Read Sangir SAMUEL HUMOTONG 4 Bible Online

SAMUEL HUMOTONG 4 - Sangir bible

SAMUEL HUMOTONG 4

¹Su tempo ene tau Pilistin něnganoạ buntuang u mẹ̌sasekẹ mẹ̌deạu sumekẹ tau Israelẹ̌; ual᷊ingu ene[12] sordadon tau Israelẹ̌ e nẹ̌timona tampạ u pẹ̌seketang; i sire nẹ̌daseng maranin Eben-Haezer, arawe sordadong Pilistin nẹ̌daseng su Afek.

²Sordadong Pilistin nanětạ u něngalo kụ sarětạeng sekẹ e naběsẹ e marasai, sordadong Israelẹ̌ e kinawatạ kụ piạu manga ěpạ u hiwu su kataune taumata nate su pẹ̌seketang ene.

³Piạ e nạung lěmbeng sordado kinawatạ e seng něngkapul᷊ẹ sol᷊ong daseng, i sire apang měngangahạ Israelẹ̌ e němpẹ̌bera, ”Unụ e MAWU e namalang kitẹ pinakawatạ u tau Pilistin sěhěllo ini e? Endaị e i kitẹ měngal᷊ạ Peting Pẹ̌dariandin MAWU wọu Silo, kụ bawaěng i kitẹ sarang ini, tadeạu MAWU[13] mẹ̌tul᷊ung dingangu měngambang si kitẹ bọu rumarokạ.”

⁴ Tangu i sire něndolohu taumata sol᷊ong Silo ipěngalạ Petim Pẹ̌darianding MAWU kụ makoạ kal᷊aianengu MAWU Kasěllahenge. Tangú anạ i Eli rarua e, i Hofni ringang i Pinehas apạtaking Petim Pẹ̌dariandi ene.

⁵Sarạeng Petim Pẹ̌dariandi ene nahumpạ e su pẹ̌darasengang, tau Israelẹ̌ e měngkatewe nẹ̌bansagẹ̌ maihạ hakịu wanua e ghimanuẹ̌.

⁶Tau Pilistin mal᷊aing nakaringihẹ̌ ganohạ ene mase i sire němpẹ̌bera u, ”Unụ e tau Ibrani e němpěmansagẹ̌ tangu?” Arakutẹʼu i sire nakakasingkạ e Petim Pẹ̌dariandim MAWU e seng nasongọ e su pẹ̌darasengang u tau Ibrani,

⁷i sire něngkatakụ kụ němpẹ̌bera, ”Kai piạ mahang duata narěnta su pẹ̌darasengang i sire! Silakạ bue i kitẹ e! Bẹ̌dang tawe nakạhombang i kitẹ e hal᷊ẹ̌ kere ini!

⁸Mambeng nasilakạ! Kai i sai makaambang si kitẹ e wọu kal᷊awọu mahang duata matoghasẹ̌ ene? Bal᷊inewe manga mahang duata ene lai nạung němate tau Misirẹ̌ kạngerẹ su wanua l᷊inggi ngae?

⁹Pakawahaniko naung i kamene ei tau Pilistin! Pěmpẹ̌sekẹko kere manga esẹ kereu tala tangú i kamene sarung i pẹ̌tahuěllang i sire tau Ibrani, kere i sire nạung nakoạ ěllang i kamene. Ual᷊ingu ene tangú pěmpẹ̌sekẹko pakawawahani!”

¹⁰Bọu e němpẹ̌sekẹ e tau Pilistin marehe kụ nakawatạ e sordadong Israel. Tau Israelẹ̌ němpẹ̌tal᷊ang naněntang u tentan sire sěngkatau-sěngkatau. Mambeng matědụ kawawatạ ene: 30.000 su kataune sordadong Israelẹ̌ něngkairị.

¹¹Petim Pẹ̌dariandin Duata e kinapul᷊ahong dokạ u tau Israel, mase anạ i Eli rarua i Hofni rẹ̌duang Pinehasẹ̌ e nate.

¹²Sěngkatau wọu hěnton Benyamin timal᷊ang bọu pẹ̌seketang sol᷊ong Silo, kụ narěnta sene su ěllo ene lai. Nipělutune ute pakeange nịgaghaisẹ̌ kụ nilohoěngu awul᷊ẹ̌ mase niporonge su těmbọ e.

¹³I Eli, nạung měngkate kal᷊indasa měsẹ̌sipiru kasasal᷊amatu Petim Pẹ̌darianding MAWU, ene kạpahungkaiange su wiwihu ral᷊eng apidu kapẹ̌sẹ̌sipire. Ene piạ e tau ene naul᷊ịeng habaru kawawatạ u Israel, kal᷊awọu tumanạ u soa e němpahul᷊ungkang maihạ-ihạ.

¹⁴I Eli e nakaringihẹ̌ pẹ̌daral᷊ungkang ene e, bọu e nakiwal᷊o, ”Kai ghanohạ u apạ e ene ěng?” Ene tau kanini e kạtal᷊ange sol᷊ong anung Eli; kụ nahumpạ e tangú i sie naul᷊ị eng habarẹ̌ dal᷊akị ene.

¹⁵Kutẹu umuri Eli e seng ka-98-ne su taunge kụ i sie seng masarạ mawuta.

¹⁶Tau ene něbera si Eli, ”Iạ e tumal᷊ang ěllo ini wọu tampạ u pẹ̌seketang kụ buhụ ewe nahumpạ.” I Eli nakiwal᷊o si sie, ”Kereapạ e habaru, anạku?”

¹⁷Tangú i anu něbawa habarẹ̌ ene simimbang, ”Tau Israelẹ̌ e němpẹ̌tal᷊ang bọu anun tau Pilistin. I kitẹ e kinawatạ marasai. Mal᷊awọ bue taumata nate, sarang l᷊ai anạ i Tuang duang katau i Hofni rěduang Pinehas. Dingangu Petim Pẹ̌dariandin Duata e nipul᷊ahong sekẹ!”

¹⁸Sarang tau ene nakahabaru Peting Pẹ̌dariandi ene, i Eli e nanawo kụ nakaral᷊angị bọu kaderane su sěmběkang tukadu pasěllangeng. I sie kai seng tumanịu maghurang dingangu kai apạ ewe matawa, hakịu su tempong i sie nanawo lehẹ e napědi kụ i sie nate. I sie něngahạ tau Israelẹ̌ e ěpạ u pul᷊o su taunge karěngụ e.

¹⁹Su tempo ene, kawingi Pinehas dumarating si Eli e piạ kapapia kụ seng maranin tempone měhěnding. Piạ i sie nakaringihẹ̌ u Petim Pẹ̌dariandin Duata e seng nikapul᷊aho bọu e i amang u kawinge ringangu lai kawinge seng nate, sěngkianu i sie nakapěndang měngal᷊iking pělahěnding kụ tawe nararěnnạ tangú i sie němantelẹ̌.

²⁰Su tempong i sie maraning mate, manga wawine mẹ̌tẹ̌tangkiang si sie nẹ̌bera e, ”Pakawěbehẹ̌ bue! Anạ u e esẹ!” Kaiso i sie tawe simimbang arau nẹ̌pandung si sire.

²¹Kụ dariọ ene nisěbạ si Ikabod,[14] u angkuěnge, ”Darěntan Duata Mawantugẹ̌ e seng nailang bọu Israel.” — ual᷊ingu Petim Pẹ̌dariandin Duata e seng nipul᷊aho, ringangu ghaghurange mirarating ore lai kawinge seng nate. Ual᷊ingu ene i sie nẹ̌bera, ”Darěntang Duata KawantugangʼE seng nailang bọu Israel, batụu Peting Pẹ̌dariandin Duata e seng nihampasẹ̌.”