Read Sangir SAMUEL HUMOTONG 28 Bible Online

SAMUEL HUMOTONG 28 - Sangir bible

SAMUEL HUMOTONG 28

¹Piran tempo samuring ene, tau Pilistin napasěbangu sordadone waugu měnekẹ Israel, dingangu i Akhis nẹ̌bera si Daud, ”Tantu i kau nakaěnna u i kau ringangu taumatanu e hinong mẹ̌sekẹ su sěmběkaku.”

²Sasimbang i Daud, ”Nal᷊ahẹu hědo i Tuang sarung makasilo hala apa kụ botonge ikakoạ u ěllang i Tuang ene.” Bọu e i Akhis nẹ̌bera, ”Mapia! I kau takụ ihengkẹ makoạ měndal᷊ukadẹ̌ku e tatapẹ̌.”

³ I Samuel seng nate ringangu i sie nipědal᷊ahintauang u kasěllahu Israel ore nilěbing su Rama, soane hala e. Pira tempo nal᷊iu i Saul seng něnokol᷊u patikụ tahapatehẹ̌ bọu Israel, dingangu manga tahahopa kumakui himukudẹ̌.

⁴Tangú piạ e sordadong Pilistin natampung kụ nẹ̌daseng su rěduhu soang Sunem, i Saul něnampungu tau Israel, kụ i sire e nẹ̌daseng su Wul᷊udu Gilboa.

⁵Piạ i Saul nakasilo sordadong Pilistin ene, i sie nakoạ matal᷊o-tal᷊o.

⁶ Bọu e i sie nẹ̌dorong sasal᷊ěntihọ su MAWU, kaiso MAWU e tawe simimbang, baẹbe ringangu ipi, arau lai ringangu mẹ̌pakẹ u Urim dingangu Tumim arau lai lumiung nabi.

⁷Ual᷊ingu ene i Saul nẹ̌bera su manga měndal᷊ukade, ”Pědeạko sěngkatau tahaundang bawine kumakui himukudẹ̌, iạ e sarung makoạ sarang anun sie kụ mẹ̌dorong sasal᷊ěntihọ.” I sire simimbang, ”Su En-Dor piạ tahaundang kerene.”

⁸Mase i Saul nẹ̌těngkaunidẹ̌ tadeạu tawe ikakiral᷊an taumata. Ual᷊ingu nitangkianengu manga esẹ duang katau e, nẹ̌buạ e i sie ringangu nahumpạ e i sie su wal᷊eng tahaundang ene su tempong hěbi. Tangú angkuěng i Saul, ”Kuieko himukudu taumata apang takụ isěbạ arenge, ringangu pẹ̌dorongke tadeạu i sie měněbal᷊u apa kụ sarung mariadi.”

⁹Bawine ene e simimbang, ”Tantu i Tuang e mal᷊aing masingkạ u Ratu i Saul seng něnokol᷊ẹ̌ kěbị tahapatehẹ̌ bọu Israel dingangu tahaundang kumakui himukudẹ̌.[71] Unụe i Tuang měnal᷊ukạ mapakasilakạ u iạ hakịu iạ e pateěng?”

¹⁰Bọu e i Saul nẹ̌salu, angkuěnge, ”Su arengu MAWU kụ biahẹ̌, iạ mẹ̌diandi u i kau e tawe ihukung ual᷊ingu nẹ̌koạ hal᷊ẹ̌ ini.”

¹¹Bawine ene e nakiwal᷊o, ”Kai himukudi sai hinong takụ kuiang baugʼi Tuang?” Angkuěng i Saul, ”Himukudʼi Samuel.”

¹²Ene wawine ene nakasilo si Samuel, i sie němansagẹ̌ dingangu nẹ̌bera si Saul, ”Unụe i Tuang měngakal᷊ẹ̌ ěllang? Seng i Tuangku e luhude Ratu i Saul!”

¹³Sasimbangu ratu e, ”Abe katakụ! Paul᷊ị e apang kinasilonu e!” Bawine ene simimbang, ”Ěllange nakasilo rohkẹ̌ siměpụ bọu wanua.”

¹⁴Kakiwal᷊ong Saul, ”Kereapa awạ e?” Sasimbange, ”Sěngkatau esẹ kụ maghurang. I sie siměpụ nẹ̌pakẹ u kakingkaeng.” Mase nasingkạ e i Saul nạung ene kai i Samuel, kụ i sie nẹ̌tumpěkuhẹ̌ něngadatẹ̌.

¹⁵Bọu ene i Samuel nẹ̌bera si Saul, ”Unụe kawe sẹ̌sal᷊ukatengu e iạ? Unụe kawe kẹ̌kuiangu e iạ kapia?” Angkuěng i Saul, ”Iạ e kai tumanịu nẹ̌bingọ ual᷊ingu nialoěngu tau Pilistin, arawe Ruata e seng něněntangu iạ. Iạ e tawe nisimbahenge kapia, baẹ bọu manga nabi, arau lai ringangu ipi. Ual᷊ingu ene iạ mělẹ̌harapẹ̌ si Tuang, tadeạu i Tuang pěhabarẹ̌ kai apa hinong takụ koateng.”

¹⁶Bọu ene angkuěng i Samuel, ”Kai a gunane iạ kuiangu arawe MAWU e seng něněntang i kau ringangu nakoạ sědụu?

¹⁷ MAWU e seng nẹ̌koạ baugʼi kau kerẹewe seng nipěhengetangʼE limiung iạ. MAWU seng něngal᷊ạ kararatuangu Israel wọu anunu ringangu něngonggọu ene si Daud.

¹⁸ I kau seng limawang parentan MAWU ringangu madiri mapakawinasan tau Amalek ore kal᷊awọu tataghuaneng i sire. Kai ual᷊ingu ene hakịu orasẹ̌ ini e i kau nikoạu MAWU e kere ini.

¹⁹I kau ringangu tau Israel sarung isarakang su tau Pilistin. Dịěllo i kau ringangu manga ahusu e sarung mẹ̌tampung dingangku; ore lai kal᷊awọu sordadong Israel mal᷊aing sarung isarakang u MAWU su tau Pilistin.”

²⁰Su tempo ene lai, i Saul nawatang su ěntana kere nisahedu rěllụ, batụu i sie himěkosẹ̌ tawẹ sihinge nakaringihẹ̌ manga waweran Samuel ene. Kutẹu l᷊ai i sie tumanịu lome, batụu tawe makakaěng manga apa sěhěllo sěhěbi.

²¹Tahahopa ene nẹ̌těngkaranin Saul dingangu nakasilo u i sie apạe niwingọ e: ual᷊ingu ene wawine ene e nẹ̌bera si sie, ”Tuangku, ěllang e seng nẹ̌tawakal᷊i waugu mẹ̌koạ apan seng nirorongang i Tuang.

²²Kụ, karimạko i Tuangku e mal᷊aing dumaringihẹ̌ dorongu ěllang; kaěngko kadodọ kaěng kụ sarung sadiaěngu tadeạu i Tuang makatěpasẹ̌be raral᷊eng i Tuang.”

²³I Saul tawe něnarimạ kụ i sie nẹ̌bera u i sie tawe mapulu kumaěng. Kaiso sarangke manga sawohị e mal᷊aing něnahonsang, ute i sie timuhụ e. I sie nẹ̌pětị bọu ěntana mase naiang su bale-bale.

²⁴Dingangu masahawụ bawine ene e němotọ anạ u sapine matawa ringangu něngal᷊ạ tapoěng apidu němaměha, wọu ene nịkakoạ e borotẹ̌ tawẹ kabọ e.

²⁵Bọu ene nisadiane kaěng ene waugʼi Saul dingangu manga sawohị e, bọu ene i sire e kimaěng. Mase rimal᷊engke i sire su sěhěbi ene lai.