Read Sangtam Naga LIPOH 20 Bible Online

LIPOH 20 - Sangtam Naga bible

LIPOH 20

¹Abraham Mamre lanü Negev lang shehmüi wünü Kadesh e Shur nyüh kahla licho. Akhanglang abi Gerar la liyade,

²abinü anitpü Sara tsü aniepü yocho. Hütsünü Gerar Yangthsaba Abimeleknü abi yanglang Sara norosohcho.

³Romang khüdu abi melang Tsingrangbanü abi te yocho: “Nühnü hiba khingkurü khyücho nengdangnü nüh sünung, tunüo abükyü tsü bürü nitpürü lile.”

⁴Ta Abimeleknü abükyü chah müthahpüecho ko abinü yocho, “ABÜDONGBA, Ih achomükeh! Nühnü achomükeh changsohnung do?

⁵Abraham apunü abükyü tsü aniepü yocho, ko abükyü nüsü hütsüta yocho. Ihnü hi lümlong amüsanü nguchicho ko Ihnü tu müthsameh.”

⁶Melang tsü Tsingrangbanü lalingcho, “Ho, nühnü hi lümlong amüsanü nguchicho Ihnü müdhele; hütsünü Ih nyüm amünyi müshitpanung abükyü chah müthapüsohcho.

⁷Ta ade, khingkutpü tsü thali anii khyang jüng. Abi azikehrüe, nüh müsünung abinü nü khyang dangkhidangjünung. Ta nühnü abükyü thali müjükhang, nüh ko nü müyurü apüm sünungepü Ihnü nüh müzahsohre.”

⁸Nyangnyü khüu mütoh Abimeleknü abi pohki thsazirüti atümung dsi atikehcho tsü yode, arüh drümüyangcho.

⁹Hütsüpü Abimeleknü Abraham dsi tsingdhengcho, “Nühnü ihrü te hi tu nguchicho? Hiba achangba dhsürü I chah ko I yanglih chah hironungthsa Ihnü nü te tu amüthsalang nguchicho? Nühnü nguchiba hiroh-ilü sünüsü I te münguchi.

¹⁰Tuepü hita nguchicho?”

¹¹Abrahamnü lalingcho, “Hila Tsingrangba drürü süsü mülinung ko I nitpü khyünung khyanglangnü Ih kyüsehkhang mütsa pü Ihnü lümcho.

¹²Khang abükyü tsüsü yuje I nie. Abükyü tsü Uwa tsulatpü, ta Itpa tsulatpü mah, ko Ihnü abükyü khyücho.

¹³Hütsünü khode Tsingrangbanü Iu kuh lanü Ih limih palang tsisohcho, Ihnü abükyü te yocho, Ihjü khüdederü wonang apüm la I te nüh yocho nyiba ngusohnung nengdang Ih tsü nü mungepü atümung te young.”

¹⁴Achotsü Abimeleknü Abraham khyang Sara thali jücho ko hütsü te san, misü ko ayurü jücho.

¹⁵Abinü Abraham te yocho, “Dheng, hila alih hi apüm I yo lile; nüh khüde linyürünang lieng.”

¹⁶Abinü Sara te yocho, “Hila nü te lirüti atümung bete nüh achomükeh pü yuzi thsanung, nü mung khyang Ihnü taripi hajar khüdu jüre; hi khu atümungnü nühnü tu müthsameh pü müdhenung.”

¹⁷Abraham nitpü Sara chah hütsüta tikehcho khu, ABÜDONGBAnü Abimelek kuhla khingkurü sünüsü tsuzarü müthsanung yatipehjücho.

¹⁸Achotsü Abrahamnü Abimelek nengdang dangkhidangnangjücho ko Tsingrangbanü abi kyangjücho. Abinü anitpü ko ayularütisü azarü linungthsa kyangjücho.