Read Sangir SAMUEL HUMOTONG 23 Bible Online

SAMUEL HUMOTONG 23 - Sangir bible

SAMUEL HUMOTONG 23

¹Piạ sěhěllo nihabarẹ̌ si Daud u tau Pilistin něngalo su soang Kehila ringangu němul᷊aho gandung kụ buhụe niharesẹ̌.

²Mase nakiwal᷊ọ e i sie su MAWU, ”Kai harusẹ̌ iạ pěngalo tau Pilistin tangú?” ”Ore,” angkuěngu MAWU, ”alo e i sire kụ ambangeko tumanạ u Kehila.”

³Arawe taumatan Daud nẹ̌bera si sie, ”Buhụe sini su Yehuda, i kitẹ e seng matakụ-takụ; něngalembọete kamagengu i kitẹ tamai měnekẹ sordadong Pilistin su Kehila.”

⁴Ual᷊ingu ene sěnsul᷊ẹko l᷊ai i Daud mẹ̌dorong tatumbal᷊ung bọu MAWU, kụ MAWU e simimbang, ”Abe ghěnggang. Seketẹ e soang Kehila, batụu sordadong Pilistin ene e hědon Takụ isarakang si kau.”

⁵Tangú tamaị e i Daud dingangu taumatane sarang Kehila kụ bọu ene niseketange, ringangu nịpapatene tau Pilistin mal᷊awọ, kụ nipul᷊ahone manga binatang i sire. Kerene i Daud něliwiru tumanạ u soa ene.

⁶Piạ i Abyatar anạ i Ahimelekh timal᷊angu wadange su anun Daud, dingangu timaking si Daud sarang Kehila, i sie mal᷊aing nẹ̌bawa efod.

⁷Piạ e nihabarẹ̌ si Saul u i Daud kai ene su Kehila, su tiněnnan Saul, ”I Daud seng nisarakang u Ruata e si siạ. I sie nikahěgateng ual᷊ingu kai seng nasowa su ral᷊ungu soa kụ piạ mesele ringangu piạ tukadu pasěllangenge.”

⁸Mase i Saul napasěbangu sordadone kụ nẹ̌buạ sarang Kehila waugu měnal᷊iwung si Daud dingangu kěbị taumatane.

⁹Arawe i Daud seng masingkạ u i Saul piạ ol᷊ange ral᷊akisẹ̌ si sie. Ual᷊ingu ene i sie nẹ̌bera su Imang i Abyatar, ”Bawạe efod ene ramahi.”

¹⁰Mase nẹ̌kal᷊iomanengke i Daud, ”MAWU, Ruatang Israel, iạ nakaringihẹ̌ u i Saul piạ ol᷊ange mědeạu ruměnta sarang Kehila kụ mapakawinasang soa ene ual᷊ingu iạ, ěllangʼU.

¹¹Kahěngang bue habarẹ̌ takụ kinaringihẹ̌ ene? MAWU, Ruatang Israel, karimạko měhabarẹ̌ si siạ.” MAWU e simimbang, ”Ore, i Saul sarung duměnta.” Mase kakiwal᷊on Daud kapia, ”Ěnnaěng kawanuang soang Kehila e měnarakangu iạ dingangu taumataku e si Saul?” Tangú MAWU e simimbangu, ”Ore.”

¹³Mase i Daud dingangu taumatane mangawe ěnnung u hasụ su kataune, masahawụ něněntangu Kehila ringangu nẹ̌palilị bọu tampạ sěmbaụ sarang tampạ bal᷊ine. Ene i Saul nakaringihe u i Daud seng něněntangu Kehila, i sie němetọ ol᷊angu pěnanekẹ e.

¹⁴Nal᷊iung ene i Daud nẹ̌tanạ su manga liang su wawul᷊urange su kěhu linggin Zif. I sie hanesẹ̌ sẹ̌sahusuang i Saul, kaiso MAWU e tawe měnarakang i sie su ratu ene.

¹⁵Maningbe kerene i Daud mal᷊aing mạtakụ batụu i Saul mang mědeạu měmate si sie. Piạ tempo sěnsul᷊ẹ i Daud su Hores su kěhu l᷊inggin Zif.

¹⁶I Yonatan tamai nẹ̌sombang i sie sene tadeạu měnoghasẹ̌ pěngangimange u i sie sarungbe těntanudangu Mawu.

¹⁷Angkuěng i Yonatan si sie, ”Abe katakụ, i kau tawe sarung manawo su l᷊imang amangku. I sie masingkạ-singkạ u i kau e sarung makoạ datung Israel dingangu iạ e sarung piạ kal᷊aianengku su al᷊ungu.”

¹⁸ Bọu ene i Daud dingangi Yonatan něngikị u rianding pẹ̌dal᷊ahapị su těngong MAWU. Bọu ene i Yonatan napul᷊ẹ sarang bal᷊ene, arawe i Daud těbewe mạtanạ su Hores.

¹⁹ Bọu ene pirang katau wọu Zif nẹ̌těngon Saul su Gibea ringangu nẹ̌bera, ”I Daud nẹ̌kěmbuni su wanuang kami su ral᷊ungu manga liang su rěduhu Hores, su wowom Bul᷊udu Hakhila sěmběkan timuhẹ̌ bọu kěhu linggin Yehuda.

²⁰I kami masingkạ, u i Tuang mapulu-pulu měnamẹ si sie; ual᷊ingu ene, riměntạ e su wanuang kami. I kami e mělẹ̌harapẹ̌ u i Tuang mang makal᷊ikosẹ̌.”

²¹I Saul simimbang, ”Mal᷊owọko i kamene al᷊amatengu MAWU ual᷊ingu nẹ̌koạ mapia si siạ!

²²Dakọ e ringangu pakatantuko kahěngang parikěsaiko pakapia měnsang suapa i Daud, dingangu měnsang i sai seng nakasilo paị sene. Iạ nakaringihẹ̌ i sie kai pelesa kahěngang.

²³Kụ, sẹ̌suieko pakapia-pia suapang liang kụ bọu nakoạ tampạu pẹ̌kakěmbuniange, ringangu pẹ̌bal᷊ị e ramahi kụ pěhabarẹ̌ si siạ. Mase iạ hědon tamai sěngkatamai ringang i kamene, kụ mạengu i sie wědang ene su tampạ ene, nal᷊ahẹu mang takụ deakeng, manilaing harusẹ̌ takụ gagholangeng kasěllahu Yehuda!”

²⁴Tangú nẹ̌buạ e i sire ene kapia sarang Zif něngal᷊imona si Saul. Su tempo ene i Daud dingangu taumatane ene su kěhu linggin Maon, su wal᷊ane mal᷊ingungu su wanua sěmběkan timuhẹ̌ bọu kěhu linggin Yehuda.

²⁵I Saul dingangu sordadone riměnta mědeạ si Daud, arawe taumata e něhabaru hal᷊ẹ̌ ene si Daud, hakịu i sie nakoạ sarang bul᷊udu watu su kěhu l᷊inggin Maon dingangu natanạ sene. Sarětạeng i Saul nakakasingkạ e hal᷊ẹ̌ ene, i sie masahawụ lighạ něnahusu si Daud.

²⁶I Saul dingangu sordadone rụdal᷊eng su wiwihu wul᷊ude sěmběka sini arawe i Daud dingangu taumatane su wiwihe sěmběka pai. I Daud masahawụ-sahawụ nakatal᷊ang bọʼi Saul kụ seng něnětạ měmpěnamẹ si sire.

²⁷Kaiso sěngkělěndịu piạ sěngkatau rarolohang nẹ̌těngon Saul kụ nẹ̌bera, ”Mapiawe i Tuang lighạ pẹ̌bal᷊ị! Tau Pilistin kai seng měnekẹ su wanuang kitẹ!”

²⁸Tangú i Saul něngědọ e něnahusu si Daud, kụ tamai nẹ̌sekẹ něndokạewe tau Pilistin. Kụ kai ual᷊ingu ene hakịu tampạ ene nisěbạ Bul᷊udu Pẹ̌tal᷊eiang.