Read Sangtam Naga LIPOH 26 Bible Online

LIPOH 26 - Sangtam Naga bible

LIPOH 26

¹Hütsüba lih la Abraham chiichah tikehba tenü apa yangkong khüdu rocho. Isaknü Filistiarü Yangthsaba Gerar la Abimelek yanglang wücho.

²ABÜDONGBAnü Isak te chüro ngu yocho, “Ijip lang tüwü; Ihnü yoba lih hila du lieng.

³Hila lieng ko Ih nü te linung ko nüh müwajünung. Ihnü hiba lih hi apüm nüh ko nü trah khyang jünung. Ihnü nüu Abraham te nyengchotacho hi yohpünung.

⁴Ihnü ning chah chenghiti toi nü chahnü trahchosohnung ko arüh khyang alih hi jünung. Ko arüh khu limih yucho apüm müwajünung.

⁵Ihnü nüh müwajünung, tunüo Abrahamnü I yocho nyicho ko I yuzeng ko amülaba apüm bichicho.”

⁶Hütsünü Isak Gerar la licho.

⁷Khode hütsüla nyitsarütinü anitpü nengdang tsingdhengcho, abinü abükyü tsü aniepü yocho. Abinü anitpüepü müyocho, tunüo hütsüla nyitsarüti tsünü anitpü tsü khyünyüde abi müpsehnung ko Rebeka tsü khyünung, tunüo abükyü tsü atsah tsaracho.

⁸Khode Isak hütsüla rüm-o licho, Yangthsaba Abimeleknü nyübongkhi lanü chahchü dhengde Isak e Rebeka nyüh khyahrita ya ngucho.

⁹Abimeleknü Isak dsiro yocho, “Abükyü tsü nü nitpüe! Tuepü nüniepü yocho?” Isaknü lalingcho, “I nitpüepü yokhang Ih müpsehnung drücho.”

¹⁰Abimeleknü yocho, “Nühnü hi tu nguchicho? I nyitsarü masünü mülakhüti nü nitpü te mükhongpü ihrü münyi tsü nü bhamüling kangba thsako.”

¹¹Abimeleknü müyurü atümung te yocho, “Sünü hiba nyitsarü ko anitpü mütsa bichinang, abilü süsohnung.”

¹²Isaknü hütsüba lih la chisicho, ko hütsü kang tsü abinü shucho tenü thsihpi alaa xacho, tunüo ABÜDONGBAnü abi müwajücho.

¹³Mütozah abi pungrohirocho ko khütang alirü kangcho.

¹⁴Abi san, misü ko kulirü khütang lichonü Filistiarünü nahmohcho.

¹⁵Hütsünü au Abraham longde akulirütinü jucho kihkong apüm tsü Filistiarünü alihnü phetijücho.

¹⁶Achotsü Abimeleknü Isak te yocho, “Ihrü lih lanü tsieng, tunüo nüh ihrü tenü tase alaa kangko.”

¹⁷Achotsü Isaknü hütsülanü shehmüi tsicho, ko Gerar ngah la yangthri hütsüla licho.

¹⁸Abinü thali Abraham chichah jucho kihkong Filistiarünü Abraham süpü phetijübati tsü juchilicho ko aunü jücho neng du tsü dsicho.

¹⁹Isak kulirütinü angah la tsü kihkong khüdu jucho ko kih ngucho.

²⁰Gerar san nyahrütinü Isak san nyahrüti te yübüta yocho, “Hiba kih hi ihrü yoe.” Hütsünü hiba kihkong te Isaknü “Yübüta” kihkong pü dsicho.

²¹Isak kulirütinü kihkong apa khüdu jucho, ko hütsü nengdangsü yübütacho, hütsünü hiba te “Thsata Kihkong” pü dsicho.

²²Abinü hütsü lanü shehmüi wü kihkong apa khüdu jucho. Hi nengdanglü khiyu mülicho, hütsünü hitelü “Nyüje Kihkong” pü dsicho. Abinü yocho, “Adelü hiba lih la linung ABÜDONGBAnü Ihsa khyang nyüje jüko, ko adelü hila Ihsa pungrohiro linung.”

²³Isaknü hütsü pehjüpü Bersheba lang tuwücho.

²⁴Hütsü romang ABÜDONGBAnü abi te chüro ngu yocho, “Ih nüu Abraham Tsingrang. Tüdrü; Ih nü te lile. Ihnü nüh müwajünung ko I dikehrü Abraham khyanglangnü nü chahnü trahchochoti alaa suhsohnung.”

²⁵Hütsüla Isaknü bholu khüdu külüpcho ko ABÜDONGBA mübücho. Hütsüpü abinü hütsüla shükuh thsacho, ko akulirütinü kihkong apa khüdu jucho.

²⁶Abimeleknü abi te trotarü Ahuzzat ko rothsarü yola anüchiba Fikol nyüh nüpü Gerar lanü Isak shirünung rocho.

²⁷Achotsü Isaknü yocho, “I te arorühthsa Ih iipehpü tuepü Ih shirünung rocho?”

²⁸Arühnü lalingcho, “ABÜDONGBA nü te zehlepü adelü ihrünü müdheko ko Ihsa kahla azengtaba linungbaepü ihrünü lümre.

²⁹Ihrünü nü te tsa bichicho kyo nühnü ihrü mükhingchinungepü yuchümsohnyüre. Ihrünü nüh müi bichicho ko yangtsa la tsisohcho. Ko ade ABÜDONGBAnü nüh müwajüko.”

³⁰Arüh nengdang Isaknü thsüti rungnümjücho, ko arühnü tsuyongcho.

³¹Nyangnyü khüu mütoh arühnü khüdunü khüdu te yuchümtacho. Hütsüpü Isaknü arüh müyangyohjü arüh yangtsa la tsisohcho.

³²Hütsü nyümong Isak kulirütinü ro abi te arühnü jucho kihkong nengdang yocho. Arühnü yocho, “Ihrünü kih nguko.”

³³Abinü hütsü te “Yuchüm” pü dsicho. Hütsüta Bersheba yangdi aneng ngucho.

³⁴Esau kang yüre azirü thsade, abinü Hitlarü anyüh, Beeri tsularü Judit ko Elon tsularü Basemat khyücho.

³⁵Arühnü Isak e Rebeka nyüh akang dee bhamüling thsasohcho.