Read Sangtam Naga LIPOH 27 Bible Online

LIPOH 27 - Sangtam Naga bible

LIPOH 27

¹Adelü Isak ashirü kang anahnü müngu kangpehcho. Abinü atsurü aziba Esau dsiro abi te yocho, “Itso!” Esaunü lalingcho, “Ih hila lile!”

²Isaknü yocho, “Ih adelü shiko ko khode sünungnang mümüdhe.

³Nü singthsalu ko tbüdeng bieng ko rangmü lang wü I khyang shuh kyaseh hilung.

⁴Ko Ihnü tsunyüba tsuyongnung küdang hirung. Ihnü hütsü tsupü Ih müsüde achangka thsa nüh müwajünung.”

⁵Hütsüta Isaknü Esau te yo yade, Rebekanü nyi yacho. Achotsü khode Esau tsü shuh iinung wücho,

⁶abükyünü Jakob te yocho, “Ade tsatsa nüunü Esau te,

⁷‘wünü I khyang rangmü shuh kyüseh hilung tüpm. Ihnü hütsü tsupü, Ih müsüde ABÜDONGBA jingte nüh müwajünung,’ pü Ihnü yuchi yoko.”

⁸Hütsüeko, “Itso, ade Ihnü tu yoro hütsü nguching.

⁹San mülung yang wüng ko aza anyünyeh anyüh hirung ko Ihnü nüunü tsunyüba tsuyongnung rungnümjünung.

¹⁰Nühnü nüu khyang hütsü hiwü tüpm, ko abi müsüe-denü abi amüwa nü khyang jünung.”

¹¹Ta Jakobnü atpa te yocho, “Dheng, Imung Esau afü la anbüh chile, ta Ifü ananaepü nühnü müdhele.

¹²Kümüdeo Uwanü I chah thapünung ko Ihnü abi kihyochücho rangchehnung; hütsüta amüwa mahpü Ipu chah chokehchola uthring hironung.”

¹³Atpanü yocho, “Itso, chokehchola tsü I chah kürosohng; yah Ihnü tu yoro nguching; wüng ko miza tsü hirung.”

¹⁴Achotsü abinü wünü hiro abükyü khyang jücho, ko abükyünü aunü tsunyüba tsuyongnung rungnümjücho.

¹⁵Hütsüpü abükyünü kuhla yohpücho Esau jengki atsauba hiro Jakob khyang khyüsohcho.

¹⁶Ko apükyang ko ahong la miza küp tsü khümsohcho.

¹⁷Hütsüpü abinü tsunyüba tsuyongnung ko abükyünü külüpcho hümthse abi khyang jücho.

¹⁸Hütsüpü Jakobnü au yanglang wücho ko yocho, “Uwa!” Abinü lalingcho, “Ih hila lile. I tsu nyüh yola nüh khüibao?”

¹⁹Jakobnü lalingcho, “Ih nü tsudhre aziba Esau lile; nühnü yocho roh-i Ihnü nguchiko. Yanglilüm shemüsu püm ko Ihnü hilungcho shuh hi tsung ko I khyang nü amüwa jüng.”

²⁰Isaknü yocho, “Itso, hidoi züzah khüta ngucho?” Jakobnü lalingcho, “ABÜDONGBA nü Tsingrangnü ngusohchoe.”

²¹Isaknü Jakob te yocho, “Ihnü nüh yuje Esau a mahnang müdhenung nü chah thahpünung Ih amünyethsa rung.”

²²Achotsü Jakobnü au shündhün wücho ko aunü abi chah müzudhengpü yocho, “Nü sahkohlü Jakob yuva kyole, ta bipümlü Esau bipüm roh-i e.”

²³Abinü Jakob-epü mürangchehcho, tunüo Esau bipüm roh-i anbüh kehcho. Isaknü abi müwajünung thsacho

²⁴ta thali tsingdhengcho, “Nüh yuje Esau mah-o?” Abinü lalingcho, “Ho!”

²⁵Achotsü Isaknü yocho, “I khyang shuh tsü hirung. Ihnü hütsü tsupü nü khyang I amüwa jonung.” Jakobnü hütsü hirojücho, ko abinü ayongnungsü yongkha hirojücho.

²⁶Hütsüpü aunü abi te yocho, “Itso, I shündhün rung ko I chah müthsüpm.”

²⁷Achotsü abinü au chah müthsüpnung rode, Isaknü abi jengki xümcho, ko abinü abi müwajo yocho, “I tsudhre axümlichi hi ABÜDONGBAnü müwajüba alih axümlichi kyole.

²⁸Ninglangnü yingthsa jüsohng ko nü lih asu kangsohng! Abinü nü khyang tsang ko yongkha thangchi jüsohng!

²⁹Yuchotinü nüh dikehsohng ko müyurünü nü jingte mükhukehsohng. Nüh hung apüm michah nüh yangthsasohng, ko nü tpa chahnü trahchochotinü nü jingte mükhukehsohng. Sürünü nüh chokehcholaro, arüh chokehchola küdung ko nüh müwajürü amüwa lisohng.”

³⁰Isaknü Jakob müwajüpü Jakob tsiyeng amung Esau shuh iilangnü lungcho.

³¹Abinüsü tsuyongnung atsauba tsü rungnümpü au yanglang hiwücho. Abinü yocho, “Uwa, Yanglilüm suro pümpü Ihnü hilungcho shuh hi tsung ko I khyang nü amüwa jüng.”

³²Isaknü tsingdhengcho, “Nüh süo?” Abinü lalingcho, “Ih nü tsurü aziba Esau lile.”

³³Hütsükolü Isak tsü khütang dhridhrinü yocho, “Khang, I khyang kanglungrü kyüseh rungnüm hirojüba tsü süo? Ihnü hütsü nü bete du tsü tsuko. Ihnü achangkathsa I amüwa jüko, ko hütsü lede abi yo thsanung.”

³⁴Esaunü hi yuchide, abi khütang wahnü tra yocho, “I khyangsü nü amüwa tsü jüng, Uwa!”

³⁵Isaknü lalingcho, “Nüninü ro Ih kihyochüko. Abinü nü amüwa hitsiko.”

³⁶Esaunü yocho, “Hinü anyüpiu abinü Ih kihyochüre. Nyemüyangnung müle, anengnü Jakob-e. Abinü Ih aukhuba thsiking khyüko, ko chünye I amüwa khyüre. I khyang nü amüwa tu münyingjü ang?”

³⁷Isaknü lalingcho, “Ihnü nü michah abi abüdongrü kangpehsohko, ko ajünirü atümung abi dikehrü kangsohko. Ihnü abi khyang tsang ko yongkha jüko. Itso, adelü Ihnü nü khyang tu mükülüpchehjü.”

³⁸Esaunü mütozah au te kihchicho: “Uwa, nü amüwa khüdu du mah-o? Ih mii müwajüng.” Abinü tramüsucho.

³⁹Hütsüde Isaknü abi te yocho, “Nü nengdang ninglangnü yingthsa mülongnung. Nü nengdang alih su müle.

⁴⁰Nü nohshengnü akang linung. Ko nühnü nüni dikehnung. Ta nühnü abi nyüm shemüsude, abi kheh lanü nüh tsichehnung.”

⁴¹Esaunü Jakob thrünyicho, tunüo aunü abi amüwa Jakob khyang jücho. Abinü lümcho, “Uwa meshünung becho chii role, hütsüko du Ihnü Jakob kyüsehnung.”

⁴²Ta khode Rebekanü Esau lümchung tsü müdhecho, abükyünü Jakob dsiro yocho, “Nyieng, nü mung Esaunü nüh kyüsehnung arah külüple.

⁴³Itso, ade I yu nyieng. Haran lang Imung Laban yanglang wüng,

⁴⁴ko nü mung zichüroba tsü müshinümde ko nühnü abi te nguchicho tsü nbüchü müpehde, azachah abi yola lieng.

⁴⁵Ko Ihnü nüh nüli ronung khürü müthehnung. Tuepü nühjüding nyümong khüdunü changnung?”

⁴⁶Hütsüpü Rebekanü Isak te yocho, “Esau nitpürü yangpilarü hiri te lichonü Ih müthohle. Jakobnüsü hiri Hitlarü khürü khyükhang, Ih sopehcho atsau thsanung.”