Read Sangir SAMUEL HUMOTONG 29 Bible Online

SAMUEL HUMOTONG 29 - Sangir bible

SAMUEL HUMOTONG 29

¹Tau Pilistin něnampungu kal᷊awọu sordadone su Afek, arawe tau Israel nẹ̌daseng su rěduhu simbul᷊u akẹ su Wal᷊ang Yisreel.

²Datung Pilistin i sire lima ene e rimal᷊eng nẹ̌buntuang nẹ̌tente ringangu manga kasasěmbaụ u pẹ̌tahạ mahasụ dingangu pẹ̌taha sěhiwu su kataune; i Daud dingangu taumatane němpẹ̌těnte su l᷊ikude ringangu Ratung Akhis.

³Apang mol᷊ensekẹ u tau Pilistin nakasilo si sire wọu e nakiwal᷊o, ”Tau Ibrani ene e kai waugu apa sini?” I Akhis simimbang, ”Ini e i Daud, nạung lěnnạ u sawohị u Ratu i Saul bọu Israel. I sie seng diọ marěngụ mạtanạ dingangku. Den dongkeng nạung i sie riměnta su anuku sarang ěllo ini, tawe takụ nikẹ̌kaěbakeng i sie nẹ̌sal᷊a.”

⁴Arawe apang mol᷊ensekẹ u Pilistin ene e němpẹ̌bawal᷊uang si Akhis kụ němpẹ̌bera si sie, ”Dolohẹ̌ko tau ene pakapul᷊ẹ sarang soa kụ seng nionggọ u e si sie. I sie tawe wotonge mẹ̌sekẹ mẹ̌dingang i kitẹ e; kiwuạ u i sie kai mẹ̌tul᷊ang kitẹ e sarung su wěllạu kapẹ̌sẹ̌sekẹ e. Kai wal᷊inewe loahe mapia si sie měngal᷊ạ naungu ratune kụ měmate taumatang kitẹ e?

⁵ I sie kawe i Daud? Baugʼi sie apang manga wawine e nạung kal᷊imona e měmpẹ̌sẹ̌sal᷊ai měmpẹ̌kẹ̌kantarị kere ini, ’I Saulẹ̌ e seng němate sekẹ e ringangu hiwune, arawe i Daud kawe ringangu pul᷊one hiwu.’ ”

⁶Mase i Akhis nẹ̌kui si Daud dingangu nẹ̌bera si sie, ”Iạ e mangimang su arengu MAWU kụ biahẹ̌, batụu i kau e satia si siạ. Iạ e mal᷊uasẹ̌ kereu i kau makataking si siạ su ral᷊ungu pẹ̌seketang ini. U rokeng nạung i kau e riměnta su anuku sarang orasẹ̌ ini, tawe takụ kinaěbakeng pẹ̌sasal᷊anu. Arawe manga ratu wal᷊ine ene e tawe mapulung kau.

⁷Ual᷊ingu ene kapul᷊ẹ e ringangu kasasal᷊amatẹ̌, dingangu kumbahangbe mẹ̌koạ manga apa kụ makakoạ bawal᷊uang i sire.”

⁸I Daud simimbang, ”Kai pẹ̌sasal᷊a apa nạung nikoạ u ěllangu e, Tuang? Kereu mẹ̌sul᷊ungu niweran Tuang, i Tuang e tawe nakaěbạ pẹ̌sasal᷊a manga apa, su ěllang e, dokeng nạung ěllang e něnětạ nẹ̌tangkiang si Tuan Datu e sarang orasẹ̌ ini, unụe ěllang e tawe nipakawala nẹ̌sekẹ dimokạ sědụ i Tuang?”

⁹I Akhis simimbang, ”I kau e masingkạ u i kau e takụ niěnna u satia kere malạekatu Ruata. Arawe apang mol᷊ensekẹ ene seng němutusu i kau e tawe wotonge tumol᷊e mẹ̌sekẹ sěngkapẹ̌sekẹ dingang i kami.

¹⁰Ual᷊ingu ene Daud, diěllo i kamene kěbị e seng němpěněntang i Saul kụ diměnta su anuku, harusẹ̌ mẹ̌bangung deng mal᷊uka-l᷊ukadẹ̌ bọu ene mẹ̌buạ lighạ kereu matangěllo seng siměbang.”

¹¹Ual᷊ingu ene sěngkarịěllone mal᷊uka-l᷊ukadẹ̌ e, nẹ̌buạ e i Daud dingangu taumatane napul᷊ẹ sarang banuang Pilistin, arawe sordadong Pilistin ene e nẹ̌buạ sarang Yisreel.