Read Sangir SAMUEL HUMOTONG 20 Bible Online

SAMUEL HUMOTONG 20 - Sangir bible

SAMUEL HUMOTONG 20

¹Tangú timal᷊angke i Daud bọu Nayot su rěduhu Rama kụ tamai nẹ̌sombangi Yonatan, kụ nakiwal᷊o, ”Kaia sal᷊aku? Karal᷊akisẹ̌ apa nạung sen takụ nikoạ dingangu kai a rosaku si amangu hakịu i sie kawe mapulu měmate si siạ?”

²Sasimbangi Yonatan, ”Kumbahang mẹ̌bera kerene! Baugu MAWU, i kau tawe pateěng. I amangku e hanesẹ̌ mělẹ̌habaru kal᷊awọu karakine si siạ, baewe kahumotongange arau tala. Kụ tawe mariadi i sie měmuning karakine ene e si siạ. Batụu ene, apang kụ iweranu ene e tawẹ katěngadẹ̌!”

³I Daud simimbang,[56] ”I amangu masingkạ kahěngang, i kau e tụtal᷊ěntụ u iạ. Kụ nal᷊ahẹu i sie tawe mapulu měhabaru hal᷊ẹ̌ ene si kau tadeạu i kau e tawe masusa naungu. Manilaing kereapa, waugu MAWU kụ biahẹ̌ e, mamben těngadẹ̌ pẹ̌bawiahẹ̌ku e al᷊ingkai těluhẹ̌ su kotọ u sunge!”

⁴Bọu e nẹ̌berạ e i Yonatan, ”Balạewe apa rorongu e sarung takụ koateng.”

⁵ I Daud e simimbang, ”Kirini, riěllo e kai Sal᷊imbang u Wul᷊ang Buhu, ringangu hinone iạ kumaěng sěngkakaěng dingang i tuan datu. Kaiso kamagengu i kau e kumire, kụ iạ e hědon tamai kụ mẹ̌kěmbuni su wimbaenge sarang karumahi hěbi.

⁶Mạengu i amangu e makiwal᷊o kawe unụ e iạ tawe simongo, pěbera si sie, u iạ e seng nẹ̌dorong loahe si kau mědeạu reng mapul᷊ẹ sarang Betlehem, batụu paị sene e kai pẹ̌koateng tundung sasěmba apan taung baugu walagẹ̌ku.

⁷Kereu ratu e mẹ̌bera, ’Kerenẹ e,’ tangú iạ e sarungbe mal᷊enehẹ̌, kaiso kamagengu i sie e lumangehẹ̌, kasingkạko, u i sie e seng něngal᷊ạ hanggose waugu mapakasilakạ u iạ.

⁸Iạ e makitul᷊ung si kau, watụ u i kadua seng něngikị u riandi su těngom MAWU. Kaiso mạengu iạ nẹ̌sal᷊a, patẹ e iạ, kaiso kumbahangbe i kau měnarakangu iạ e si amangu.”

⁹Sasimbangu i Yonatan, ”Kumbahang matakụ! Mạengu iạ masingkạ-singkạ u i amangku e seng piạ karakine mapakasilakạ i kau e, nal᷊ahẹu sarung takụ ihabarẹ̌ si kau.”

¹⁰Bọu ene i Daud nakiwal᷊o, ”Kai i sai sarung měhabarẹ̌ si siạ manga andene i amangu e simimbahẹ̌ si kau e ringangu mahasa?”

¹¹”Bọete i kitẹ makoạ sarang bimbaenge,” angkuěng i Yonatan. Tangú rimal᷊engke i sire sěngkaral᷊eng sarang bimbaenge.

¹²Bọu e i Yonatan nẹ̌bera si Daud, ”Karimạko MAWU, Ruatang Israelẹ̌ e makoạ sahiding kitẹ![57] Diěllo mal᷊ukadẹ̌ arau karumahi e mangawe su tempo kere ini, iạ sarung mẹ̌tawakal᷊i mědeạu masingkạ u ral᷊ungu naung i amangku. Kereu i sie mẹ̌koạ mapia si kau, iạ e hědong měndingọ u habarẹ̌ si kau.

¹³Kereu i sie kawe piạ ol᷊ange mapakasilakạ i kau nal᷊ahẹu iạ hědong měhabarẹ̌ si kau, tadeạu i kau e lighạ mẹ̌těngkasal᷊amatu watangengu. Karimạko MAWU e měmate si siạ kereu hal᷊ẹ̌ ene tawe koateng. Mal᷊owọko MAWU e mẹ̌tul᷊ung i kau kerẹewe i sie selain nitul᷊unge lai!

¹⁴Kụ kereu iạ bědang biahẹ̌, pẹ̌tahěndungko rianding kaduạ su těngom MAWU ringangu pakasatiako si siạ, kaiso kamagengu iạ e sen tawẹ dise[58]

¹⁵ todẹko satianu e su hiteku sarang marěngụ-děngụ. Kụ kamagengu MAWU e mapakawinasang kěbị sědụu e, ute

¹⁶kumbahangbe pẹ̌darianding kaduạ e mạběsụ. Kamagengu sarang mạběsụ, ute MAWU e sarung měhukung i kau.”[59]

¹⁷Kụ baugu karua sul᷊ene i Yonatan něngoro si Daud pẹ̌dariandi u sarung kuměndagʼi sie, u i sie kuměndagʼi Daud kerẹewe watangenge hala e.

¹⁸Bọu ene nẹ̌berạe i Yonatan si sie, ”Rịěllo e Sal᷊imbangu Wul᷊ang Buhu, kụ nal᷊ahẹu sarung kasingkateng u i kau e tawe simongo, watụ u tampạ u e tawẹ lohone su medang kakanengang;

¹⁹kutẹu l᷊ai karumahing! Ual᷊ingu ene rakọ e sarang tampạ u pẹ̌kakěmbuniangu nạung kal᷊imona e, kụ pahědo su l᷊ikudu niěndukangu watu[60] sene.

²⁰Karumahing iạ hědong maparal᷊engu horom papitị těllum bua sarang těngoʼm batu ene, tabidạu měmitị tẹ̌timonaěng.

²¹Bọu ene hědon takụ irolohẹ̌ manga ěllangku pěmurụ manga horom papitị ene, kụ mạengu iạ maul᷊ị si sie, ’Ei pakaraniko l᷊ai ramahi papitị ene; al᷊ạ e,’ ene mangal᷊ene i kau e mapia kụ botonge makakasěbang. Iạ e mẹ̌salu waugu MAWU kụ biahẹ̌ e watụ u i kau e tawe su ral᷊ungu silakạ manga apa.

²²Kaiso kamagengu iạ e mẹ̌bera su ěllangku, ’Ei pakarauko l᷊ai tamai papitị ene,’ ute ene mangal᷊ene MAWU e měngoro si kau patamai kụ dal᷊engke.

²³Karimạko MAWU e měndiagạ tadeạu i kitẹ e měngumpaedẹ̌ pẹ̌dariandi sutal᷊oarang kaduạ e.”

²⁴Tangú, nẹ̌kěmbunị e i Daud su wimbaenge. Su tempong Sal᷊imbangu Wul᷊ang Buhu, Datu i Saul diměnta su pẹ̌simokol᷊ang.

²⁵Kere wiasane i sie mạiang su rěduhu rarěndung; i Yonatan něngal᷊ạ e tampạ e su těngone,[61] i Abner su sěmběkan Saul, arawe kaderan Daud tawẹ lohone.

²⁶Kaiso i Saul tawe nawohangu hal᷊ẹ̌ ene su ěllo ene, u su ěnnane, ”Aramanung i sie kai manga piạ nihombangenge, hakịu i sie tawe nawurěsi tuhụ pěngangagama.”

²⁷Sěngkarịěllone su ěllo karuane Wul᷊ang Buhu, kaderan Daud mang těbe tawẹ lohone, mase nakiwal᷊ọ e i Saul si Yonatan, ”Kawe unụ e kahěbi ringangu sěhěllo ini i Daud tawe riměnta su pẹ̌sasimokol᷊ange?”

²⁸I Yonatan simimbang, ”I sie kai nẹ̌dorong loahẹ̌ si siạ u kai makoạ sarang Betlehem.

²⁹Angkuěnge, ’Loaheko iạ den tamai, batụu manga anạu sěngkatauku e kai kapẹ̌mẹ̌mantugeng sal᷊imbangu gaghěllị su Betlehem kụ iạ e nioro aparěnta kahian tuhangku. Ual᷊ingu ene, kereu ipakawalanu e, ute iạ e reng tamai mẹ̌sombangu anạu sěngkatauku.’ Kụ kai ene sěbapẹ̌ e hakịu i sie tawe simongo su pẹ̌sasimokol᷊ang ini, Amang.”

³⁰Nakaringihẹ̌ ene i Saul limangehẹ̌ marasai si Yonatan kụ nẹ̌bera si sie, ”Anạ su wela! Ini e nasingkạ e iạ nạung i kau kai mạnumběka si Daud, kụ nakamea si kau ringangu si ninangu!

³¹Kai tawe nakaěnna i kau u karěngụu Daud biahẹ̌, i kau tawe makoạ datu su wanua ini e? Ini tangú pěngoroko taumata pẹ̌deạ si sie ringangu paringangko ramahi, u i sie kai harusẹ̌ pakapate!”

³²Tangú simimbangke i Yonatan, ”Unụe i sie harusẹ̌ mate? Kai rosạ e apa?”

³³Nakaringihẹ̌ ene i Saul něleangkeng běngkone si Yonatan ipěmate, tangu nakahěngangke i Yonatan batụu i amange mamben těnga-těngadẹ̌ mapulu měmate si Daud.

³⁴Tangú nẹ̌bawal᷊uangke matědụ i Yonatan kụ něněntangu medaʼm pẹ̌sasimokol᷊ang e kụ i sie tawe kimaěng apa-apa su ěllo karuane Sal᷊iwang u Wul᷊ang Buhu ene. I sie kahěnga-hěngang měněnaung si Daud kụ seng lẹ̌hinakaneng i Saul i amange.

³⁵Sěngkarịěllone i Yonatan nakoạ sarang bimbaenge nẹ̌sombang i Daud kerẹewe seng nipẹ̌karakin dẹ̌dua. I sie nẹ̌bawa rariọ esẹ sěngkatau ěllange,

³⁶mase nẹ̌bera si sie, ”Hotede, purụ e manga horom papitị kụ seng takụ nipitị.” Ene rariọ ene kạtal᷊ange, i Yonatan seng něngěnạu horom papitị sěmbua limiu rariọ ene.

³⁷Piạ e rariọ ene nahumpạ e su tampạ kinanawoěngu papitị ene, i Yonatan naěnggahe lai si sie, ”Ei, papitị ene pakarauko l᷊ai tamai!

³⁸Pakarol᷊ạko kadodọ, abe tulagẹ̌!” Dariọ ene němurụ e papitị ene kụ nẹ̌sul᷊e su anun tuange.

³⁹Dariọ ene tawe nakaěnna timonang manga wawerang Yonatan ene, kětạeng i Yonatan dẹ̌duang Daud e nakaěnna.

⁴⁰Bọu ene i Yonatan nẹ̌gěllịu papitị ene su rariọ ěndaị kụ něngoro si sie pẹ̌bal᷊ị sarang soa.

⁴¹Dimal᷊engke rariọ e, i Daud siměbang bọu l᷊ikudu niěndukang u watu[62] ene, bọu e nẹ̌suba těllu sul᷊e. Kụ baewe i sie arau lai i Yonatan, i rẹ̌dua e nahungkiạ piạ i rẹ̌dua e kapẹ̌darěngune. Dal᷊umpasiang i Daud limembong kasěllahe wọu ral᷊umpasiang i Yonatan.[63]

⁴²Bọu ene nẹ̌berạe i Yonatan si Daud, ”Karimạko Ruata e mẹ̌tul᷊ung i kau. MAWU e sarung měnal᷊udẹ̌ u i kitẹ dingangu hěntong kitẹ e sěntiniạ měngẹ̌ngumbelẹ pẹ̌darianding kaduạ su těngon Duata.” Nal᷊iung ene rimal᷊engke i Daud ringangu Yonatan mal᷊aing napul᷊ẹ sarang soa.