Read Sangtam Naga LIPOH 21 Bible Online

LIPOH 21 - Sangtam Naga bible

LIPOH 21

¹ABÜDONGBAnü nyengchocho roh-i abinü Sara xodhengcho

²ko abükyü fü müdeng kangcho ko Abraham khyang abi ashilang azarü khüdu nümüsujücho. Azarü tsü Tsingrangbanü bekhyah kihzahjüchola tsü surocho.

³Abrahamnü aneng Isak dsijücho,

⁴ko Isak nyümong keh pide Tsingrangbanü yuzeng jücho kyo Abrahamnü müjüp-pehjücho.

⁵Isak surode Abraham kang thsih khüdu azirü licho.

⁶Saranü yocho, “Tsingrangbanü I khyang akünyang ko münyünung hirojüko; ko hi yuchirü atümungnü I yola münyünung.”

⁷Hütsüpü abükyünü yocho, “Saranü nyikih yongsohnungepü Abraham te sünülü yopü linung? Ta Ihnü abi ashilang azarü khüdu nümüsujüko.”

⁸Ko azarü tsü zicho ko abi nyikih pehjü nyümong, Abrahamnü thsüti arangcheh jücho.

⁹Nyümong khüdu Ijiplarü Hagarnü Abraham khyang nümüsujüba Ishmael tsü Sara tsurü Isak te shaja yacho.

¹⁰Saranü hütsü ngu Abraham te yocho, “Hiba ayulatpü tsü atsurü nüpü tsisohng. Khingkurü hi tsurünü I tsurü Isak te thsiking müchangtanung.”

¹¹Hinü Abraham khütang lümtpahnasohcho, tunüo Ishmaelsü abi tsurü thsacho.

¹²Ta Tsingrangbanü Abraham te yocho, “Azaba ko ayulatpü Hagar nyüh nengdang tülümxü. Saranü yocho roh-i nguching, tunüo Ihnü nyengchoba tsü Isak khu trahchonung.

¹³Ayulatpü tsurü chahnüsü khütang trahchonung, hütsü khu arüh yucho khüdu kangnung. Abisü nü tsurü lile.”

¹⁴Nyangnyü khüu mütoh Abrahamnü Hagar khyang tsuyongnung aza ko kih jeng zehba shuküp shinga khüdu jücho. Hütsüpü abinü akhunga tsü püsohpü tsisohcho. Abükyünü tsicho ko Bersheba akungaselih la rümchi rachicho.

¹⁵Khode kih tsü yongkhangcho, abükyünü akhunga tsü singtrung khüdu pohki yüpsohpüpü khü ashu wünü pümcho.

¹⁶Abükyünü yocho, “Ihnü tu nahnü I tsurü sücho müdhengre.” Abükyü hütsüla pümcho ko tranung dikehcho.

¹⁷Ko Tsingrangbanü akhunga tracho tsü yuchi ninglang riwürünü Hagar te chota yocho, “Hagar! Tunü nüh chongchasohro? Tüdrü; tunüo Tsingrangbanü akhunga tracho yuchiko.

¹⁸Shemüsung ko khamüsu abi kihchoung. Abi chahnü trahchocho lanü Ihnü yucho arangcheh khüdu külüpnung.”

¹⁹Hütsütade, Tsingrangbanü anah khangthrujücho, ko abükyünü kihkong khüdu ngucho. Abükyünü wü kih tsü kha shuküp shinga tsü jeng liicho ko akhunga khyangsü tihcho.

²⁰Akhunga tsü zide abi te Tsingrangba zehcho; ko abi Paran akungaselih la li shu-iirü axangcheh kangcho.

²¹Atpanü abi khyang anitpü Ijiplarü khüdu khyüjücho.

²²Hütsütade Abimeleknü abi rothsarü yola anüchiba Fikol yola wü Abraham te yocho, “Nühnü nguchicho lüpcho la Tsingrangba nü te lile.

²³Hütsüeko ade hila Tsingrangba jingte nühnü Ih, I tsurü ko I trah mükihyochünungepü yuchüm. Ihnü nü te müi bichicho, hütsüeko I te ko nü liba limih te nühnüsü müi bichinungepü nyengchoung.”

²⁴Abrahamnü yocho, “Ihnü nyengchore.”

²⁵Ko Abimelek kulirütinü kihkong khüdu kengcho khyücho nengdang Abrahamnü longmüso yocho.

²⁶Abimeleknü yocho, “Sünü hütsü nguchichonang Ihnü mümüdhe. Nühnü hütsü I te müyo ko Ihnü hi ade du yuchire.”

²⁷Hütsüpü Abrahamnü Abimelek khyang san ko misü khürü jücho, ko anyüh kahla azengtaba külüpcho.

²⁸Abrahamnü abi san yolanü sanza dhünyeh pathsa throchehcho,

²⁹ko Abimeleknü tsingdhengcho, “Nüh hütsü tu thsanungbao?”

³⁰Abrahamnü lalingcho, “San dhünyeh hi khyüchoung. Nühnü hi khyüchochonü kihkong tsü Ihnü juchoepü nühnü nyengchore.”

³¹Hütsünü hiba müdüm te Bersheba pü dsicho, tunüo hütsüla anyünü yuchümtacho.

³²Anyünü anyengchotaba Bersheba la külüp-pü Abimelek e Fikol nyüh Filistia lang thalicho.

³³Hütsüpü Abrahamnü Bersheba la Tamarisk sing khüdu khyümpü ABÜDONGBA Achangka müliba Tsingrang mübücho.

³⁴Ko Abrahamnü Filistia la anyahli licho.