Read Sangtam Naga LIPOH 16 Bible Online

LIPOH 16 - Sangtam Naga bible

LIPOH 16

¹Abram nitpü Sarainü abi khyang azarü münümüsujücho. Ta abükyü ayularü khüdu anengnü Hagar licho,

²achotsü abükyünü Abram te yocho, “ABÜDONGBAnü I khyang azarü suronung müjü. Hütsüeko I kulilatpü te mükhong. Abükyünü I khyang azarü lijünung kohle.” Achotsü Abramnü Sarainü yocho nyicho.

³Hütsüta abükyünü anii khyang Hagar tsü ashüm thsanung jücho. (Hi Abram Kanan la kang dhüre lipü tikehcho).

⁴Abramnü Hagar te mükhongcho, ko abükyü fü müdeng kangcho. Khode abükyü fü müdeng pü abükyünü müdhecho, abükyünü müthseh kang Sarai mükhimüngucho.

⁵Hütsüde Sarainü Abram te yocho, “Hagarnü Ih mükhimünguba hi nühnüe. Ihnü nü khyang abükyü jücho, ta abükyü fü müdengcho müdhe tinü, abinü Ih mükhimüngure. ABÜDONGBAnü Ihjü sü yujenang yu khaang!”

⁶Abramnü lalingcho, “Dheng, abükyü tsü nü yuhlarüe, ko nü pohki lile; abi chah nühnü tu nguchinyüro nguchieng.” Hütsükolü Sarainü abükyü tsü dira mütsa bichichonü abükyünü rang tsicho.

⁷Ko ABÜDONGBA riwürünü lipilih Shur lang la kihna khüdu la Hagar shiro yocho,

⁸“Sarai yuhlatpü Hagar! Nüh khüdenü rocho ko khüde würo?” Abükyünü lalingcho, “Ih I büdongtpü tenü rang tsire.”

⁹Abinü yocho, “Thali wüng ko abükyü pohki lieng.”

¹⁰Hütsüpü abinü yocho, “Ihnü nü chahnü mükhilong trahchosohnung.

¹¹Nühnü adhrerü zarü khüdu nümüsunung ko abi neng Ishmael dsijünung, tunüo ABÜDONGBAnü nü alongri yuva yuchiko.

¹²Ta nü tsudhre tsü rangmü gadu kyo linung; abinü atümung nyümnung ko atümungnü abi nyümnung. Abi tsutpurü atümung tenü za linung.”

¹³Hagarnü alüm la abükyü te tsingdhengcho, “Ihnü yuje Tsingrangba ngupü hütsü nengdang yonung lirü mah-o?” Hütsünü abükyü te chotaba Tsingrang te “Nguba Tsingrang” pü dsicho.

¹⁴Hütsü khu nyitsarünü Kadesh e Bered nyüh kahla kihkong te tsü “Beer Lahai Roi”, khüiba adüzü Ih Nguba “Akang Liba Kihkong” pü dsicho.

¹⁵Hagarnü Abram khyang azarü khüdu nümüsujücho ko abinü Ishmael pü dsicho.

¹⁶Hütsütade Abram kang qurepü dhüroh azirü thsacho.