Read Sangtam Naga LIPOH 1 Bible Online

LIPOH 1 - Sangtam Naga bible

LIPOH 1

¹Adikeh la Tsingrangbanü ninglih thricho.

²Alimih tsü müthriziepü adeng licho ko amarürah tsü hiba müthrizieba asoh-u michah licho; ko Tsingrangba Anbü kih michah mongchi licho.

³Ko Tsingrangbanü yocho, “Atsingse lieng,” ko atsingse chürocho.

⁴Ko Tsingrangbanü atsingse tsü tsa ngucho; ko Abinü atsingse tsü amarürah tenü changsahjücho.

⁵Abinü atsingse te “Anyümong” ko amarürah te “Aromang” pü dsicho. Macho ko tsingsecho, hütsü akhudiba nyümong licho.

⁶Hütsüpü Tsingrangbanü yocho, “Kih la tsü ningkong khüdu chürosohng ko hütsü khu kih lanü kih tsü changsahsohng.”

⁷Ko Tsingrangbanü ningkong tsü külüpcho ko hütsü khu amilang liba kih lanü apohki liba kih tsü changsahcho.

⁸Abinü ningkong te “Ning” pü dsicho. Macho ko tsingsecho, hütsü anyüuba nyümong licho.

⁹Hütsüpü Tsingrangbanü yocho, “Ning pohki kih tsü müdüm khüdu la tingbülung ko alih akung chürung ko hütsüta kangcho.”

¹⁰Abinü akung te tsü “Alih” pü dsicho ko tingbülungba kih te “Kihdi” pü dsicho.

¹¹Ko Tsingrangbanü yocho, “Alihnü singdonglidong lüpcho chürosohng, atse zehba ko asih sihba, ko hütsüta chürocho.”

¹²Hütsüta alihnü singdonglidong chürosohcho ko Tsingrangbanü hütsü tsa ngucho.

¹³Macho ko tsingsecho, hütsü asangu nyümong licho.

¹⁴Hütsüpü Tsingrangbanü yocho, “Ama tenü anyümong changsahnung nengdang ningkong chah atsingse chürosohng ko hütsü khu akyang, kang ko nyümong müdhesohng;

¹⁵ko limih khyang atsingse jünung nengdang arühnü ning chah visohng ko hütsüta kangcho.”

¹⁶Ko Tsingrangbanü atsingse amülülah anyüh külüpcho, anyümong nengdang nyü ko aromang nengdang chonu; ko Abinü chenghitisü külüpcho.

¹⁷Abinü limih la visohnung ning chah atsingse yohpücho,

¹⁸anyümong ko aromang michah xükümnung, ko amarürah lanü atsingse changsahsohcho. Ko Tsingrangbanü hütsü tsa ngucho.

¹⁹Macho ko tsingsecho, hütsü müyüu nyümong licho.

²⁰Hütsüpü Tsingrangbanü yocho, “Kih tsü kangzahnü jeng kang ko ningwüm tsü uzatinü jengsohng.”

²¹Hütsüta Tsingrangbanü kihkangdi, kih la liba kanglungrü langkhüru ko uza lüpcho külüpcho. Ko Tsingrangbanü hütsü tsa ngucho.

²²Abinü arüh apüm müwajücho ko kih la kanglungrü te kih jeng azah thsanung ko uzati te suhchehnung mülacho.

²³Macho ko tsingsecho, hütsü müngau nyümong licho.

²⁴Hütsüpü Tsingrangbanü yocho, “Aliminü kanglungrü lüpcho chürosohng: Kuh la kangba ko rangmü kanglungrü, azikyah ko amülah.” Ko hütsüta chürocho.

²⁵Hütsüta Tsingrangbanü arüh apüm külüpcho ko Abinü hütsü tsa ngucho.

²⁶Hütsüpü Tsingrangbanü yocho, “Ihsanü nyitsarü Ihsa tsah, Ihsa kyochola thrinung; ko arüh tsü nguh, uza ko kanglungrü apüm, kuhla kangba ko rangmü kanglungrü, azikyah ko amülah apüm michah abüdongrü kangsohnung.”

²⁷Hütsüta Tsingrangbanü Apu kyocho la nyitsarü thricho. Abinü arüh khingkurü ko adhrerü thricho.

²⁸Ko Tsingrangbanü arüh müwajo yocho, “Suhchehng ko limih sohjeng ko hütsü rahsehng. Nguh, uza ko rangmü kanglungrü apüm michah Ihnü nührü abüdongrü kangsohre.

²⁹Ihnü nührü khyang singtse ko singsih adhangpi atsunung jüre;

³⁰ta rangmü kanglungrü ko uza apüm shulüm atsunung zanu ko singvarova jüre”, ko hütsüta kangcho.

³¹Ko Tsingrangbanü Abinü thricho apüm dhengcho ko Abinü hütsü tsa ngucho. Macho ko tsingsecho, hütsü dhüroh-u nyümong licho.