Read Sangtam Naga LIPOH 13 Bible Online

LIPOH 13 - Sangtam Naga bible

LIPOH 13

¹Abramnü Ijip lanü Negev lang anitpü ko akuthsi apüm hipü tuwücho ko Lot abi yola wücho.

²Abram akang kuthsi, hon ko taripi la dee alirü kangcho.

³Hütsüpü abinü Negev pehjüpü Bethel lang müdüm müdüm la lii wücho. Abinü akhulang shükuh thsaba Bethel e Ai nyüh kahla müdüm tsü ro chihcho

⁴ko abinü hütsüla bholu khüdu külüpcho ko abinü ABÜDONGBA mübücho.

⁵Lot-sü san, miza ko misü ko abi kukhi ko kulirüti licho.

⁶Anyüh kanglungrü drongra licho ko arüh lamungchah kükyo mülichonü anyüh müjang linung mütsacho.

⁷Ko Abram e Lot nyüh Kanglungrü nyahrü yübütacho. Hütsütade yingcheh Kananrü ko Perizrü hütsüla licho.

⁸Achotsü Abramnü Lot te yocho, “Ihjü mahkhang Ihjü kanglungrü nyahrü kahla müyübütabae, tunüo Ihjü jünirüe.

⁹Hütsüeko Ihjü zanung. Nühnü mürucho alih throchehng. Nüh khüulang wüng, ko Ih akhüulang wünung.”

¹⁰Lotnü dhengmükangcho ko Jordan ngah apüm, Zoar lang wüba lang tsü ABÜDONGBA Tbü mahkhang Ijip ngah kyo kih thangchi li ngucho. (Hi ABÜDONGBAnü Sodom ko Gomora müchangjüde.)

¹¹Hütsüta Lotnü Jordan ngah apüm throcho ko nyüchüro lahpi shemüsu tsicho. Hütsüta anyüh tsü zacho.

¹²Abram Kanan lih la licho, ko Lot angah yangditi yola licho ko Sodom amünyeh abinü shükuh thsacho.

¹³Sodom la nyitsarütinü amükhyu ko ABÜDONGBA nyüm amünyi arangcheh nguchicho.

¹⁴Lot tsiko khanglang, ABÜDONGBAnü Abram te yocho, “Nüh yaba la tsünü apümlang mükangmüla dheng.

¹⁵Nühnü nguba lih hi apüm nüh ko nü shümtsurü khyang jünung ko hütsü lede nü yo thsanung.

¹⁶Ihnü nü majüh alih lihpi roh-i kangsohnung; ko nyüh khüdunü alih lihpi khidhengchehkhang, nü majühsü khidhengchehnung.

¹⁷Ade, wüng ko Ihnü nü khyang jüba lih tsü jücho dheng.”

¹⁸Achotsü Abramnü ashükuh lohmüinü wü Hebron la Mamre yo langsing arangcheh shündhün licho, ko hütsüla abinü ABÜDONGBA khyang bholu khüdu külüpcho.