang pinotọ kụ nitongkạ sasěmba su pananěmbaěng.

²⁹Kụ, unụ e i kau wědang mapulu-pulu měmanda[8] kal᷊awọu sasěmba kerẹewe seng Takụ nioro, nisěmbang bansa-Ku e si Siạ tangu? Kawe unụ e i kau Eli! něngalembong maadatẹ̌ su manga anạ u e sul᷊ungu si Siạ? dingangu mapakạbalan sire mẹ̌těngkatawang batangeng bọu měngal᷊ạ buạ e wọu apang sasěmbang bansa-Ku kapiaěnge si Siạ e?

³⁰Iạ e kai MAWU Ruatang Israel, nạung seng bọu nẹ̌diandi u walagu e ringangu pamilinu sarung mẹ̌tangkiang si Siạ kere sěngkatau imang baugu sarang karěngụ e. Arawe orasẹ̌ ini e Iạ l᷊ai sen tawẹ kapuluku su hal᷊ẹ̌ ene! Batụu i saing měngadatẹ̌ Siạ e, sarung Takụ adateng, arawe i saing mělẹ̌heghesẹ̌ si Siạ e sarung Takụ heghesang.

³¹Daringihẹ̌ko, sarung midating u tempone Iạ měmate kěbị anạ mangangudạ su ral᷊ungu walage ringangu manga anạ u sẹ̌ngkataunu, hakịu tawẹ u sarang sěngkatau esẹ e su ral᷊ungu walagu e sarung makarating u umbure marangẹ.

³²I kau e sarung kuměndung dingangu měnanoi nakasilo[9] kal᷊awọu al᷊amatẹ̌ kụ sarung ionggọ su taumata wal᷊ine su Israel, kaiso su ral᷊ungu walagu e hala kěbị sarung mate reng mangudạ.

³³Arawe sěngkatau wọu hěntonu e, sarung Takụ i wala wiahẹ̌ dingangu mẹ̌tangkiang si Siạ kere sěngkatau imang. Kaiso i sie[10] sarung mawuta ringangu mẹ̌biahẹ̌ parěnu. Kěbị hěntonu wal᷊ine sarung pateěng.

³⁴Makoạ sěmbaụ tatiala u patikụ apan Takụ iwẹ̌bera ene, těngadẹ̌ bue sarung mariadi, tangú anạ u rarua ene, i Hofni ringangu i Pinehas sarung mate su ral᷊ungu sěhěllo.

³⁵Bọu ene Iạ sarung měmile imang kụ satia si Siạ dingangu mẹ̌kẹ̌koạ apan Takụ i lẹ̌oro si sie. Takụ gěllikang si sie manga pal᷊ahěnto kụ makoạ měmamunara kere imang su těngon manga ratu Takụ pileěng.

³⁶Apang pal᷊ahěnto kụ bědang biahẹ̌ sarung makoạ sol᷊ong anung imang kụ mẹ̌dorong doitẹ̌ dingangu kaěng. I sie sarung mẹ̌dorong: Pakawalako iạ mẹ̌tangkiang manga imang tadeạu iạ makakaěng maningbe kětạeng sěngkatěnggung.”