Read Sangir SAMUEL HUMOTONG 8 Bible Online

SAMUEL HUMOTONG 8 - Sangir bible

SAMUEL HUMOTONG 8

¹Sarang i Samuel naghurangke, manga anạ e nihengkẹ e pinakakoạ mělahukung su Israelẹ̌.

²Anạ e kaiakanenge i sẹ̌sěbạ si Yoël dingangu karuane i Abia. I rẹ̌dua nakoạ mělahukung su Bersyeba.

³Kaiso i rẹ̌dua tawe nakatol᷊e kakanoạ i amang i sire, kaiso tumbạeng mempěnẹ̌nahusu kal᷊auntu waugu watangeng hala. I sire němpanarimạ u roitẹ̌ sasorokẹ̌ kụ něhukungu kawanua kụ tawẹ kạadile.

⁴Ual᷊ingu ene ute kal᷊awọu těmbonang u Israel němpẹ̌tampung, bọu e nẹ̌těngon Samuel su Rama,

⁵ kụ nẹ̌berạ e si sie, ”Daringihẹ̌ko Amang, i Amang seng maghurang dingangu manga anạ i Amang tawe nakatol᷊e kakanoạ i Amang. Kụ mạpiaěngbe i Amang pěhengkẹ sěngkatau ratu tadeạu i kami piạbe ratune kerẹewe su manga wansa wal᷊ine.”

⁶Kaiso i Samuelẹ̌ e tawẹ karal᷊uase su karakin sire ene. Bọu e i sie nẹ̌kal᷊iomaneng su MAWU,

⁷kụ MAWU e něhengetang, ”Tuhukẹ e kěbị dorong u wansa ene si kau. U wal᷊inewe i kau i sẹ̌suhudi sire kaiso kawe Iạ. I sire tawẹ kapulune delaing Iạ makoạ kere ratun sire.

⁸Dokeng Iạ nẹ̌bawa si sire siměbang bọu Misirẹ̌, i sire nẹ̌biling bọu anu-Ku kụ něněmba manga mahang duata, dingangu apạ eweng orasẹ̌ ini e kẹ̌koateng i sire si kamene, ute kai ene nạung seng nikoạ i sire si Siạ e.

⁹Ual᷊ingu ene tuhukẹ e rorong i sire; kaiso sal᷊ěntihoke wue kahěnga-hěngang i sire, dingangu paul᷊ike wue i sire měnsang pẹ̌kapuraneng be kereapa i sire kahian datu.”

¹⁰Kal᷊awọu wawerang MAWU e nipaul᷊ị i Samuel su apan taumata kụ měmpẹ̌dedorong sěngkatau ratu si sie, angkuěnge,

¹¹”Kere ini sarung datunu miěbạ si kamene,” kerene sarung tatualagi Samuel. ”I sie sarung měnihasa manga anạ u apěnekeng těntara; sěmbahageang boʼi sire kere wuntuang u piạ karetane, sembahageang kerẹewe wuntuang u piạ kawal᷊one, dingangu apang bal᷊ine lai ute al᷊ingkai ghapaěng u rumaral᷊eng u laudẹ̌.

¹²Sěmbahageang něhengkẹ e pinakakoạ e pěrwira waugu sěhiwu su kataune, dingangu sěmbahageangkewe lai wal᷊ine waugu limam pul᷊o su kataune. Datu ene sarung měnihasa manga anạ u pěngal᷊i ansede, apěnampung lětạ u pěnsạ e, apẹ̌koạ manga aghide dingangu apal᷊iwụ u karetang sekẹ e.

¹³Manga anạ u manga wawine e sarung i rolohẹ̌ pẹ̌koạ lana mawěngi si sie dingangu nakoạ taha pěnasạ dingangu mẹ̌kakoạ borotẹ̌ e.

¹⁴I sie sarung měngal᷊ạ dahaminu, baelu anggoru, baelu zaitunngu karal᷊ěnggihange dingangu měngonggọ u ene su manga mělahal᷊ẹ̌ e.

¹⁵Pẹ̌sasuangeng dingangu baelu anggorʼu sarung kahinoěngu pajake sěngkatahạpul᷊one wọu wuane, bọu e hědong gěllirang su manga pěrwira dingangu manga sawohị e.

¹⁶I sie sarung měngal᷊ạ ěllangu, binatang lẹ̌hikinangu[16] kapiěnge ringangu kalidenu kụ mẹ̌pakẹ ene waugu munarane.

¹⁷Sěngkatahạpul᷊o bọu ghapaěng u kambing dingangu dombanu e sarung al᷊akeng kahian sie. Kụ i kamene hala sarung makoạ ěllange.

¹⁸Kụ kereu tempone seng nịdating, i kamene sarung měngkasusa kahian datu kụ seng kinapileng kamene e, kaiso MAWU e madiri rumaringihẹ̌ kakindoạ i kamene.”

¹⁹Kaiso wansa ene madiri rumaringihẹ̌ baweran Samuel, kaiso kawe i sire nẹ̌bera, ”Balạete! Maningbe kereapa i kami e mal᷊aing lụěnning u ratu.

²⁰I kami e měmẹ̌měnningu mẹ̌sul᷊ungu manga wansa wal᷊ine, datung kami hinong mẹ̌parenta si kami ringangu měngahạ si kami e su ral᷊ungu pẹ̌seketang.”

²¹Sarětạeng i Samuel seng nakaringihẹ̌ kal᷊awọu waweran sire ene, i sie něhabaru ene su MAWU.

²²MAWU e simimbang, ”Tol᷊eị e kapulun sire ringangu hengkẹ e sěngkatau kakoạ datun sire.” Bọu e i Samuel nangoro apan tau Israelẹ̌ e apakạpul᷊ẹ sol᷊ong bal᷊eng sire sěngkatau-sěngkatau.