Read Sangtam Naga LIPOH 19 Bible Online

LIPOH 19 - Sangtam Naga bible

LIPOH 19

¹Khode riwürü anyüh tsü hütsü anyüzehlang ro Sodom chihcho, Lot tsü yangdi tbükhüm la pümcho. Abinü arüh ngudu shemüsu wü arüh mütohcho.

²Abinü arüh jingte mükhukeh yocho, “Adirüti, Ih hila nührü dikehnung lile. Yanglilüm I kuh lang rung. Nührü jing thsüthohng ko shomülang hila kyahshang. Atunyang du mütoh suropü tsieng.” Ta arühnü yocho, “Doh, Ihrü ama ayung yanglong la linung.”

³Abinü mütozah kihchichonü akhanglang arühnü abi kuh lang wücho. Lotnü akulirü te hümthse külüp shirü khyang tsuyongnung atsa rungnümnung yocho. Ko khode hütsü rungnümcho arühnü tsuyongcho.

⁴Ta arüh müyüp-ede, Sodomrünü kuh tsü mükangticho. Hütsüla yangdi nyitsarü aza-azi apüm zehcho.

⁵Arühnü Lot dsicheh tsingdhengcho, “Nü kuhla müdongnung roba shirü tsü khülo? Ihrü yang arüh ade norung!” Sodomrünü arüh te mükhongnyücho.

⁶Lotnü akhanglang kukhang khangti dongkhu chüducho.

⁷Abinü arüh te yocho, “Jünirüti, Ihnü nührü te kihchire, amütsa nguchi hitari tünguchi.

⁸Dheng, I tsularü amüxengcho amüthsengcheh anyüh lile. Ihnü nührü khyang anyüh norojünung, ko nührünü tu nguchinyüro arüh chah nguching. Ta hiri chah tu tünguchi; arüh I shirü lile, ko Ihnü arüh tsungtinung athsalang.”

⁹Ta arühnü yocho, “Lang khuchüng, nüh atsichirü! Ihrü te thülanung nüh süo? Lang la tüya mahkhang arüh tenü nü chah amütsau bichinung.” Arühnü Lot nyümpehpü kukhang nyümphohnung wücho.

¹⁰Ta nyüh anyüh tsünü kheh tohchehchü Lot tphahyohcho, ko kukhang tsü khangtipehcho.

¹¹Hütsüpü arüh khyang trahtri müngusohnung shulüm dongkhu yarü apüm nahtohsohcho.

¹²Nyitsarü anyüh tsünü Lot te yocho, “Nü te khürü likhang, atsurü, atsularü, tsunyahrüti mahkhang yangdi la tsutpurü khürü likhang, hilanü nüpü tsieng,

¹³tunüo ihrünü hiba yangdi hi changjünung. Hiri nyitsarü nyüm adrünungkeh mülangjücho ABÜDONGBAnü yuchiko ko hiba Sodom changjünung abinü ihrü müthehcho.”

¹⁴Achotsü Lotnü atsulatpürü müxing liba adhrebarü yanglang tsü wünü yocho, “Hilanü zahta tsieng; ABÜDONGBAnü hiba yangdi hi changjünung.” Ta abi tsü tülarepü arühnü lümcho.

¹⁵Nyajang riwürü tsünü Lot zohchi yocho, “Zahding, yangdi changba la tsü nührü müzehnungthsa, nü nitpü ko nü tsularü anyüh tsü nüpü tsieng.”

¹⁶Lotnü tütohnyünyehcho. Ta ABÜDONGBAnü abi müichonü, nyitsarüti tsünü abi, anitpü, atsulatpü nyüh tsü arüh khehnü tphah nowü yangdi tsü khu nüchehchüpehcho.

¹⁷Hütsüpü riwü nyüh yola khüdunü yocho, “Nührü akang nengdang shang! Khanglang tüximüla ko angah la tsü tünyehli. Nührü müsünung nengdang azong lang tsü tsieng.”

¹⁸Ta Lotnü lalingcho, “Doh, adirü, yanglilüm ihrü hütsüta tüthsasoh.

¹⁹Nühnü Ih khütang müi I kang khümchoko. Ta azong tsü shurale; Achangnung dhsürünü Ih bhünüpnung ko hütsü müchie Ih sünung.

²⁰Nühnü yangdiza tsü münguo? Hütsü amünyeh due. Ih hütsüla wüsohng. Hütsü yang adükeh due, hütsüla Ih khümcho linung.”

²¹Abinü lalingcho, “Hütsüta thsaang. Ihnü yang hütsü müchangjünung.

²²Thsüthsang! Shang! Nührü hütsü müchih-ede Ihnü tu nguchinung mükoh.” Hütsünü hütsüba yangdi neng tsü Zoar pü dsicho.

²³Lot wü Zoar chihde nyü chürocho.

²⁴Dhrongyengnü ABÜDONGBAnü Sodom ko Gomora yangdi michah mihphohlung ko michang tsing roh-i rosohcho,

²⁵ko arüh, angah shünü ko hütsüla liba apüm ko hütsü lih la chürocho apüm changsohcho.

²⁶Ta Lot nitpünü ximüla dhengcho ko abükyü mih dongdi kangcho.

²⁷Nyangnyü khüu mütoh Abrahamnü dhsüthsa abi ABÜDONGBA yola yaba müdüm lang tsü wücho.

²⁸Abinü Sodom ko Gomora ko angah apüm tsü dhengcho ko alih lanü mikhu arangcheh chüroya ngucho.

²⁹Ta khode Tsingrangbanü Lot liba ngah yangditi changsohcho, abinü Abraham lümcheh Lot tsichehsohcho.

³⁰Lotnü Zoar la linung drüchonü abi ko atsulatpü nyüh azonglang tsü tuwü lungkhi khüdu la licho.

³¹Ko azitpü tsünü ani te yocho, “Uwa ashirü kangrü ko Ihjünü tsuzarü linungthsa Ihjü khyünung limih la adhrerü müle.

³²Hütsüeko rung, Ihjünü abi müchasohnung ko abi te mükhongpü abi khu azarü linung.”

³³Hütsü romang abi khyang yongkha tihcho ko abi te azitpünü mükhongcho. Ta abi müchachonü hütsü mümüdhe.

³⁴Nyümong khüu azitpünü ani te yocho, “Abi te shomang Ih yüpko; ko shomülangsü müchasohnung ko abi te nüh yüpm. Hütsükhang Ihjüding abi khu azarü linung.”

³⁵Hütsüta hütsü romangsü abi müchasohcho, ko azatpü abi te mükhongcho. Adesü abi müchachonü hütsü mümüdhecho.

³⁶Hütsüta Lot tsulatpü anyüding anyübünyü au khu fü müdengcho.

³⁷Azitpünü adhrerü khüdu nümüsucho ko abinü aneng Moab dsijücho. Chünye chii abi Moabrü au lile.

³⁸Azatpü nüsü adhrerü khüdu nümüsucho, ko abinü Benammi dsijücho. Abi tsü chünye yingcheh Amonrü jümürü lile.