Read Sangir SAMUEL HUMOTONG 21 Bible Online

SAMUEL HUMOTONG 21 - Sangir bible

SAMUEL HUMOTONG 21

¹ Tangú rimal᷊engke i Daud sarang anung Imang i Ahimelekh su Nob. Dingangu himěkosẹ̌ i Ahimelekh siměbang nẹ̌sombang i Daud, kụ nakiwal᷊o si sie, ”Unụe i kau kawe naramahi sẹ̌sanu?”

²I Daud simimbang, ”Iạ e seng piněnarakanengu hal᷊ẹ̌ sěmbaụ kahian tuang dingangu isẹ̌sěding měhabarẹ̌ si sai-sai mạanung hal᷊ẹ̌ ene. Ual᷊ingu ene taumataku e seng takụ nioro pěngampal᷊ẹ̌ su tampạ sěmbaụ.

³Mẹ̌dorong ampung, iạ e kai mapulu makiwal᷊o; kaěng apa kụ piạ si tuang? Onggotengkong borotẹ̌ limam baụ iạ e arau walạewe měnsang apa piạ sini e.”

⁴Mase angkuěngu imang ene, ”Iạ e tawẹ apa borotẹ̌ biasa, kětạeng borotẹ̌ u sasěmba e piạ; i kau e wotonge měngal᷊ạ, asal᷊u taumatanu e tawe mẹ̌koạ pẹ̌sasěngkapẹ̌tikị buhu-wuhu ini e.”

⁵I Daud simimbang, ”Sembeng kerene i sire tawe mẹ̌koạ ene. Sidutu mạengu i kami e měmunara, taumataku e mẹ̌dẹ̌dariagạ tadeạu i sire e wurěsi tuhụ agama, sumbal᷊iau wiasane ene e kětạeng baugu manga hal᷊ẹ̌ biasa; kutẹu lai hal᷊ẹ̌ kụ těntani kere orasẹ̌ ini!”

⁶ Mase imang ene e něngonggọu borotẹ̌ sasěmba si Daud, batụu piạ si sie e kětạembeng borotẹ̌ kụ isěmba su Ruata, ringangu seng nihengkẹ bọu pananěmbaěng mědeạu awengangu borotẹ̌ buhu. (

⁷Natarangko, i Doëg tau Edom, těmbonangu měndal᷊ukadu binatang i Saul ene sene su ěllo ene waugu mitụ sěmbaụ munarang agama.)

⁸Bọu ene nakiwal᷊ọ e i Daud si Ahimelekh, ”Apa i Tuang mẹ̌děndesọu wěngko arau peda kụ botonge takụ ikapakẹ? Parentan tuan datu ene sěngkělěndị e hakịu iạ e měngkate nẹ̌buạ nẹ̌sasaping kụ sen tawẹ loahe nakapěngal᷊ạ peda arau aghidewe lai wal᷊ine.”

⁹ Mase i Ahimelekh simimbang, ”Iạ e něndesọu pedang Goliat tau Pilistin kụ nipatenu su Wal᷊ang Ela ene; peda ene pai su l᷊ikudu efod, kạpapikungu hekạ. Mạengu i kau e mapulu, měngkate al᷊ạ, u kětạembeng ene e aghidẹ̌ piạ sini e.” Angkuěng i Daud, ”Peda ene e peda kal᷊ěnggihange su patikụ banua, kụ mahịe gěllị si siạ!”

¹⁰Su ěllo l᷊ai ěndaị ene, i Daud timal᷊angu wadange wọu anun Saul, kụ bọu ene nahumpạ e su anung Akhis datun soang Gat.

¹¹ Baugi Akhis nipěhabarengu manga sawohị e kirini, ”Bal᷊inewe i sie ini i Daud, datu su wanuane? Kụ wal᷊inewe waugʼi sie e manga wawine tempo ene němpẹ̌sal᷊ai kapẹ̌kẹ̌kantarị e kirini, ’I Saul němate sědụ e ringangu hiwune, arawe i Daud kawe ringangu pul᷊one hiwu?’ ”

¹² Manga wawera ene měnẹ̌nahaghe tiněnnan Daud, kụ i sie kai natakụ-takụ su Ratu i Akhis.

¹³ Ual᷊ingu ene, su tengon lawọ e i Daud něměllewe pulu. Piạ i sire měnẹ̌nal᷊ukạ měnahang i sie e, i sie al᷊ingkai niwal᷊iuang, kụ měngẹ̌ngaku tukadu soa[64] ringangu napakawalang ědune tụtul᷊aehẹ̌ sarang bianggụ e.

¹⁴Bọu ene i Akhis nẹ̌bera su manga sawohị e, ”I kamene kai tawe nakasilo tau ene kai pulu? Kawe unụe i kamene nẹ̌bawa si sie ramahi?

¹⁵Kai wědang mahal᷊i taumata pulu e su rěduhẹ̌ku, hakịu i kamene kawe mẹ̌bawa sěngkatau pulu e kapia sarang bal᷊eku ini e?”