Read Sangir SAMUEL HUMOTONG 30 Bible Online

SAMUEL HUMOTONG 30 - Sangir bible

SAMUEL HUMOTONG 30

¹ Dua ěllo wọu ene, i Daud dingangu manga taumatane nẹ̌sul᷊e sarang soang Ziklag. Nasongọ e paị sene, i sire nakaěbạ e tau Amalek seng nẹ̌boang sarang sěmběkan timuhẹ̌ bọu wanuang Yehuda ringangu nẹ̌kawasa su Ziklag. I sire tawe němate sarang manga sěngkatau. Kaiso i sire e něnutung soa ene e pinakasue ringangu naněpasẹ̌ daral᷊eng i sire e ringangu nẹ̌bawa manga wawine, manga rariọ dingangu tumanạ e lai wal᷊ine. I sire lai seng něnaweng balagi Daud dingangu walagu manga taumatane, nasowa lai kawing i Daud i rẹ̌dua e, i Ahinoam dẹ̌duang Abigail. I Daud dingangu taumatane e kereng kasusane naung i sire e, hakịu i sire e něnětạ e nahungkiạ tawẹ ědone sarang něngkarul᷊ěpe.

⁶Taumatan Daud apạ e masusa-susa ual᷊ingu kinailangengu anạ dingangu kawing i sire e. Ual᷊ingu ene i sire e měmpěmerengu watu si Daud. Kụ i Daud mambeng su ral᷊ungu kasasigěsạ marasai, kaiso naunge nipakatoghasu MAWU Ruatane.

⁷ Bọu e i Daud nẹ̌bera su Imang i Abyatar anạ i Ahimelekh, ”Bawako efod ene e ramahi!” Tangú i Abyatar nẹ̌bawa efod ene si sie.

⁸Bọu ene nakiwal᷊ọ e i Daud su MAWU, ”Kụ iạ e harusẹ̌ měnahusu ghapaěngu měnanekẹ ene tangú? Kụ makasahusu wue iạ si sire?” Angkuěngu MAWU, ”Ore, sahusụ e; i kau e sarung makarahiu si sire kụ pěliwirẹ̌ko si sire apan nataweng.”

⁹Bọu ene nẹ̌buạ e i Daud dingangu i sire taumatane ěnnungu hasụ su kataune. Sarangke i sire nahumpạ u Sal᷊ụ u Besor, i Daud naněpasu raral᷊enge ringang i sire ěpạ u hasụ su kataune; arawe rua hasụ su kataune lai wal᷊ine e natanạ sene. Ual᷊ingu seng tumanịu narul᷊ěpe ringangu tawe makaumal᷊ẹ̌ luměbạ Sal᷊ụ u Besor.

¹¹Su ral᷊ungu raral᷊eng ene e taumatan Daud nẹ̌sombangu sěngkatau rariọ esẹ bọu Misirẹ̌ su tadetene, bọu e i sie niwawa sarang anun Daud. I sie niapakaěng dingangu niapěnginung,

¹²nipakaěng kukisẹ̌ buang ara, dingangu anggorẹ̌ mahěgu ruam pohọ. Sarětạeng i sie kimaěng, darịo saụ e natoghasẹ̌; kutẹu nạung seng těllu ěllo i sie tawe kimẹ̌kaěng dingangu tawe něngẹ̌nginung!

¹³Bọu e i Daud nakiwal᷊o si sie, ”I sai i tuangu, ringangu wọu apa i kau?” Angkuěng rariọ ene, ”Iạ e tau Misirẹ̌, ěllangu sěngkatau tau Amalek. Iạ e něněntangu mawuku e těllu ěllo nal᷊iu, ual᷊ingu iạ masakị.

¹⁴I kami e seng něnekẹ banuan tau Kreti su sěmbekan timuhẹ̌ bọu Yehuda ringangu wanuang ghal᷊ipohong Kaleb, dingangu i kami e seng něnutung soang Ziklag nipakasue.”

¹⁵Bọu e i Daud nakiwal᷊o si sie, ”Mapulu i kau e měnonda si siạ sarang tampạu ghapaěng i sire ene?” Angkuěnge, ”Iạ mapulu, asal᷊u i Tuang mẹ̌diandi si siạ su arengu Ruata, u iạ tawe pateěng arau iạ tawe isarakang i Tuang su mawuku.”

¹⁶Masene i sie něnonda si sire sarang tampạu měnanumbiagẹ̌ ene. Su tempo ene ghapaěnge ene nẹ̌sal᷊iawuhẹ̌ su kaguwạu tampạ ene, apidu kạpahungkaěnge, kạpěngẹ̌nginunge ringangu kapẹ̌sẹ̌sal᷊imbange ual᷊ingu mal᷊awọ apal᷊iwụ pul᷊aho kụ seng niwawang sire wọu wanuang Pilistin dingangu Yehuda.

¹⁷Su tempo wěmbanaho sěngkamal᷊ukade, i sire e nialoěng i Daud, kụ pẹ̌sasekẹ e nakoạ bọu mal᷊ukadẹ̌ sarang nahěbi. Su l᷊iung bọu ěpạ u hasụ su kataune apang mangangudạ e němpẹ̌tal᷊ang kạpahunsakene onta e, tawẹu sarang sěngkatau wọu sědụ e kụ makakal᷊ěsọ.

¹⁸I Daud nakal᷊iwirẹ̌ kal᷊awọu sabarang kụ seng nipul᷊ahon tau Amalek, nasowa l᷊ai i rẹ̌dua kawinge;

¹⁹tawẹu sarang sěmbaụ kụ nailang. Kěbị manga rariọ esẹ dingangu manga wawine ringangu kal᷊awọu apal᷊iwụ pul᷊aho kụ seng nial᷊ạ u tau Amalek, nial᷊ạ i Daud kapia.

²⁰Su l᷊iung ene e i Daud, mal᷊aing něhampasẹ̌ kěbị domba ringangu manga binatang. Manga binatang ene e niahạ u taumatan Daud su těngone,[72] nahae wọu kal᷊awọu apal᷊iwụ pul᷊aho wal᷊ine, ringangu i sire e nẹ̌bera, ”Ini e wahageang i Daud!”

²¹Bọu ene i Daud nẹ̌sul᷊e kapia sarang anun sire rua hasụ su kataune kụ seng tumanịu nělome tumol᷊e si sie, ringangu seng nitěntange su wiwihu Sal᷊ụ u Besor. I sire němpěněnsomahẹ̌ si Daud dingangu manga taumatane, kụ i Daud nẹ̌těngkaranin sire ringangu něngadatẹ̌ si sire.

²²Kaiso wọu tal᷊oarang taumatan Daud kụ naringang si sie e, piạu ral᷊akisẹ̌ dingangu maanggang. I sire nẹ̌bera u, ”I sire ini e tawe timol᷊e; kụ i sire tawẹ buạ e makaěbạ manga apa wọu apal᷊iwụ pul᷊aho ene. I sire kětạeng botonge měngal᷊ạ anạ dingangu kawing i sire e, kụ bọu ene kapul᷊ẹ.”

²³Arawe i Daud simimbang, ”Manga anạu sěngkatauku, kumbahang bue i kamene mẹ̌koạ kerene ringangu apang seng nionggọ u Mawu e si kitẹ! Kai wal᷊inewe i kitẹ e seng nitěntanurange ringangu nionggotangu kal᷊auntu wọu ghapaěngu tahapěhampasẹ̌ ene tangu?

²⁴Tangú manilaing sěngkatau e kai tawe wotonge kumire těgu ene! Kěbị e harusẹ̌ makaěbạ bahageange mẹ̌sul᷊ung kal᷊awọe: taumata kụ apang mạtanạ mẹ̌děndiagạ apal᷊iwụ e harusẹ̌ makaěbạ bahageange mẹ̌sul᷊ung dingangu i sire apang němpẹ̌sekẹ.”

²⁵Bọu ene hal᷊ẹ̌ ene nikoạ e sěmbaụ atorang i Daud, kụ tẹ̌tuhukang su Israel sarang orasẹ̌ ini.

²⁶Piạ i Daud nẹ̌sul᷊e sarang Ziklag, i sie něndingọ u sěmbahageang bọu apal᷊iwụ pul᷊aho ene su apang pangahạ u manga soang Yehuda kụ seng němpěnongka si sie, angkuěnge, ”Ini e gaghěllị si kau wọu apal᷊iwụ pul᷊aho kụ seng nial᷊ạ i kami wọu sědụ u MAWU.”

²⁷Manga soa ene ute: Betel dingangu Rama su wahageang sěmběkan timuhẹ̌ bọu Yehuda, Yatir, Aroër, Sifmot, Estemoa, Rakhal, kerene lai manga soaʼn tau Yerahmeel, manga soaʼn tau Keni, Horma, Bor-Asan, Atakh dingangu Hebron. Kěbị soa su piạ i Daud dingangu taumatane nạung bọu pinẹ̌palilikange, piněndingotange gaghěllị ene.