Read Sangir SAMUEL HUMOTONG 25 Bible Online

SAMUEL HUMOTONG 25 - Sangir bible

SAMUEL HUMOTONG 25

¹Tawe nararěnnạ wọu ene i Samuel naněntang. Kasěllahu Israelẹ̌ e nẹ̌tampung baugu tumol᷊e měhampugẹ̌. Bọu ene i sie nilěbing su wal᷊ene su Rama. Bọu ene i Daud nakoạ sarang kěhu l᷊inggim Paran.

²Su soang Maon piạ sěngkatau esẹ bọu ghal᷊ipohong Kaleb arenge i Nabal. I sie piạ ěntanane waugu pěhikinang binatang su rěduhu soang Karmel. I sie e kalạ-kalạ kụ piạ dombane těllu hiwu su waụ e, ringangu kambing sěhiwu su waụ e. I Abigail kawinge, pande o kawe lai masadadạ, arawe i Nabal kai matětogẹ̌ dingangu ral᷊akisẹ̌ lulune. Piạ su sěhěllo i Nabal kapẹ̌gěngguntinge rukụ u dombane su Karmel.

⁴Piạ i Daud kụ ene su kěhu l᷊inggi e, nakaringihẹ̌ hal᷊ẹ̌ ene,

⁵i sie něngoro si sire laumbaseng mapul᷊ong katau pakakoạ sarang Karmel,

⁶pẹ̌sombang i Nabal baugu pěhabaru adatʼi Daud si sie. I sie něngoro si sire pěbẹ̌bera kere ini si Nabal, ”Karal᷊unsemahẹ̌ si kau ringangu walagu ore kal᷊awọu tataghuanengu.

⁷Iạ nakaringihẹ̌ u i kau e kapẹ̌gěngguntinge rukụ u dombanu. Kasingkạ e u manga měndal᷊ukadu e kụ ene su wanuang kami, tawe nisẹ̌sahagheěng i kami e, ringangu lai i sire tawe nikẹ̌kailangengu apal᷊iwụ manga e apạ e karěngụu i sire ene su Karmel.

⁸Měngkate pěnal᷊ukạ pakiwal᷊o si sire nal᷊ahẹu i sire e sarung mapakatěngadu hal᷊ẹ̌ ene. Ual᷊ingu ene, lẹ̌harapeng tadeạu taumataku e itarimạbe mapia su wal᷊enu, ual᷊ingu i kami e riměnta su ěllo gẹ̌guwạ ini. Gěllịko l᷊ai su manga ěllangu ini e ringangu si siạ, i Daud hapịu mapia e, walạewe tuhụ haěngu naungu e.”

⁹Nahumpạ e su Karmel, taumatan Daud něhabaru tatanata ini si Nabal su areng i Daud, bọu e i sire něngampal᷊ẹ̌.

¹⁰Arawe i Nabal simimbang, ”Daud? I sai i sie? I sai ene anạ i Isai? Tawẹ nakạdingihẹ̌ iạ e kereapa i sie? Orasẹ̌ ini mal᷊awọ paparentaěng e mahuntal᷊ang bọu anum mawune su wanua ini!

¹¹Makoạbe kereapa iạ měngal᷊ạ borotẹ̌ dingangu akẹ u inumangku e, ore lai gěsi kụ seng takụ nisadia waugu apang měnggaghuntingku, wọu ene takụ gělikang kěbị ene su taumata kụ tawe nal᷊ahẹ salakẹ̌boěnge!”

¹²Tangú taumatan Daud ene nẹ̌bal᷊ị su anun Daud dingangu něhabarẹ̌ si sie manga waweran Nabal ene.

¹³”Ehẹko pedanu su kal᷊uwaengu sěngkatau-sěngkatau!” parentan Daud. Tawe nararěnnạ taumatane rimaringihẹ̌ parenta ene. I Daud mal᷊aing něngehẹ pedane su kal᷊uwaenge ringangu nẹ̌buạ, kụ manga ěpạ u hasụ su kataune, arawe rua hasụ su kataune e natanạ baugu měndiagạ apal᷊iwụ.

¹⁴Těntal᷊ang ene waugʼi Abigail kawing i Nabal seng nipaul᷊ikang u sěngkatau mẹ̌tatangkiang si Nabal, kirini, ”Seng nakaringihẹ̌ i Wawụ? I Daud seng něngoro pirang katau rarolohang bọu kěhu l᷊inggi waugu pẹ̌gẹ̌gěllị u adatẹ̌ si tuang i kitẹ, kaiso sạgurang ene kawe nẹ̌parohang si sire.

¹⁵Sumbal᷊iau i sire e kawe kereng kapiane si kami. I kami e tawe nipẹ̌kẹ̌kapuraneng, dingangu tawe nikẹ̌kailangengu manga e apạ e piạ i kami e mẹ̌dẹ̌dal᷊ahapị i sire su kěhu l᷊inggi.

¹⁶Ěllo hěbi i sire mạněntanudẹ̌ si kami karěngụeweng i kami e měngẹ̌ngahạ kambing domba su rěduhʼi sire.

¹⁷Ual᷊ingu ene, timbange wue hal᷊ẹ̌ ini, dingangu pěmutusẹ̌ko měnsang apa hinong ikakoạ i Wawụ. Batụu nal᷊ahẹ u sarung duměnta wawal᷊ise waugʼi tuang i kitẹ e ringangu kal᷊awọu walage. I Tuang i kitẹ e tumanịu makětị těmbọ e hakịu taumatane mambeng masigěsạ ahakeng pẹ̌bera!”

¹⁸Mase i Abigail něngal᷊ạ e borotẹ̌ dua hasụ, dingangu kawihẹ̌ pisị rarua lohong akẹ u anggorẹ̌, domba sẹ̌sahabeng limam baụ, gandung tinapa mapul᷊o pitu su kilone, buang anggorẹ̌ mahěgu e mahasụ su pohọ e, ringangu kukisẹ̌ ara e rua hasụ su waụ e. Kěbị ene e nilurang su wowong manga kalidene.

¹⁹Mase nẹ̌berạe i sie su manga mẹ̌tatangkiange, ”I kamene rimal᷊eng něngal᷊imona si siạ; iạ e sarung tumol᷊e si kau.” Katewe i sie e tawe nẹ̌berang manga apa su kawinge.

²⁰I Abigail simake kalidene, kụ piạ i sie nahumpạ e su pěmikuange sěmbaụ su wiwihu wul᷊ude, nẹ̌gaghal᷊isạ e i sie ringang i Daud ore lai manga taumatane kụ seng kạl᷊intụ e mẹ̌tẹ̌timona si sie.

²¹Su tempo ene i Daud kapětẹ̌tiněnnane, ”Tawẹ gunane iạ měndiagạ tataghuanengu tau ene su kěhu l᷊inggi! Tawẹ apa sarang manga kạdodọ kụ nailang bọu tataghuanenge, ringangu orasẹ̌ ini e niwal᷊isange kapiaku e ringangu karal᷊akisẹ̌!

²²Karimạko Ruata e měmate si siạ[68] kereu tawe takụ pateěng kěbị manga esẹ apang ene paị sene kal᷊imonang matangěllo suměbang!”

²³Piạ i Abigail nakasilo si Daud, i sie apidu limintụ bọu kalidene kụ nẹ̌tumpěkuhẹ̌ su l᷊aedʼi Daud,

²⁴apidu nẹ̌bera si sie, ”Tuangku, karimạko reng dumaringihẹ̌! Balạekere pẹ̌sasal᷊a ene e ěllang e měnal᷊udẹ̌ hala!

²⁵Abe tiněnnain Tuangku e i Nabal, taumata kụ tawẹ kěhase ene! I sie kai taumata wodo[69] — mẹ̌sul᷊ungu mangal᷊eng arenge. Ěllang e tawe nakasilo manga rarolohang kụ nioron Tuangku ene.

²⁶Duata e seng něneheng si Tuangku e kụ měnẹ̌nuntụ bawal᷊ise ringangu němate manga sědụ i Tuang. Kụ orasẹ̌ ini i Tuangku e, waugu MAWU kụ biahẹ̌, ěllangu e mẹ̌salu, karimạko tilakehu wiahu kal᷊awọu sědụ i Tuangku e, ringangu apan taumata kụ mapulu měnilakạ si Tuangku e mẹ̌sul᷊ungu kere tilakehu pẹ̌bawiahʼi Nabal.

²⁷Tarimạko gaghěllị kụ niwawang ěllangu ini e waugʼi Tuangku, ringangu taumatan Tuangku e.

²⁸Abe resọ su naung kumbalang ěllang. MAWU e nal᷊ahẹ u sarung mapakariadin Tuangku e ringangu pal᷊ahiten Tuangku e ratu su Israel, batụu i Tuangku e mẹ̌sekẹ baugu MAWU; ringangu i Tuangku e tawe sarung mẹ̌koạ dal᷊akisẹ̌ e[70] kananduʼm pẹ̌bawiahẹ̌.

²⁹Manga andene sěngkatau e měngalo si Tuangku ringangu mẹ̌deạu měmate si Tuangku e, tangú i Tuangku e nal᷊ahẹu sarung těntanurangu MAWU Ruata, mẹ̌sul᷊ungu arětạ kụ dẹ̌diagatengu taghuange. Arawe sědụ i Tuangku e sarung irěmmẹ pakarau-rau karạ u MAWU, nirěmmẹ u naěnakeng.

³⁰MAWU e sarung mẹ̌koạ kal᷊awọu kapia nạung seng nikědonʼE si Tuangku, kụ sen tawẹ kạděngụ e lai i Tuangku e hengketangʼE makoạ datu su Israel.

³¹Su tempo ene i Tuangku e sarung mẹ̌tahěndung u i Tuangku tawe měmate kụ tawẹ apa wanggile arau měhukung tuhụ kapulum batangenge hala hakịu i Tuangku e ta wahal᷊uasu makapěndang masusa arau mẹ̌sasěsilẹ̌. Dingangu kamagengu MAWU e seng něngal᷊amatẹ̌ si Tuangku ute kumbahangbe miwul᷊eng ěllang i Tuangku ini!”

³²Mase nẹ̌berạ e i Daud si sie, ”Karaloko MAWU e, Duatang Israel, kụ něndolohʼi kau e nẹ̌sombangu iạ sěhěllo ini!

³³Karaloko kapelesanu, ringangu karaloko l᷊ai i kau e hala ual᷊ingu seng něněheng si siạ tamai měmate ore lai měhukung i sire tuhụ kapulum batangeng hala.

³⁴MAWU e seng něnguhung si siạ kụ mẹ̌koạ dal᷊akisẹ̌ e si kau. Su arengu MAWU, Ruatang Israelẹ̌ kụ biahẹ̌ e, manga andene i kau tawe lighạ nẹ̌sombangu iạ e, nal᷊ahẹu kal᷊awọu taumatang Nabal seng nate su tempong matangěllo siměbang!”

³⁵Bọu ene i Daud něnarimạ u apang niwawang Abigail baugi sie, kụ nẹ̌berạe si sie, ”Kapul᷊ẹ e sarang bal᷊enu kụ abe ghěnggang. Dorongu e takụ daringihang.”

³⁶Piạ i Abigail nawal᷊ị su anung Nabal, nal᷊ahẹu nạung kai piạ sal᷊imbang gẹ̌guwạ su wal᷊ene, al᷊ingkai sal᷊imbang masěllahẹ̌. Kụ ual᷊ingu i Nabal kawe wukang dingangu kạpẹ̌dal᷊uase, kahiang kawinge tawe nipaul᷊ikangu manga apa sarang sěngkarịěllone.

³⁷Namal᷊ukade, sarangke i Nabal seng napuasẹ̌ bukange, kawinge naul᷊ị e si sie mạanung kal᷊awọu kararal᷊akisẹ̌ ene. Bọu e i Nabal nakaěbạe sakị u pẹ̌puso ringangu kạguwạu wadange nipatene.

³⁸Manga mapul᷊o ěllo samuring ene, i Nabal nakahombang tatanggang sakịu pẹ̌puso kapia wọu MAWU hakịu i sie nate.

³⁹Piạ i Daud nakaringihẹ̌ u i Nabal kai seng nate, nẹ̌berạe i sie, ”Karaloko MAWU! I sie seng němal᷊isẹ̌ lahinakang kụ nikoạ i Nabal si siạ, kụ seng němetọ ěllangʼE ini e mẹ̌koạ dal᷊akisẹ̌ e. MAWU e seng něhukung si Nabal ual᷊ingu karal᷊akisẹ̌.” Bọu ene i Daud naparal᷊engu rarolohange sarang anung Abigail apạdal᷊engu wera si sie makoạ kawinge.

⁴⁰Tangú nahumpạ e rarolohang i Daud su wawine ene su Karmel kụ nẹ̌berạe si sie, ”I kami e nirolohʼi Daud, pẹ̌tẹ̌těngong Bawụ, batụu i sie kai lụěnningu mẹ̌dorong si Wawụ makoạ kawinge.”

⁴¹I Abigail nẹ̌pẹ̌tị kụ nẹ̌tumpěkuhẹ̌ dingangu nẹ̌bera, ”Iạ ini e ěllang i Daud, kụ sadia měnguhasẹ̌ laedu manga ěllange.”

⁴²Bọu e i sie apidu nẹ̌dariahi. I sie taraị nawị sarang bowong kalidene, kụ nitakinangu kokị e manga wawine i sire limang katau, kụ nẹ̌buạ e i sie timol᷊e rarolohang i Daud, tangú i sie nakoạ e kawingʼi Daud.

⁴³Kal᷊imonang ene e i Daud seng nẹ̌kawing i Ahinoam bọu Yisreel, kụ ini e i Abigail mal᷊aing nakoạ kawinge.

⁴⁴Nẹ̌tatapengu l᷊ai tempo ene i Saul seng napẹ̌kawingu sangiange i Mikhal, kawingi Daud, dingang i Palti, anạ i Lais bọu soang Galim.