Read Sangtam Naga LIPOH 11 Bible Online

LIPOH 11 - Sangtam Naga bible

LIPOH 11

¹Adikeh la lihküp la nyitsarü atümungnü yu khüdu du müjang chocho.

²Ko arüh nyüchürolang rümchi wüde, arühnü Babylon lih la Shinar ngah ngucho ko hütsüla licho.

³Ko arüh-e arüh-rü chota yocho, “Rung! Ihsanü alihnü lihtah lung külüpnung.” Hütsüta arühnü lung mülih lihtah lung ko arüh münakehtasohnung aji bichicho.

⁴Hütsüpü arühnü yocho, “Ihsanü Ihsa neng yohpünung, ko limih jeng müshupishuzanung nengdang yangdi khüdu külüp rangrangkuh khüdu ning chii thsanung.”

⁵Ta ABÜDONGBAnü arühnü külüp yaba yangdi ko rangrangkuh dhengnung jürocho.

⁶Ko Abinü yocho, “Ade hiri nyitsarü khüdu ko yu khüdu du chole; ko hi arühnü lümcho nguchinung adikehrüe. Tunyah mülipü arühnü arüh nguchinyücho nguchichehnung.

⁷Ihsanü jowonung ko arüh-e arührü yu münyichehtasohnung arüh yu charütajünung.”

⁸Hütsüta ABÜDONGBAnü limih jeng arüh tsishosohcho, ko yangdi külüpba tsü nyehlicho.

⁹Hiba yangdi te Babylon pü dsicho, tunüo hütsüla ABÜDONGBAnü nyitsarü yu charütajücho ko hütsü lanü Abinü arüh limih jeng tsishosohcho.

¹⁰Shem chahnü trahchocho tsü hiri: Kihmülüm khanglang kang anyüh lipü, Shem kang 100 azirü thsade atsurü khüdu Arpakshad licho.

¹¹Hütsü khanglang abi kang 500 licho ko atsurü apasü licho.

¹²Arpakshad kang 35 azirü thsade, atsurü khüdu Shela licho.

¹³Hütsü khanglang abi kang 403 licho ko atsurü apasü licho.

¹⁴Shela kang 30 thsade atsurü Eber licho.

¹⁵Hütsü khanglang abi kang 403 licho ko abi atsurüti apasü licho.

¹⁶Eber kang 34 thsade atsurü Peleg licho.

¹⁷Hütsü khanglang abi kang 430 licho ko atsurü apasü licho.

¹⁸Peleg kang 30 thsade atsurü Reu licho.

¹⁹Hütsü khanglang abi kang 209 licho ko atsurü apasü licho.

²⁰Reu kang 32 thsade atsurü Serug licho.

²¹Hütsü khanglang abi kang 207 licho ko atsurü apasü licho.

²²Serug kang 30 thsade atsurü Nahor licho.

²³Hütsü khanglang abi kang 200 licho ko atsurü apasü licho.

²⁴Nahor kang 29 thsade atsurü Tera licho.

²⁵Hütsü khanglang abi kang 119 licho ko atsurü apasü licho.

²⁶Tera kang 70 azirü thsapü, abi Abram, Nahor ko Haran au kangcho.

²⁷Abram, Nahor, ko Haran au Tera chahnü trahchochoti hiri: Haran tsü Lot au thsacho,

²⁸Haran tsü au Tera müsüe apu suro lih Babylon, Ur yangdi la sücho.

²⁹Abramnü Sarai khyücho ko Nahornü Haran tsulatpü Milka khyücho; Haran tsü Iska au sü thsacho.

³⁰Sarainü tsuzarü müthsacho.

³¹Teranü atsudhre Abram, Haran tsurü ashamtsurü Lot, atsunyahtpü Sarai, Abram nitpü abi yola nüpü Babylon la Ur yangdi pehjüpü Kanan lih yang shemüsucho. Abramnü Haran chii wücho ko hütsüla licho.

³²Hütsüla Tera kang 205 thsade sücho.