Read Sangir SAMUEL HUMOTONG 9 Bible Online

SAMUEL HUMOTONG 9 - Sangir bible

SAMUEL HUMOTONG 9

¹Piạ sěngkatau kalạ dingangu matuhasẹ̌ bọu hěnton Benyamin, arenge i Kish. I sie kai sěngkatau wọu walagi Bekhorat, lelang e wọu ghal᷊ipohong Afiah, i Amang e i Abiel dingangu i nenẹ e i Zeror.

²I Kish piạ anạ e esẹ arenge i Saul, sěngkatau umbaseng masadadạ dingangu matoghasẹ̌. Tawẹ u sarang sěngkatau su kạguwạ u Israelẹ̌ e kụ limembong kal᷊epate woʼi sie. Badange něngalembong karangẹ e; kal᷊awokange dangẹ u tau Israelẹ̌ e kětạeng mẹ̌dẹ̌datingu wěmbange.

³Piạ su sěhěllo kalideng Kish pira-piram baụ nailang. Ual᷊ingu ene nẹ̌berạ e i Kish si Saul, ”Bawako piạ u sěngkatau mẹ̌tatangkiang kụ pẹ̌deạko manga kalide ene.”

⁴Bọu e i Saul dingangu paparentaěnge něngělikụ e wanua wawul᷊urang u Efraim dingangu ěntanang Salisa, kaiso tawe nẹ̌sombang u manga binatang ene. Bọu ene i sire měngkate rimal᷊eng su ěntanang Sahalim, kaiso manga kalide ene mal᷊aing tawe nipẹ̌sombang sene. I sire mal᷊aing němpědeạ su wanuam Benyamin, kaiso měngkate lai sia-sia.

⁵Ené i sire nahumpạ e su ěntanang Zuf, i Saul nẹ̌berạ e su manga mẹ̌tatangkiange, ”Boete i kitẹ mapul᷊ẹ e, kibasinẹ u i papạ měngkate sukaghaghěngganeng u měngẹ̌ngěnna si kitẹ sul᷊ungu manga kalide ene.”

⁶Ěllang ene simimbang, ”Hědoko! Su soa ini piạ sěngkatau ěllang u Ruata. I sie lẹ̌adateng u taumata, batụu apang iwẹ̌berane sěntiniạ mambeng mạdiadi. Boete i kitẹ sol᷊ong anun sie, aramanung i sie makahabarẹ̌ měnsang kai suapa manga kalide ene.”

⁷Angkuěng i Saul, ”Mạeng u i kitẹ tamai mẹ̌sombang i sie, kai apạ e onggotang i kitẹ e seng nasue, kụ i kitẹ tawẹ manga apa hinong ighěllị su ěllang u Ruata ene arau ěng?”

⁸Ěllang ene e simimbang, ”Nẹ̌sarětạbeng si siạ bědangbe piạ doitẹ̌ sal᷊aka sěngkal᷊ěpa. Ene hědo takụ ionggọ su ěllang u Ruata ene tadeạu i sie mapulu wue měhabarẹ̌ si kitẹ e měnsang suapa manga kalide ene.”

⁹”Kerenẹ e!” angkuěng i Saul. ”Endaị e i kitẹ tamai.” Bọu e tamaị e i sire sol᷊ong soa, sol᷊ong tampạ u ěllang u Ruata ene. Piạ i sire simakạ e wul᷊ude mẹ̌tẹ̌timona soa ene, nẹ̌sombangke i sire ringangu manga mal᷊ahuala měmpěnimbạ akẹ su sumu. Bọu e i sire nakiwal᷊o su manga mal᷊ahuala ene, ”Su soa ini piạ tau tahatighadẹ̌?” (Su tempo ene sěngkatau nabi e i sẹ̌sẹ̌bạ tahatighadẹ̌, kụ kereu sěngkatau mapulu makiwal᷊ong apa-apa su Ruata, i sie mẹ̌bera kere ini, ”Boete i kitẹ makiwal᷊o su tahatighadẹ̌.”)

¹²”Iạ, piạ,” angkuěngu manga wawine ene, ”buhu-wuhu i sie rimal᷊eng něngal᷊imona si kamene. Manga i kamene mahawesẹ̌ aramanung i kamene nakarahiu wue. I sie wuhụ e narěnta su soa watụ u sěhěllo ini su wowong pananěmbaěng su wul᷊ude kai piạ sasěmba waugu kawanua. Apang ninotẹ̌ e tawe měmpẹ̌kaěng kereu i sie tawe rimẹ̌děnta, batụu i sie harusẹ̌ měngal᷊amatẹ̌ sasěmba ene kal᷊imona. Kereu i kamene tamai ini ute, i kamene sarung mẹ̌sombang těntal᷊ang i sie tawe simẹ̌saka wul᷊ude mědeạu kumaěng.”

¹⁴Kụ i Saul dingangu ěllange rimal᷊eng sol᷊ong soa, kụ piạ i sire kasuẹ̌ e su tukadu pasěllangeng, i sire nẹ̌sěmmạ dingangi Samuel kạdal᷊enge sol᷊ong tampạ u pẹ̌kakal᷊iomanengang su wěntihe.

¹⁵Sěhěllo kal᷊imonang ene, MAWU e timanata si Samuel kere ini,

¹⁶”Diěllo mal᷊ukadẹ̌ manga kere ini, Iạ hědo měndolohu sěngkatau wọu hěnton Benyamin apẹ̌sombang i kau. Hengkẹ e i sie ringangu tunduʼm pěndal᷊anisẹ̌ baugu pakakoạ datung manga umatẹ̌-Ku Israelẹ̌ e. I sie sarung měngambang umatẹ̌-Ku wọu tau Pilistin. Iạ e seng nakasilo kasasigẹ̌sạu umatẹ̌-Ku ringangu nakaringihẹ̌ sasangị i sire mědẹ̌dorong tul᷊ung.”

¹⁷Piạ i Samuel nakasilo si Saul, MAWU e něhengetang si sie, ”Kai seng ini e taumatane Takụ nihabarẹ̌ si kau e. I sie kai sarung mẹ̌parenta kawanua-Ku.”

¹⁸Ené i Saul kakạdanịeng Samuel su tukadẹ̌ kahumotongange, apidu nakiwal᷊o, ”Mẹ̌dorong ampung tuang, kai suapa wal᷊en tahapatehẹ̌ ene?”

¹⁹I Samuelẹ̌ e simimbang, ”Seng iạ ini tahapatehẹ̌ ene. Tamaị e pěngal᷊imona si siạ sol᷊ong tampạ u pẹ̌kakal᷊iomanengang su wul᷊ude, ual᷊ingu sahěllo ini i rua e sarung apẹ̌simokol᷊ẹ̌ dingangku. Diěllo mal᷊uka-l᷊ukadẹ̌ kal᷊awọu kakiwal᷊onu e hědon takụ simbaheng, bọu ene i rua e wotonge mẹ̌sul᷊e.

²⁰Mạanum manga kalidenu nailang těllu ěllo nal᷊iu e, abe ghěnggang, batụu seng kinaěbakeng. Tapengu l᷊ai kaaregaěng e su kaguwau Israelẹ̌ e sarung takụ i onggọ si kau ringangu manga anạu sěmbaụ i amangu.”[17]

²¹I Saul simimbang, ”Iạ ini e kai wọu hěntoʼm Benyamin, hěnto kakạdodọkang e su Israel, dingangu lai něngalembọewe tawẹ mangal᷊ene su ral᷊ungu hěnto ene. Kụ kawe unuẹ i Tuang nẹ̌berawe kerene si siạ tangu?”

²²Bọu ene i Samuel něnggighilẹ̌ be si Saul dingangu ěllang e simuẹ̌ su ral᷊ungu huange ghẹ̌guwạ, bọu e i sie nẹ̌gěllị u tampạ kahumotongange si sire su těngon sire apan ninotẹ̌ manga těllum pul᷊o su kataune.

²³Bọu e i Samuel nẹ̌bera su kokị, ”Sadiako gěsim binatang u rul᷊unge kanini takụ pinakiwawa si kau ene.”

²⁴Bọu e kokị ene něngal᷊a e ghẹ̌sine kụ něhae wọu ghẹ̌sim palange kụ bọu ene nisạdiane su těngon Saul. I Samuel[18] nẹ̌bera, ”Ini e kai sěmbahageang takụ nihae waugʼi kau tadeạu i kakinạ u orasẹ̌ ini nẹ̌sarětạ ewe lain sěngkakaěng dingangu manga sake wal᷊ine.[19] Sal᷊amatewe mẹ̌simokol᷊ẹ̌.” Tangú wọu ene nẹ̌simokol᷊e i Saul. Kụ su sěhěllo ěndai ene i Saul něngidopẹ̌ sěngkapěngidopẹ̌ dingang i Samuel.

²⁵Bọu ene i sire riměsung bọu tampạ u pẹ̌kakal᷊iomanengang ene kụ nahunsuẹ su soa. I Saul nionggotangu raral᷊okaěng[20] su wowom bal᷊e,[21]

²⁶bọu ene i sie nẹ̌tikị.[22] Ené ěllo siměnnangke, i Samuel nẹ̌kuị e si Saul su wowong atụ ene, angkuěnge, ”Pẹ̌bangungke, ěndaị e takụ tondaěng i kau.” I Saul nẹ̌bangungke, kụ dimal᷊engke ringang i Samuel.

²⁷Ené i sire nẹ̌datingkem biwihu soa nẹ̌berạ e i Samuel si Saul, ”Dolohẹ̌ko mẹ̌tatangkiang u e aparal᷊eng pěngal᷊imona si kitẹ.” Bọu ene rimal᷊engke mẹ̌tatangkiang ene, kụ i Samuel saụ kapia nẹ̌bera, ”Pěngědungko sini kadodọ tempo, iạ e sarung maul᷊ị u tatanatang Mawu Ruata si kau.”