Read Sangir SAMUEL HUMOTONG 22 Bible Online

SAMUEL HUMOTONG 22 - Sangir bible

SAMUEL HUMOTONG 22

¹ Bọu ene i Daud něněntangu soang Gat dingangu nẹ̌kěmbuni su liang maraning soang Adulam. Piạ e tuhange ringangu kal᷊awọu walage nakaringihẹ̌ u i sie e ene sene, riměntạ e i sire su anun sie.

²Kerene lai apan taumata kụ sẹ̌sědakeng, apam piạ utange, ringangu apang makạpěndangu tawe masasahe, kěbị e nẹ̌komol᷊e dingang i Daud, kụ i Daud nakoạ pangahạ i sire e. Dekenangu tumatol᷊e si Daud e mangawe 400 su kataune.

³Bọu liang ene i Daud nakoạ sarang Mizpa su Moab dingangu nẹ̌bera su ratum banuang Moab, ”Loaheko i amang dingangu i ninangu ěllangu e matanạ su anun Tuangku; sarang ěllangu e masingkạ kai apa timonang Duata e waugu ěllang.”

⁴Bọu ene gaghurange ene nịbawawane su anun datung banuang Moab, dingangu i sire e těbewe paị sene karěngụ u i Daud mẹ̌kẹ̌kěmbuni su liang.

⁵Piạ su sěhěllo sěngkatau nabi kụ arenge i Gad diměnta su anun Daud dingangu nẹ̌bera, ”Abe katanạ su liang ini, dakọko kal᷊ighạ sarang ěntanang Yehuda.” Tangú rimal᷊engke i Daud kụ simuẹ̌ sarang kěhung Keret.

⁶Piạ su sěhěllo i Saul mạiang su al᷊ungu kalung tamariska su wowom bukide su Gibea; i sie mělẹ̌hěgo wěngkone těntal᷊ang kěbị pěrwirane rụdarisị mạngělikụ e. Piạ i sie nakaringihẹ̌ u tampạ i Daud dingangu taumatane e seng nikasingkateng,

⁷i sie nẹ̌bera su manga pěrwira ene e, ”Daringihẹ̌ko, ei taumatan Benyamin! I Daud ene e měngonggọ bue si kau e rahami ringangu waelu anggorẹ̌ e? I kamene kěbị e sarungbe ihengkẹ makoạ pěrwira su sordadone?

⁸Kai ual᷊ingu ene tangú i kamene sěngkanaung měndokạ siạ dingangu tawẹ u sarang sěngkatau kụ měhabarẹ̌ si siạ u anạku e hala, seng nanumběka si Daud ene? Tawẹ u sarang sěngkatau wọʼi kamene e mẹ̌tiněnnang batangengku arau měhabarẹ̌ si siạ u i Daud, taumataku e hala, kụ orasẹ̌ ini kapẹ̌ngampal᷊e lěsabe waugu měmate si siạ, dingangu uade ahusẹ̌ku i Yonatan seng něngonggọu wawahansang si sie!”

⁹ I Doëg těmbonangu lukadu binatang i Saul, mal᷊aing ene sene ringangu apam pěrwiran Saul, bọu e i Doëg nẹ̌bera, ”Ěllange seng nakasilo si Daud diměnta su anung Ahimelekh anạ i Ahitub su Nob.

¹⁰I Ahimelekh nẹ̌dorong tatumbal᷊ung su MAWU mạanung apa harusẹ̌ koateng i Daud. Su l᷊iung ene i Daud e nisinasakengu kaěng lai ringangu nionggọ si sie pedang Goliat, tau Pilistin ene.”

¹¹Mase ratu e něngoro pinẹ̌kui su Imang i Ahimelekh dingangu kal᷊awọu manga anạu sěngkataune kụ nakoạ imang su Nob; tangú nẹ̌těngọ e i sire e si sie.

¹²Angkuěng i Saul si Ahimelekh, ”Daringihẹ̌ko ei anạ i Ahitub!” Sasimbange, ”Ore, Tuang.”

¹³Kakiwal᷊ong Saul si sie, ”Unụe i kau e sěngkanaung dingangi Daud dumokạ si siạ? Unụe nisinasakengu e i sie ringangu borotẹ̌ kụ nionggotangu peda, ore lai nirorongangu sasal᷊ěntihọ bọu Mawu Ruata? Kụ ini e i sie rumokạ si siạ kụ kapẹ̌dẹ̌deạe lěsabe waugu měmate si siạ.”

¹⁴Mase i Ahimelekh simimbang, ”Kai wal᷊inewe i Daud tangú pěrwiran Tuang kasatiaěnge? I sie kawe anạ i Tuang mirarating, těmbonangu[65] měndal᷊ukadẹ̌ si Tuang dingangu limembong lẹ̌adateng u patikụ taumata su ral᷊ungu istanan Tuang.

¹⁵Mamben těngadẹ̌, ěllange seng nẹ̌dorong pělal᷊ahẹ e wọu Mawu Ruata e waugʼi sie, kaiso wal᷊inewe waugu kahumotongange[66] ěllange nẹ̌koạ ene. Mạanung hal᷊ẹ̌ u pẹ̌sasěngkanaung dumokạ si Tuange, abe kawe i Tuang měngěnsilẹ̌ si siạ arau lai pẹ̌sěngkatau wal᷊ine su ral᷊ungu walagʼi siạ. Ěllange wěgangbeng apa-apa su hal᷊ẹ̌ ene!”

¹⁶Kaiso ratu e nẹ̌bera, ”Ahimelekh! I kau ringangu kal᷊awọu manga anạ u sěngkataunu e harusẹ̌ mate.”

¹⁷Mase i sie nẹ̌parenta su manga měndal᷊ukadẹ̌ kụ mạhundarisị su rěduhe, ”Hotede patẹ e manga imangu MAWU ene! I sire seng nẹ̌sěngkanaung dingang i Daud. I sire masingkạ u i Daud timal᷊angu wadange, kaiso i sire e madiri měhabarẹ̌ si siạ.” Arawe apang měndariagạ ene madiri měmate manga imangu MAWU ene.

¹⁸Ual᷊ingu ene nẹ̌berạ e i Saul si Doëg, ”Hotede lighạ e! I kau e pěmate si sire!” Tangú tamaị e i Doëg kụ němate e manga imang ene. Su ěllo ene i sie napakawihuang ual᷊um pul᷊o l᷊ima su kataune imang kụ piạ buạ e mẹ̌pakẹ u pakeang efod.

¹⁹I Saul mal᷊aing nẹ̌parenta waugu pěmate kal᷊awọu tumanạu Nob, soang imang ene; manga esẹ, manga wawine, manga rariọ, dingangu manga rariọ darodọ, manga sapi, kalide ringangu domba, kěbị e pinakasue niawane.

²⁰Kětạeng i Abyatar sěngkatau wọu manga anạ i Ahimelekh nal᷊iwirẹ̌. I sie timal᷊angu watangenge sarang anun Daud,

²¹bọu ene něhabarẹ̌ u Saul seng němate manga imang u MAWU.

²²Tangú nẹ̌berạe i Daud si sie, ”Piạ e kinasiloku i Doëg paị sene sěhěllo ene, nasingkạ e iạ kụ mal᷊ahẹ u i sie e sarung měhabarẹ̌ si Saul, u kawe iạ e makoạ tumanggihu[67] papateng manga anạu sěngkataunu.

²³Katanạ e ringangku e kụ abe katakụ. I Saul mapulu měmate si kau, kaiso i sie mal᷊aing mapulu měmate si siạ. Kụ i kau sarung mal᷊enehẹ̌ su tampạku.”