Read Sangir SAMUEL HUMOTONG 5 Bible Online

SAMUEL HUMOTONG 5 - Sangir bible

SAMUEL HUMOTONG 5

¹Sarangke tau Pilistin nakapul᷊aho Petim Pẹ̌dariandin Mawu, ute niwawan sire wọu Eben-Haezer sol᷊ong soan sire i sẹ̌sěbạ, Asdod.

²Paị sene peti ene nisuẹ̌ i sire su wal᷊eng mahang duatan sire; Dagon, kụ nipěllọ su sěndihang u tul᷊ada ene.

³Tangú sěngkarịěllone mal᷊ukadẹ̌ dal᷊ohong soan Asdod nahunděnta sol᷊ong tampạ ene kụ nikasilọ e nạung tul᷊adang Dagon kawe seng nahaka rimarěmmạ su ěntana, su těngong Petim Pẹ̌dariandim MAWU! I sire něhengkẹ tul᷊ada ene kụ niul᷊ị i sire kapia su tampạ e.

⁴Arawe sěngkariěllone reng mal᷊uka-l᷊ukadẹ̌, i sire nakasilo nạung tul᷊ada ene kawe seng nanawo saụ su těngong Petim Pẹ̌dariandi ene. Sěnsul᷊e ini tangú těmbọ u tul᷊ada ene ringangu takiahe ruamběka e napotọ kụ kạpapěllọ su mohong u tukadẹ̌, arawe wadang u tul᷊ada ene e wědangbe tawẹ gainge. (

⁵Hakịu ene, sarang orasẹ̌ ini manga imangu mahang duata i Dagon dingangu kal᷊awọu apang měnaněmbane su Asdod lụl᷊empang těngon tukadu wal᷊em pěnaněmbaěng si Dagon ene ringangu tawe rumal᷊inda.)

⁶Bọu ene MAWU něhukung tumanạ u Asdod dingangu wanua su rěduhe kụ niapal᷊ětong manga sahěnụ su wadang i sire.[15]

⁷Ene i sire nakasilọ e apa nariadi si sire ene, kụ i sire nẹ̌bera, ”Duatang Israel něhukung i kitẹ e ringangu mahang duatang kitẹ i Dagon. I kitẹ tawe wotonge mapakawalang Petim Pẹ̌dariandi-Ne pakatanạ sini něngalembol᷊aing karěngụ e.”

⁸Ual᷊ingu ene i sire něnotẹ̌ u ratung Pilistin i sire limang katau tadeạu apẹ̌tampung, bọu e pakịbal᷊o, ”Měnsang Petim Pẹ̌dariandin Duatang Israelẹ̌ e kai kapuraěng?” Angkuěng i sire manga ratu ene, ”Al᷊ingke sol᷊ong soang Gat.” Kụ peti ene nial᷊ing sol᷊ong soang Gat, soang Pilistin bal᷊ine sěmbaụ e.

⁹Kaiso sarangke peti ene nahumpạ sene, MAWU e něhukung u soa ene lai kụ nakakoạ pẹ̌gaghanohạ masaria. Tumanạ u soa ene, mangudạ arau lai maghurang napahang u tatuwon sahěnụ mal᷊awọ su wadang i sire.

¹⁰Bọu e Petim Pẹ̌dariandi ene niěntude sarang Ekron, soang Pilistin lai wal᷊ine. Nahumpạ e peti ene sene, měmamanuane němpěmansagẹ̌ u, ”Petim Pẹ̌dariandin Duatang Israelẹ̌ e niwawa ramahi e mědeạu i pěmate si kitẹ kěbị.”

¹¹Ual᷊ingu ene i sire nẹ̌kui kěbị datung Pilistin tadeạu apẹ̌komol᷊ẹ̌ kụ bọu ene nẹ̌bera, ”Sul᷊e e Petim Pẹ̌dariandin Duatang Israelẹ̌ ene sol᷊ong tampạ e nạung kal᷊imona tadeạu kumbahang měmate si kitẹ dingangu kal᷊awọu walagi kitẹ.” Su kạguwạu soa nariadi ghanohạ kahiang pělahukungu Ruata su měmamanuane kereng kawěhạ e.

¹²Taumata apan tawe nate, nituwoěngu kal᷊awọu sahěnụ ene, hakịu tumanạ u soa ene měmpẹ̌kẹ̌kiạ su manga mahang duatan sire, mẹ̌dẹ̌dorong tul᷊ung.