Read Sangir SAMUEL HUMOTONG 27 Bible Online

SAMUEL HUMOTONG 27 - Sangir bible

SAMUEL HUMOTONG 27

¹I Daud mẹ̌tẹ̌tiněnna su ral᷊ungu naunge, ”Manilaing kereapa piạ su sěhěllo i Saul sarung měmate si siạ. Kụ tawẹ apa ral᷊eng bal᷊ine si siạ, su l᷊iung katewe tumal᷊angu watangeng sarang banuang Pilistin. Ual᷊ingu kerene tangú, i Saul sarung tawe lai mẹ̌deạ si siạ su Israel, dingangu iạ e mal᷊aing tawe sarung mal᷊enehẹ̌.”

²Bọu e i Daud dingangu taumatane ěnnungu hasụ su kataune, nẹ̌bal᷊ikěkasẹ̌ tamai sarang anung Akhis anạ i Maokh, datung soang Gat.

³Tangú něnatape i sie ringangu manga taumatane su Gat, sěngkatau-sěngkatau e ringangu walagʼi sire e. I Daud nẹ̌bawa lai kawinge rarua e, kụ Ahinoam tau wawine wọu Yisreel, dingangu i Abigail bal᷊ung Nabal, bawine wọu Karmel.

⁴Piạ i Saul nakaringihẹ̌ u i Daud seng timal᷊angu watangenge sarang Gat, i sie tawe nẹ̌tawakal᷊i něnamẹ.

⁵Mase i Daud něněgu si Akhis, ”Kereu i Tuang e makapěndang mal᷊uasẹ̌ su ěllang e tangú, gěllịko su ěllang e soa kadodọ su ul᷊une waugu pẹ̌tanakeng, kụ ěllang i Tuan Datu ini e tawe měnumpang su anun Tuang su niupunangu soa ini e.”

⁶Mase i Akhis nẹ̌gěllịu soang Ziklag si Daud, kụ kai ual᷊ingu ene hakịu Ziklag nakoạ tataghuanengu manga ratung Yehuda sarang orasẹ̌ ini.

⁷I Daud natanạ su wanuang Pilistin karěngụu sěntaung ěpạ u wul᷊ang.

⁸Karěngụu tempo ene i Daud dingangu taumatane kạdingạ měnekẹ tau Gesur, tau Girzi, ringangu tau Amalek; manga wansa ene e, seng marěngụ mẹ̌tẹ̌tanạ su wanua ene. I sie simuẹ̌ su ěntana ene karaung Sur dingangu natěpasu Misirẹ̌.

⁹I sie němate kěbị manga esẹ dingangu manga wawine ore lai něhampasẹ̌ domba, sapi, kalide, onta, ore lai pakeang. Bọu ene i sie nẹ̌bal᷊ị kụ nẹ̌těngong Akhis.

¹⁰Kereu i Akhis nakiwal᷊o si sie, ”Sarang apa i kamene měngalo sěnsul᷊ẹ ini?” Tangú i Daud nẹ̌bera si sie, u i sie seng tamai sarang bahageang timuhẹ̌ bọu Yehuda arau wanuan tau Yerahmeel arau wanua tampạ u katatanakengu tau Keni.

¹¹Tawẹu sarang sěngkatau su manga wanua kụ niseketange ene e niwalane wiahẹ̌, tadeạu kumbahang piạ taumata wọu apaʼm banua ene kụ makakaral᷊eng sarang Gat baugu měhabaru kai apa tuhụ hinone seng nikoạ i Daud dingangu taumatane. Kerene pẹ̌kakoạ i Daud karěngụu i sie mạtanạ su wanuang Pilistin.

¹²Arawe i Akhis mangimang si Daud dingangu měngẹ̌ngěnna su ral᷊ungu naunge, ”I sie e tumanịu ikẹ̌kawěnsingu wansane sẹ̌sane, hakịu i sie nasihasa nakoạ ěllangku e kanandung biahe.”