Read Sangir SAMUEL HUMOTONG 26 Bible Online

SAMUEL HUMOTONG 26 - Sangir bible

SAMUEL HUMOTONG 26

¹ Piạ sěhěllo i sire tau Zif nasongo su anun Saul su Gibea kụ něhabarẹ̌ si sie u i Daud kai mẹ̌kẹ̌kěmbuni su Wul᷊udu Hakhila su wiwihu wanua l᷊inggi su Yehuda.

²Tangú měngkate masahawụ i Saul nẹ̌buạ nitakinangu tahapẹ̌sekẹ kapapiaěnge i sire těllu hiwu su kataune su Israel, nẹ̌timona wanua l᷊inggin Zif mědeạ si Daud.

³I Saul nẹ̌daseng su wiwihu ral᷊eng maranim Bul᷊udu Hakhila ene. I Daud kụ sarung ene su wanua l᷊inggi e, nakaringihẹ̌ u i Saul tụtol᷊e sarang kěhu l᷊inggi.

⁴Bọu ene i sie mal᷊aing něngoro manga mẹ̌kakoto, kụ nasingkạ e i sie ringangu mal᷊ahẹ̌, u i Saul kai ene sene.

⁵Masahawụ i Daud nakoạ sarang pẹ̌darasengang i Saul kụ sene nikaěbakenge tenta pẹ̌tẹ̌tikilang i Saul su rěduhi Abner anạ i Ner. Tentan Saul ene kaěbakeng sutal᷊oarạn e, arawe sordadone měmpẹ̌dẹ̌daseng su manga tenta mạngělikụ e.

⁶Bọu e i Daud nakiwal᷊o si Ahimelekh tau Het ene, dingangu si Abisai anạu sěngkataung Yoab (i ninang i sire ute kai i Zeruya), ”I sai wahani sumuẹ̌ dingangku su ral᷊ungu pẹ̌darasengang i Saul?” I Abisai simimbang, ”Iạ!”

⁷Tangú su hěbi ene i Daud dẹ̌duang Abisai nělikosẹ̌ nakoạ sarang dal᷊ungu pẹ̌darasengang ene kụ nakasilo si Saul kapẹ̌tẹ̌tikị e sutal᷊oarang pẹ̌darasengang, běngkone kạtatěbị su ěntana su rěduhu těmbọ e. I Abner dingangu wuntuange mẹ̌tẹ̌tikị mạngělikụ si Saul.

⁸Mase angkuěng i Abisai si Daud, ”Duata e seng něnarakangu sědụ u e si kau su sěhěbi ini. Balako iạ deng měleangu wěngkone hala su wadange pakatěpasu ěntana, takụ pateěng i sie sěnsul᷊ẹ měněkạ, tawahal᷊uasu karua sul᷊eěng!”

⁹Kaiso i Daud nẹ̌berau, ”Kumbahang kapuranengu e i sie! MAWU e mang měhukungu taumata nẹ̌koạ dal᷊akisẹ̌ e su ratu kụ nipile-Ne.

¹⁰Baugu Ruata kụ biahẹ̌ e, iạ masingkạ u hědo MAWU e hala, sarung měmate si Saul, kereu i sie seng mapul᷊ẹ asal᷊ẹ̌, arau lai kamagengu i sie mawihua su ral᷊ungu pẹ̌seketang.

¹¹Karimạko MAWU e měmetọ si siạ kụ měmate ratu nipile-Ne! Měngkate al᷊ạ běngkone ringangu wěnsade, mase i kaduạ e mẹ̌bal᷊ị!”

¹²Tangú i Daud něngal᷊ạ e wěngko ringangu wěnsadi Saul ene wọu sěmběkan těmbọ i Saul, kụ bọu ene napul᷊ẹ. Tawẹu sarang sěngkatau nakasilo hal᷊ẹ̌ ene, arau masingkạ u kai a nariadi, arau himěkosẹ̌, batụu MAWU e seng napakariadin sire e kinahuntikilang mal᷊ěnabẹ̌.

¹³Mase i Daud limiu sarang biwihu wal᷊ane wal᷊ine e sarang pusigu wul᷊ude, hakịu i sie marau wọu pẹ̌darasengang i Saul.

¹⁴Bọu e nẹ̌bansage i Daud si Abner dingangu sordadon Saul angkuěnge, ”Abner. Nakaringihẹ̌ tingihẹ̌ku i kau e?” Abner mal᷊aing němansagẹ̌ lai, ”I sai tangú i kau e kụ měmẹ̌mansagẹ̌ ene?”

¹⁵Angkuěng i Daud, ”Abner! kai wal᷊inebe i kau, tangú taumata katoghasenge su Israel? Unụe i kau tawe nakariagạ si tuangu, mawu ratu? Buhụewe piạ taumata nakasuẹ̌ su rasengu kụ měmate mawunu.

¹⁶I kau tawe makaumal᷊ẹ̌ mẹ̌koạ hal᷊ẹ̌ u, Abner! Baugu MAWU kụ biahẹ̌ e i kamene kěbị e hinong mate, ual᷊ingu tawe nakariagạ mawunu, datu pinilem MAWU. Kěnang kakěllai! Suapa wěngkon datu? Suapa wěnsadẹ̌ su sěmběkan těmbọ kanini?”

¹⁷I Saul nakakiral᷊a tingihʼi Daud dingangu nẹ̌bera, ”Daud, ene i kau, Anạku?” Sasimbang i Daud, ”Ore, Tuang.”

¹⁸Mase angkuěnge lai, ”Unụe i Tuang bědang lai menẹ̌nahusu ěllang? Kai a sal᷊ane ěllang?

¹⁹I Tuang daringihẹ̌ko wawerang ěllang ini e. Manga andene MAWU e něngoro si Tuang tadeạu pẹ̌děndokạ si siạ e, piạ sasěmba gaghěllị sěmbaụ e sarung makaputị dal᷊angehʼE waugu ěllang. Kaiso manga andene i sain něngoro si Tuang ene ute kai taumata tangú, mal᷊owọko i sire e aneěngu MAWU! Ual᷊ingu aị u kakanoạ i sire e, tangú ěllang e nitokol᷊ẹ̌ bọu ěntana tataghuanengu MAWU kụ nasihasa harusẹ̌ makoạ sarang banua wal᷊ine suapang ěllang e hinong mẹ̌tahamawu su mahan duatam banua raghị.

²⁰Abe wala ěllang e mate su ěntanan tau raghị, maraung MAWU. Apawe gunane ratung Israel duměnta kụ měmate kutu sěmbaụ kere ěllang ini e? Kaiʼa kěhase i sie měnahusu ěllang kere taumata měnahusu manụ u kěhu?”

²¹Bọu ene i Saul simimbang, ”Iạ e seng nẹ̌koạ sal᷊a. Pẹ̌sul᷊ẹ e i Daud, Anạku! Iạ e sen tawe lai mẹ̌koạ dal᷊akị si kau e ual᷊ingu i kau seng napakawalang iạ e pinẹ̌biahẹ̌ mẹ̌kalaeng ini. Luluku e mambeng bodokẹ̌. Iạ e mambeng kahěngang nẹ̌sal᷊a!”

²²Kaiso i Daud simimbang, ”Ěndaung ini wěngkon Tuang, kụ pěngoroko tahapẹ̌sekẹ sěngkatau e damahi pěngal᷊ạ.

²³MAWU e sarung měngal᷊amatẹ̌ apan taumata kụ satia ringangu matul᷊idẹ̌. U manilaing su ěllo ini MAWU e měnarakang i Tuangku e su ěllang, kaiso ěllang e mạdiri mẹ̌koạ dal᷊akisẹ̌ si Tuang, datung pinileng MAWU.

²⁴Kụ, kerẹewe i Tuang seng niwalang ěllangu e wiahẹ̌ su ěllo ini, kerene lai karimạko ěllang e těntanudangu MAWU ringangu ipakal᷊iwirẹ̌ bọu kal᷊awọu silakạ.”

²⁵Mase nẹ̌berạe i Saul si Daud, ”MAWU e měngal᷊amatẹ̌ si kau, anạku!, i kau e sarung piạ ual᷊ine mapia su patikụ munaranu!” Bọu e i Daud něněpasu raral᷊enge, ringangu i Saul mal᷊aing mapul᷊ẹ sarang bal᷊ene.