Read Sangir SAMUEL HUMOTONG 6 Bible Online

SAMUEL HUMOTONG 6 - Sangir bible

SAMUEL HUMOTONG 6

¹Ene natimụ e pitu wul᷊ang karěngụ e Petim Pẹ̌dariandim MAWU ene su Pilistin,

²tau Pilistin nẹ̌kuị e manga imang dingangu manga taha tariang bọu e nakiwal᷊o, ”Petim Pẹ̌dariandim MAWU e kai hinong kapuraěng i kitẹ tangú? Mạeng u sul᷊eěng i kitẹ su tampạ e, kai kereapạ e ngae?”

³Bọu e sasimbang i sire, ”Petim Pẹ̌dariandin Duatang Israelẹ̌ e kumbahang měngkai sul᷊eěng i kamene kerene, kaiso harusẹ̌be takinang u paporoseěng baugu tatubusẹ̌ dosanu. Kụ ual᷊ingu ene, i kamene sarungbe i pakaul᷊e, ringangu i kamene sarung masingkạ u unụ e Ruatang Israelẹ̌ e měngkate turusẹ̌ měhukung si kamene.”

⁴”Kai tatubusẹ̌ apạ e hinong gěllirang i kitẹ e si Sie?” kakiwal᷊on tau ene. Sasimbangu manga imang ene, ”Sahěnụ bul᷊aeng limam baụ, dingangu wal᷊awo wul᷊aeng limam baụ kerẹewe kal᷊awọu manga ratum Pilistin. Kai wal᷊inewe, papahang kụ pinẹ̌bisul᷊ẹ̌ pinakal᷊awọ e ringangu wal᷊awo e mal᷊aing seng himombang si kamene kěbị baẹ be kawanua ore lai manga ratu?

⁵Kụ i kamene harusẹ̌ pẹ̌koạ awẹ u manga sahěnụ dingangu wọu manga wal᷊awo kapẹ̌tẹ̌tondaise su wanuanu. Kụ ual᷊ingu ene tangú i kamene mẹ̌gẹ̌gěllịbeng adatẹ̌ su Ruatang Israel. Aramanung i Sie sarung měngirul᷊e měhukung i kamene, ringangu manga mahang duata ore lai ěntanang kamene.

⁶Apawe gunane i kamene mẹ̌tungketị u těmbọ kere ratu ringangu tau Misirẹ̌ nạung kal᷊imona? Abe kiwul᷊ei kereapa Mawu Ruata mapẹ̌taghunalang i sire sarang i sire měngkasahe, kụ tau Israelẹ̌ e i walan sire apěněntangu Misirẹ̌.

⁷Ual᷊ingu ene, pěndiahiko roda wuhu sěmbaụ dingangu sapi rarua kạpanusune, dingangu apang nạung tawe nipẹ̌pakẹ baugu pěmol᷊eng doda. Sakẹko sapi rarua ene su roda, kụ ahạko kal᷊awọu anạ u sapi ene kapia sol᷊ong dal᷊ungu těndạ e.

⁸Bọu ene, al᷊ạko Petim Pẹ̌dariandim MAWU, kụ lurangko su wowon doda, ringangu pěllọko su sěmběkane kasẹ̌ lohong manga apal᷊iwụ bul᷊aeng kụ hinong i sěmbang kamene si Sie kere laampung dosang kamene. Kụ balạ e kere roda ringangu sapi e aparal᷊eng hala.

⁹Kụ titike wue raral᷊enge; kereu Petim Pẹ̌dariandi bawaěngbe pẹ̌timonawe wanuane hala kụ kai soaʼm Bet-Semes, ene mangal᷊ene tangú Ruatan tau Israelẹ̌ e nạung nakakarěntan silakạ kereng kawěhạ e si kitẹ. Kai kereu roda ene tawe tamai kerene, ute i kitẹ makakasingkạ u hombang ene e wal᷊inewe wọu Ruatang Israel, kaiso kai tumbaẹng nẹ̌sarětạ.”

¹⁰I sire ene tangú timuhụ; i sire něngal᷊a sapi rarua kapạnusune, bọu ene nisakẹ su roda ene, arawe manga anạ u sapi e nikurung su ral᷊ungu patane.

¹¹Bọu ene Petim Pẹ̌dariandi e nilěngkang su wowong roda, ringangu kasẹ̌ lohong bal᷊awo wul᷊aeng dingangu awẹ u manga sahěnụ ene.

¹²Manga sapi ene apidu nahundal᷊eng nẹ̌timona Bet-Semes; binatang ene kapělẹ̌huange kai mang kạdal᷊enge tawe mělenga kaihi arau koaneng bọu ral᷊eng gẹ̌guwạ. Datung Pilistin i sire lima e turusẹ̌ tụtol᷊e sarang pẹ̌saraěng u Bet-Semes.

¹³Su tempo ene tumanạ u Bet-Semes kapạnipone gandung su wal᷊ane. Sarangke i sire nakasilo Petim Pẹ̌dariandi ene, měngkate mal᷊uasẹ̌ i sire němpaněnsomahe.

¹⁴Doda ene naědung su rěduhu watu ghẹ̌guwạ sěmbaụ su wawaelang i Yosua, sěngkatau tumanạ u Bet-Semes. Tumanạ u soa ene měmpěmẹ̌mare kalun doda ene bọu e něhěnsị tol᷊en sapi rarua ene nikoạ sasěmba tinongkạ su MAWU.

¹⁵Bọu ene tau Lewi e napal᷊intụ u Petim Pẹ̌dariandim MAWU ringangu kasẹ̌ lohong apal᷊iwụ bul᷊aeng e, kụ nipěllọ su wowom batu ghẹ̌guwạ ene. Bọu ene tumanạ u Bet-Semes němpẹ̌koạ sasěmba tinongkạ dingangu manga ghaghěllị ewe lai wal᷊ine e su MAWU.

¹⁶Ene piạ e ratum Pilistin i sire lima e nakasilọ e kěbị ene, napul᷊ẹ e i sire sol᷊ong Ekron su ěllo ene lai.

¹⁷Kụ ual᷊ingu ene tau Pilistin seng něndohong sasěmba tatubusẹ̌ dosa su MAWU waugu tumanạ u soa lima paparentaěngu ratum Pilistin i sire lima e. Manga soa ene ute kai: Asdod, Gasa, Askelon, Gat dingangu Ekron. Su tal᷊oaran soa ene piạ u piạ bal᷊oarị e, piạ belain tala. Apan soa e měděndohong sahěnụ bul᷊aeng sěmbaụ dingangu wal᷊awo wul᷊aeng sěmbaụ. Lětạ u karariadi ene tangú kai watu ghẹ̌guwạ tampạ i sire nělěngkang u Petim Pẹ̌dariandim MAWU. Kụ sarang ěllo ini e watu ene mang bědang ene su rahaming Yosua, tau Bet-Semes ene.

¹⁹Kaiso ual᷊ingu tau Bet-Semes e němpẹ̌dal᷊inge sol᷊ong dal᷊ungu Petim Pẹ̌dariandim MAWU e, pitum pul᷊o su kataune wọu tal᷊oaran sire nipatem MAWU. Tangú kawanua e němpělutu watụ u MAWU napakaěnsạ u hombang masaria e si sire.

²⁰Bọu e tumanạ u Bet-Semes němpẹ̌berạ e angkuěng, ”I sai hinong makakědang mẹ̌těngon MAWU, Ruata Susi e? Kai i tondang kitẹ su apa peti ene tadeạu marau woʼi kitẹ e?”

²¹Bọu e i sire něndolohu rarolohang sol᷊ong anum tumanạ u Kiryat-Yearim dingangu tatanatane kere ini, ”Tau Pilistin seng něnul᷊eng Petim Pẹ̌dariandim MAWU. Děntạ e kụ bawako peti ene sol᷊ong tampạ u.”