Read Sangtam Naga LIPOH 18 Bible Online

LIPOH 18 - Sangtam Naga bible

LIPOH 18

¹ABÜDONGBAnü Amüsa singdong Mamre yo langsing shündhün Abraham te chüro shirütacho. Abrahamnü abi shükuh trahtri la nyüthung la pümde,

²abinü kehchü dhengde nyüh asang hütsüla ya ngucho. Abinü arüh nguyeng arüh mütohnung shang chüducho. Abinü mükhukeh arüh te yocho,

³“Adirüti, I kuhla mümütrahyohpü lahkhu tütsi; nührü dikehnung Ih hila lile.

⁴Nührü jing thsüthohnung Ihnü kih aza hirojünung; singkhümki azachah kyahshang.

⁵Ihnü tsuyongnungsü azikyah hirojünung; hütsünü nührü mütozah shitsehnung tase jünung. Nührü I kuh lang rochonü Ih hechire, hütsüeko Ihnü nührü dikehnung.” Achotsü arühnü yocho, “Nühnü yocho kyo nguching.”

⁶Abrahamnü dhsüthsa shükuh la tsü züdu Sara te yocho, “Zahding, hüm atsauba tsü khyo hümthse aza külüpm.”

⁷Hütsüpü abinü shang wünü misüza anyünyeh-u khüdu hiro kulirü khyang jücho, ko arühnü hütsü dhsüthsa rungnümcho.

⁸Abinü nyikihsu aza, nyikih aza ko shuh hiro arüh bete müsho yohpüjücho. Hütsüla singkhümki apunü arüh dikehcho, ko arühnü tsucho.

⁹Hütsüpü arühnü abi te tsingdhengcho, “Nü nitpü Sara khülo?” Abinü lalingcho, “Abükyü shükuh la tsü lile.”

¹⁰Arüh yola khüdunü yocho, “Choo düku lipü Ih thali ronung ko nü nitpü Saranü azarü khüdu nümüsunung.” Sara hütsüla trahtri yingte nyi yacho,

¹¹Abraham e Sara nyüh khütang ashirü ko adelü Sara ayah roba mii nyehli pehpü licho.

¹²Hütsünü Saranü münyü abükyü te yocho, “Ih shipehpü, ade akhyünyüba ronung do? Hütsü du mah, I nii mii khütang shipehko.”

¹³Hütsüde ABÜDONGBAnü Abraham te yocho, “Tuepü Saranü münyü Ih hidoi shipü azarü linungo pü yoro?

¹⁴ABÜDONGBA nengdang amükohnung tunang lirü mah-o? Ihnü yocho roh-i, choo düku lipü Ih thali ronung, ko Saranü azarü khüdu nümüsunung.”

¹⁵Ta Saranü adrülangnü, “Ihnü mümünyü,” pü yocho. Ta abinü yocho, “Nühnü münyüko.”

¹⁶Hütsüpü nyitsarüti tsünü hütsü pehjüpü Sodom chahchü ngunung müdüm khüdu lang wücho, ko Abrahamnü arüh müyangyohchücho.

¹⁷Ko ABÜDONGBAnü apu te yocho, “Ihnü tu nguchinung liro hütsü Abraham tenü rang müyohpünung.

¹⁸Abi chahnü khütang trahchonung ko yucho arangcheh kangnung ko Ihnü abi khu yuchoti apüm müwajünung.

¹⁹Abi tsurü ko abi chahnü trahchochotinü I yocho nyinung, tu athsalang ko yuje hütsü nguchinung ko thsingyusohnung shulüm Ihnü abi throchehko. Arühnü nguchikhang, Ihnü abi te nyengchocho lüpcho abi nengdang nguchinung.”

²⁰Hütsüpü ABÜDONGBAnü Abraham te yocho, “Sodom ko Gomora nyüm adrünung mülangjüba lile, ko arüh münyi tsü dirale.

²¹Ihnü yuchiba mülangjüba tsü yuje a mahnang müdhenung Ih jowünung.”

²²Hütsüpü nyüh anyüh tsü Sodom lang lahpi tsicho, ta ABÜDONGBA tsülü Abraham te nyehli yacho.

²³Abrahamnü ABÜDONGBA shündhün ropü tsingdhengcho, “Yuje Nühnü münyirü yola amüsarü mii changjünung do?

²⁴Yangdi la tsü amüsarü dhünyang likhang, arüh dhünyang khyanglangnü dusü yangdi tsü mükhümchonung ang?

²⁵Yuje, Nühnü münyirü yola amüsarü müchangjünung. Hütsü amükohnung! Nühnü hütsü münguchicheh. Nühnü hütsüta nguchide, amüsarü tsü münyirü yola khingchire. Hütsü amükohnung. Limih apüm yu tsü yujenü khanung.”

²⁶ABÜDONGBAnü lalingcho, “Sodom la amüsarü dhünyang likhang, arüh khyanglangnü yangdi shünü khümchonung.”

²⁷Abrahamnü thali yocho, “ABÜDONGBA, Nü te Ihnü müringpü mütozah chotacho nengdang mülang pehjüng. Ih nyitsarü khüdu du ko Nü te tu yonung mükoh.

²⁸Ta adüzünü yangdi la tsü Amüsarü tsü dhünyang mahpü yürepü münga du likhang, münganü müchihcho tsünü yangdi shünü changjünung mah-o?” ABÜDONGBAnü lalingcho, “Amüsarü yürepü münga likhang Ihnü yangdi tsü müchangjünung.”

²⁹Abrahamnü thali yocho, “Adüzünü yüre du likhang?” Abinü lalingcho, “Yüre likhang Ihnü müchangjünung.”

³⁰Abrahamnü yocho, “Yanglilüm zii tüchüro, ABÜDONGBA, ta Ihnü thali chore. Sangre du likhang khütanung?” Abinü yocho, “Sangre likhang Ihnü müchangjünung.”

³¹Abrahamnü yocho, “ABÜDONGBA, Nü te Ihnü müringpü mütozah chotacho nengdang I khyang mülang pehjüng. Adüzünü mükyü du likhang khütanung?” Abinü yocho, “Mükyü likhang Ihnü müchangjünung.”

³²Abrahamnü yocho, “Yanglilüm zii tüchüro, ABÜDONGBA, Ihnü khüdupi du chonung. Dhüre du likhang khütanung?” Abinü yocho, “Dhüre dusü likhang Ihnü müchangjünung.”

³³ABÜDONGBA tsü Abraham te chotakayeng tsipehcho ko Abraham kuh lang thali rocho.