Read Sangir SAMUEL HUMOTONG 31 Bible Online

SAMUEL HUMOTONG 31 - Sangir bible

SAMUEL HUMOTONG 31

¹Těntal᷊ang ene e tau Pilistin nẹ̌sekẹ dimokạ tau Israel su wawul᷊urangu Gilboa. Mal᷊awọ tau Israel nawihua sene, ringangu apam bal᷊ine e, nasowa l᷊ai i Saul sire tal᷊ahusẹ̌ e němpẹ̌tal᷊angu wadang i sire.

²Katewe i sire kai nituhukangu tau Pilistin dingangu těllung katau wọu tal᷊oarang manga ahusi Saul ene e nate nipate; kụ i Yonatan, i Abinadab dingangi Malkisua.

³Pẹ̌sasekẹ e wotonge wue katědụ e mạngělikụ si Saul, dingangu i sie hala kinahinoěngu manga horom papitị u sědụ hakịu nal᷊esẹ gẹ̌guwạ.

⁴Bọu e angkuěng i Saul su kal᷊endesang kụ mẹ̌bẹ̌bawa aghide, ”Sawụ e sondangu e kụ těkạ e iạ, tadeạu iạ e kumbahang delaing ipẹ̌taghunalang ringangu pateěngu taumata kụ běgang MAWU ene.” Arawe kal᷊endesang ene e madiri měněkạ, batụu i sie kai tumanịu maadatẹ̌ si sie. Ual᷊ingu ene i Saul něngal᷊ạ e pedane kụ nẹ̌těngkawatangu wadange su wowong horoʼm peda ene.

⁵Piạ e kal᷊endesang ene nakasilo u i Saul seng nairị, tangú i sie mal᷊aing nẹ̌těngkawatangu wadange su wowong horoʼm pedane kụ nate su sěndihang i Saul.

⁶Kerene i Saul dingangu i sire těllu manga ahuse, ringangu kěbị taumatane ringangu kal᷊endesang ene nawihua su sěhěllo ene.

⁷Piạ e tau Israel kụ mạtanạ su sěmběkaʼm Bědạ u Yisreel dingangu sěmběkan dakị wọu Sal᷊ụ u Yordan nakaringihẹ̌ u sordadong Israel sen timal᷊angu wadang, dingangu i Saul sire tal᷊ahusẹ̌ e seng něngkawihua, kụ i sire timal᷊ang něněntang u manga soan sire. Wọu ene tau Pilistin nakakaiang su manga soa ene.

⁸Sěngkarịěllone piạ tau Pilistin diměnta waugu měhampasẹ̌ sạbarang su manga kal᷊awọu kasuang e, i sire nakaěbạ si Saul sire tal᷊ahusẹ̌ e seng nate su wawul᷊urang u Gilboa.

⁹I sire němpěmotọ těmbọ i Saul mase němpěngal᷊ạ pakeangu sekẹ e, kụ tau Pilistin něndingọ u rarolohang sarang patikụ ěntanang Pilistin baugu měhabaru wal᷊o mapia ene su kawanua ringangu mahan duatan sire.

¹⁰Bọu ene pakeangu sekẹ i Saul ene niresọ su ral᷊ungu pangkunangu mahan duata wawine i Asytoret, kụ badange nipaku su meselu soang Bet-Sean.

¹¹Arawe tumanạu Yabesh su Gilead nakaringihẹ̌ apa nikoạ u tau Pilistin si Saul,

¹²bọu ene taumata kụ kawahaniange nẹ̌buạ bọu ene kụ dimal᷊eng kanandung hěbi sarang Bet-Sean. I sire e napal᷊intụ u maietʼi Saul dingangu maietu manga ahuse wọu meselu soa ene wọu e niwawa sarang Yabesh, kụ nitutung.

¹³Kal᷊awọu manga ruhine nitampung mase nilěbing su al᷊ungu kalung tamariska su soa ene, wọu ene němpẹ̌puhědangke i sire pitu ěllo karěngụ e.