Read Sangir SAMUEL HUMOTONG 3 Bible Online

SAMUEL HUMOTONG 3 - Sangir bible

SAMUEL HUMOTONG 3

¹Su tempong i Samuel den tal᷊awuọ ene lẹ̌ahakeng i Eli mẹ̌tangkiang MAWU. Su tempo ene apạ e mararau piạ tatanata ringangu papasilo wọu MAWU.

²Piạ su sěhěbi, i Eli kụ seng mạgurang-gurang dingangu seng maraning mawuta e, kạpẹ̌tẹ̌tikị e su kamare,

³kụ i Samuel mẹ̌tẹ̌tikị maraning Peting Pẹ̌dariandin MAWU, su ral᷊ungu Tenta Susi. Těntal᷊ang den tawe nẹ̌běmbanaho ringangu sol᷊o reng bědang dụděllị,

⁴MAWU nẹ̌kui si Samuel, kụ i Samuel simimbang, ”Ya Tuang!”

⁵Bọu e i sie timal᷊ang, nẹ̌sombang i Eli ringangu nẹ̌bera, ”Kai piạ apa Tuang? Kawe unụ e iạ nikuiang?” Arawe i Eli simimbang, ”Iạ tawe kimui si kau, pẹ̌tikị e saụ.” Bọu ene i Samuel saụ e nẹ̌tikị.

⁶Bọu ene MAWU e saụ kimui si Samuel, arawe i Samuel běgawue nạung kụkui si sie ene kawe MAWU, ual᷊ingu MAWU e kai wědang tawe nẹ̌bẹ̌bisara ringange. Ual᷊ingu ene i sie nẹ̌bangung kụ tamai nědeạ si Eli, nakiwal᷊o, ”Kai apa Tuang? Kawe unụ e i Tuang kimui?” i Eli simimbang, ”Iạ e tawe kimui si kau, anạku, saụ e pẹ̌tiki.”

⁸Su katěllun sul᷊ene MAWU e kimui si Samuel, bọu ene i Samuel nẹ̌bangung dingangu nẹ̌sombang i Eli kụ nẹ̌bera, ”Kai piạ apa Tuang? Kawe unụ e i Tuang kimui?” Su tempo ene i Eli masingkạ-singkạ u kai MAWU e kimui rariọ ene.

⁹Ual᷊ingu ene i sie nẹ̌bera si Samuel, ”Saụ e pětikị, kụ kereu i kau saụ kuiang ute, paul᷊i u, ’Pěhengetangke MAWU! ěllangʼU e rumaringihẹ̌.’ ” Mase i Samuel tamaị e sol᷊ong tampạ u katatikịlange.

¹⁰Bọu ene MAWU riměnta su tampạ ene kụ saụ kimui, ”Samuel, Samuel!” Kụ i Samuel simimbahe, ”Pěhengetange MAWU! ěllangʼU e rumaringihẹ̌.”

¹¹Bọu e něhengetangke MAWU si sie, ”Iạ e sarung mẹ̌koạ hal᷊ẹ̌ makạtatakụ su tau Israelẹ̌ e, tadeạu kěbị taumata apang dụdaringihẹ̌ tangú sarung i wingọ e.

¹²Su ěllo ene Iạ sarung mẹ̌koạ patikụ apang nạung sen Takụ ipěmẹ̌matakụ baugu walagʼi Eli bọu tětạ e sarang pěngěnsueěnge.

¹³Sen Takụ ipaul᷊ị si sie[11] u walage sarung Takụ hukunang sarang karěngụ e batụu manga anạ e kai něhinakang si Siạ. I Eli masingkạ-singkạ u kal᷊awọu rosan sire ene, kaiso i sire tawe pinẹ̌pẹ̌duange.

¹⁴Ual᷊ingu ene Iạ e mẹ̌salung balagʼi Eli, u rosan sire kụ apạ e kasěllahe ene e, tawe sarung i karědasẹ̌ ual᷊ingu ghaghěllị arau walạewe sasěmba sude waugu sarang marěngụ-děngụ.”

¹⁵Bọu e i Samuel saụ nẹ̌tikị kụ sěngkamal᷊ukade i sie nẹ̌bangung kụ něnope manga tukadu Ghaheda. I sie matakụ maul᷊ị u papasilo ene si Eli,

¹⁶arawe i Eli kimui si sie, angkuěnge, ”Samuel, anạku.” Sasimbangi Samuel, ”Iạ, Tuang.”

¹⁷I Eli nakiwal᷊o, ”Kai apa nipaul᷊ị u MAWU e si kau? Běkeko kěbị si siạ. Kereu piạ u sěmbaụ ipẹ̌kẹ̌kal᷊irungu ute, i kau mang i hukung u Mawu Ruata.”

¹⁸Bọu e i Samuel naul᷊ị u kěbị ene si Eli. Tawe u sarang sěmbaụ niwul᷊inạ e. Bọu e nẹ̌berạ e i Eli, ”I Sie kai MAWU, balạe kere i Sie pẹ̌kakoạʼE apang kụ lẹ̌ěnaěngʼE mapia.”

¹⁹I Samuel mang kakạsariane. MAWU e rụděndingang i sie ringangu napakariading kěbị apang niwerang Samuel mamben těngadẹ̌ nariadi.

²⁰Ual᷊ingu ene kal᷊awọu umatu Israel bọu patikụ banua ene mạngaku u i Samuel kai nabing MAWU. Kasaung sul᷊ene i Samuel mẹ̌bisara, kěbị tau Israel dumarịngihẹ̌. MAWU e wědang tatapẹ̌ mẹ̌těngkatodẹ u watangengʼE su Silo, su apang i Sie kahumotongang e nẹ̌těngkatodẹ u watangengʼE si Samuel kụ mẹ̌bẹ̌bisara ringang i sie.