Read Sangir SAMUEL HUMOTONG 7 Bible Online

SAMUEL HUMOTONG 7 - Sangir bible

SAMUEL HUMOTONG 7

¹ Tangú měmamanuang Kiryat-Yearim něngal᷊a e Petim Pẹ̌dariandim MAWU e niwawane sol᷊ong bal᷊eng sěngkatau arenge i Abinadab; bal᷊e ene kạpapěllọ su wowon bul᷊ude. Bọu e i sire něngal᷊amatẹ̌ si Eleazar anạ i Abinadab, mědeạu měhapa Petim Pẹ̌dariandi ene.

²Apawe lai marěngụ Petim Pẹ̌dariandim MAWU ene kạtatanạ su Kiryat-Yearim, mangawe ruam pul᷊o su taunge. Karěngụ u tempo ene patikụ kawanuang Israelẹ̌ měmpẹ̌kẹ̌kiạ su MAWU makịtul᷊ung.

³Bọu e i Samuel nẹ̌berạ e su kal᷊awọu umatu Israel, ”Kereu i kamene mapulu mẹ̌bal᷊i sol᷊ong anum MAWU e dingangu měněmba si Sie ringangu kạguwạu naungu, ute harusẹ̌be i kamene pěnděmẹ u mahang duata ringangu tul᷊adan duata wawine i Asytoret. Pẹ̌mpanarakangu watangengu kahěngang su MAWU ringangu pěmpaněmbạ e si Sie samatang, tangú i kamene sarung i pakaliwirʼE wọu l᷊iman tau Pilistin.”

⁴Kụ tau Israelẹ̌ e němpěhipẹ e manga tul᷊adang mahang duataʼm Baal dingangu tul᷊adang mahang duata wawine i Asytoret, bọu e samatang kětạeng měmpạněmba su MAWU sẹ̌sane.

⁵Bọu ene něberạ e i Samuelẹ̌ angkuěng, ”Tampungko patikụ tau Israel su Mizpa, tangú iạ sarung mẹ̌kal᷊iomaneng su MAWU waugi kamene.”

⁶Bọu e nẹ̌tampungke i sire kěbị su Mizpa. I sire němpěnimbạ e akẹ bọu e němpaměmbing ene nikoạ sasěmba su MAWU, tuhụ e i sire němpẹ̌puhědang kanandung ěllo ene. Angkuěng i sire, ”I kami němpẹ̌dosa su MAWU.” (Su Mizpa ene i Samuelẹ̌ e nanětạ e něngurusẹ̌ manga perekarang pẹ̌sasitorin tau Israel.)

⁷Piạ e tau Pilistin nakaringihẹ̌ u tau Israelẹ̌ seng němpẹ̌komol᷊ẹ̌ su Mizpa, ute ratun Pilistin limang katau e nẹ̌buạ dingangu wuntuang i sire mědeạu měnekẹ tau Israel. Tau Israelẹ̌ e nakaringihẹ̌ hal᷊ẹ̌ ene tangú i sire něngkatakụ.

⁸Angkuěng i sire si Samuel, ”Abe pěngědo mẹ̌kal᷊iomaneng su MAWU Ruatang kitẹ tadeạu i kitẹ i pakaambangʼE wọu tau Pilistin.”

⁹Ual᷊ingu ene i Samuel němotọ anạ u domba reng kawuhuang, kụ nikoạ e sasěmba tinongkạ al᷊ingkai ghaghěllị su MAWU. Bọu ene i sie nẹ̌kal᷊iomaneng tadeạu MAWU e mẹ̌tul᷊ung be tau Israel, dingangu kakal᷊iomanenge ene raringihang bue.

¹⁰Piạ i Samuel kapẹ̌ngonggọ eng sasěmba tinongkạ ene, tau Pilistin nanětạ e nenekẹ; kaiso nẹ̌sarětạeng su tempo ene MAWU e riměllụ bọu langị sol᷊ong pusigi sire. I sire měngkate nẹ̌sal᷊iawuhẹ̌ kụ němpahuntal᷊ang kahiang bingọ.

¹¹Sordadong Israelẹ̌ e siměbang bọu Mizpa bọu e něnahusu tau Pilistin ene karaune maraning mẹ̌sul᷊ungu sol᷊ong Bet-Kar, dingangu napakawinasan sire.

¹²Bọu ene i Samuel něndarisị batu sěmbaụ, su pẹ̌saraěng u Mizpa ringangu Sen. I sie nẹ̌bera, ”MAWU e seng nẹ̌tul᷊ung i kitẹ nasukụ.” — bọu e watu ene nisěbạ e ”Batung Tul᷊umang”.

¹³Kerene katatainge tau Pilistin kinawatạ. MAWU e tawe napakawalan sire napasuẹ̌ kapia su wanuang Israel, karengụeweng i Samuel deng bědang biahẹ̌.

¹⁴Kal᷊awọu soang Israel kụ seng kinawatạ u tau Pilistin, nanětạ bọu Ekron sarang Gat, nisul᷊e su tau Israel. Kụ Israelẹ̌ e saụbe nakaěbạ kal᷊awọu wanuane. Tau Israel dingangu tau Amori e mal᷊aing nẹ̌biahẹ̌ dingangu pẹ̌darame.

¹⁵I Samuel nẹ̌parenta Israel kanandung pẹ̌bawiahe.

¹⁶Suapan taung i sie rụdal᷊eng mạngělikụ Betel, Gilgal dingangu Mizpa. Suapa ewen tampạ sene i sie měngẹ̌ngurusẹ̌ mapakạsueng hal᷊ẹ̌ u pẹ̌sasitori.

¹⁷Sěntiniạ bọu něngurusẹ̌ ene i sie nẹ̌sul᷊e kapia sol᷊ong bal᷊ene su Rama. Sene i sie nakoạ mělahukung tau Israel dingangu l᷊ai něndarisị u pěnaněmbaěng sěmbaụ baugu MAWU.