Read Sangir SAMUEL HUMOTONG 24 Bible Online

SAMUEL HUMOTONG 24 - Sangir bible

SAMUEL HUMOTONG 24

¹Bọu ene i Daud nakoạ sarang banuang En-Gedi, kụ nẹ̌kěmbuni su manga liang.

²Piạ e i Saul wuhụewe napul᷊ẹ bọu pẹ̌seketang dimokạ tau Pilistin, i sie nakatarimạ habarẹ̌ u i Daud kai ene su kěhu l᷊inggi maraning En-Gedi.

³ Masahawụ i Saul němile těllu hiwu su kataune tahapẹ̌sekẹ kapapiaěnge wọu kasěllahu Israel, bọu ene nẹ̌buạ nẹ̌deạ si Daud dingangu taumatane su sěmběkan dakị wọu Wul᷊udu Watung Kambing u Kěhu.

⁴Tangú nahumpạ e i Saul su rěduhu manga kandangu domba piram baụ su wiwihu ral᷊eng. Paị sene piạko l᷊ai liang sěmbaụ, dingangu i Saul simuẹ̌ kụ sumea. Kụ natarangko su piạ i Daud dingangu taumatane kapẹ̌kẹ̌kěmbunine su liang ene, katewe pakaral᷊ungko l᷊ai.

⁵Bọu e nẹ̌berạ e taumatan Daud si sie, ”Seng ini tempone si Amang! Kai wal᷊inewe MAWU seng nẹ̌bera si Amang kere ini, ’Sědụ u e sarung Takụ i sarakang si kau, pẹ̌koạ e tuhụ kapulunu si sie!’ ” Bọu e i Daud němul᷊inạ sol᷊ong tampạ i Saul kụ dingangu marěmasẹ̌ něnahing kadodọ biwihu kakingkaeng i Saul.

⁶Arawe wọu ene, i Daud nakapěndang nẹ̌sal᷊a ual᷊ingu i sie seng nẹ̌koạ hal᷊ẹ̌ ene.

⁷I sie nẹ̌bera su taumatane, ”Mal᷊owọko MAWU e měndiagạ kumbahang sarang iạ mẹ̌koạ dal᷊akisẹ̌ e waugu ratuku e kụ seng nipilem MAWU. Manilaing kadodọ kai tawe wotonge iạ e mapakatědụ i sie, batụu i sie kai ratu nipilem MAWU!”

⁸Kerene kakakoạ i Daud mapakal᷊enehu taumatane, ringangu tawe mapakawalan sire pěndokạ si Saul. I Saul nẹ̌bal᷊ikěkasẹ̌ kụ něněntangu liang ene, naněpasẹ̌ daral᷊enge.

⁹I Daud mal᷊aing siměbang bọu liang ene nẹ̌kiạ su l᷊ikudi Saul, ”Tuan Datu!”

¹⁰I Saul nẹ̌bihu sarang likude ringangu i Daud nẹ̌tumpěkuhẹ̌ dingangu adatẹ̌ bọu ene nẹ̌bera u, ”Unụe i Tuang e kawe rụdaringihẹ̌ bisaran taumata kụ mẹ̌bẹ̌bera u ěllang e kawe měnilakạ si Tuang?

¹¹Ini e i Tuang sẹ̌sane seng nakapěndang hala, watụ u su ral᷊ungu liang kanini, MAWU e seng něnarakang i Tuang si siạ. Iạ seng lẹ̌ologangu sěngkatau pěmẹ̌mate si Tuang, kaiso ěllang e tawe mapulu. Ěllang e kai simimbangu ěllang e tawe mapulu mapakatědụu ratung ěllang kụ nipileng MAWU.

¹²Kakěllạe, i Amangku! Kakěllạe sahingu kakingkaeng i Tuang kụ lẹ̌umpaedangu ěllang ini! Tumuhụ hinone ěllang e botonge makapate si Tuang, katewe ěllang e kětạeng něnahing kadodọ biwihu kakingkaeng i Tuang. Kụ nal᷊ahẹ e u ěllang e tawe timona ral᷊akisẹ̌ arau lai mẹ̌duruhaka. I Tuang datu e sěntiniạ měnẹ̌nahusu si siạ, mědeạu měmate si siạ, manilaing ěllang e tawẹ sal᷊ane sarang kadodọ baugʼi Tuang.

¹³Karimạko MAWU e měmutusu i sai sutal᷊oarang kitẹ e nẹ̌sal᷊a. Milumbạko MAWU e měmal᷊isẹ̌ kakanoạ i Tuang su ěllang, katewe manilaing sarang kadodọ kai ěllangu tawe sarung mapakatědụ i Tuang.

¹⁴I Tuan datu masingkạ u sasaili nạung kal᷊imonane ini, ’karal᷊akisẹ̌ e kětạeng kẹ̌koatengu taumata ral᷊akisẹ̌.’ Ual᷊ingu ene ěllangu tawe sarung mapakatědụ i Tuang.

¹⁵Tatinganẹ e kawe ěllang ini e pateěngu ratung Israel! Kakěllạe kawe ěllang ini e, sẹ̌sahusuange! Ěllang e kawe kětạeng asu nate sěmbaụ, kutu sěmbaụ.

¹⁶MAWU e sarung makoạ mělahukung su tal᷊oarang Tuang dingangu ěllang. Karimạko i Sie měmarikẹ̌sa pěrkara ini, ringangu manumběka su ěllang ore lai měngambang ěllang ini e wọʼi Tuang.”

¹⁷Sarětạeng i Daud nasueng luane kal᷊awọu wawerane e, nẹ̌berạe i Saul, ”Kai nạung i kau e, ei Daud anạku?” Mase simangị e i sie.

¹⁸Tangú angkuěnge si Daud, ”I kau e nihino, arawe iạ e nẹ̌sal᷊a.

¹⁹Kararal᷊akisẹ̌ku si kau e seng niwal᷊isangu e ringangu kapia. Su ěllo ini e i kau seng něnodẹu i kau piạ timonanu mapia e si siạ, u i kau e tawe němate si siạ, manilaing MAWU e seng něnarakangu iạ si kau.

²⁰Apa mahal᷊i pẹ̌sěngkatau mẹ̌sombangu sědụ e kaiso kawe iwala sědụ e ene pẹ̌biahẹ̌! Kụ mal᷊owọko MAWU e měngal᷊amatẹ̌ si kau, ual᷊ingu kakanoạ u e mapia si siạ sěhěllo ini!

²¹Ini e iạ e maiakingu i kau e sarung makoạ datu su Israelẹ̌ dingangu kararatuangu Israelẹ̌ e sarung těbe matoghasẹ̌ su al᷊ungu parentanu.

²²Ini e pẹ̌kědọ e si siạ baugu MAWU, u i kau e tawe měmate hěntoku e, ringangu lai tawe sarung měngěmụ u arengu walagẹ̌ku e!”

²³Mase nẹ̌salụ e i Daud sarung měndal᷊engu hal᷊ẹ̌ ene. Bọu ene napul᷊ẹ e i Saul sarang bal᷊ene, ringangu i Daud dingangkewen taumatane mal᷊aing němpẹ̌sul᷊e sarang tampạ u pẹ̌kakěmbuniange.