Read Sangtam Naga LIPOH 29 Bible Online

LIPOH 29 - Sangtam Naga bible

LIPOH 29

¹Jakobnü mütozah abi lang la wücho ko Nyüchüro lih chii rocho.

²Thohdhünü rangmü la tsü kihkong khüdu san atii asangnü mükangtipü licho ro chihcho. San atii khyang tsü hiba kihkong lanü kih ti licho ko abekhüm chah lung amülah khüdu licho.

³Ko khode santi tsü hütsüla shibülungnang, san nyahrünü lung tsü dhipehpü arüh khyang kih tihcho. Hütsüpü thali lung tsünü dhitipücho.

⁴Jakobnü san nyahrü te tsingdhengcho, “Shangrüti, nührü khüdenüo?” Arühnü lalingcho, “Haran lanüe.”

⁵Abinü yocho, “Nührünü Nahor tsurü Laban mümüdheo?” Arühnü yocho, “Müdhele.”

⁶Abinü tsingcho, “Abi tsa mülio?” Arühnü yocho, “Abi tsa lile. Dheng hila atsulatpü Rachel abi san nüpü role.”

⁷Jakobnü yocho, “Ade münyüzeh-e ko santi münorokyange, tuepü arüh khyang kih tihpü rangmülang thali münowüro?”

⁸Arühnü lalingcho, “Santi apüm münorokhangde ko lung tsü dhipehpü, kih mütihde nüli tsinung mütsa.”

⁹Hütsüta Jakob arüh te chotachi yade, Rachel tsü santi nüpü rocho.

¹⁰Khode Jakobnü Rachel tsü aku Laban santi nüpü ro ngucho, abinü kihkong lang tsü wücho ko lung tsü dhipehpü kih tihcho.

¹¹Hütsüpü abinü abükyü chah müthsüpcho ko akünyangchonü tracho.

¹²Abinü abükyü te yocho, “Ih nüurü tsutpurü Rebeka tsurüe. Achotsü abükyünü au te yonung shang wücho.”

¹³Ko khode Laban-nü ani tsurü Jakob yusi yuchicho, abinü shang wü abi mütoh, khyahripü abi chah müthsüp-pü kuh lang norocho. Khode Jakobnü atikehcho lüpcho tsü Laban te yocho,

¹⁴Laban-nü yocho, “Ho, yuje, nüh Ipu shutsa ko I shüh lile.” Hütsüpü Jakob hütsüla choo yungtsa licho.

¹⁵Laban-nü Jakob te yocho, “Tsutpurü nye nühnü I nengdang amükangnü münguchinung. Angang khütoi khyünyüro?”

¹⁶Laban tsulatpü anyüh azitpü Lea ko azatpü Rachel licho.

¹⁷Lea chah anahtse amüruhnung kehcho, ta Rachel tsü münohripü atsah atsa thsacho.

¹⁸Jakobnü Rachel müicho, hütsünü abinü yocho, “Nühnü I khyang Rachel khyüsohkhang Ihnü kang dhünyeh nüh dikehnung.”

¹⁹Laban-nü yocho, “Ihnü abükyü aparü khyang jünung tenülü nü khyang uthring jünung; hila I te lieng.”

²⁰Hütsünü Jakobnü Rachel khyünung nengdang kang dhünyeh dikehcho, ta hütsü abi nengdang nyümongti akhikyah roh-i du licho, tunüo abinü Rachel dee müicho.

²¹Hütsüpü Jakobnü Laban te yocho, “Kang pisako; nü tsulatpü I khyang khyüsohng.”

²²Achotsü Laban-nü kukangba thsüti rungnümpü atümung dsiyohcho.

²³Ta hütsü romang, Laban-nü Rachel mahpü Jakob khyang Lea nowü jücho, ko Jakobnü abükyü te mükhongcho.

²⁴(Laban-nü atsulatpü Lea khyang akulilarü Zilpa abükyü dikehnung jücho.)

²⁵Nyangnyü khüu tsingsepü du Jakobnü hütsü Lea-epü rangchehcho. Achotsü abinü wü Laban te yocho, “Tuepü I te hita nguchicho? Ihnü Rachel nengdang nüh dikehcho. Tuepü Ih kihyochücho?”

²⁶Laban-nü yocho, “Hila ayahnü afü müngu ani xengnung mümülare.

²⁷Kuthriba nyükhih hi khusohng, ko nühnü adesü kang dhünyeh Ih dikeh-ekhang, Ihnü Rachelsü nü khyang jünung”

²⁸Jakobnü hütsü nyengchocho ko kuthriba thsüti khuko khanglang, Laban-nü Jakob khyang Rachel anitpü thsanung jücho.

²⁹(Laban-nü atsulatpü Rachel khyang abükyü dikehsohnung akulilarü Bilha jücho.)

³⁰Jakobnü Rachel tesü mükhongcho ko abinü Lea tenü Rachel alaa müicho. Hütsüpü abinü adesü Laban kang dhünyeh dikehcho.

³¹Khode Lea tsü Rachel tenü amümüibaepü ABÜDONGBAnü müdhecho, abükyü khyang azarü lisohcho, ta Rachel amüyüh kangsohcho.

³²Lea afü müdeng kangcho ko azarü khüdu nümüsucho. Abükyünü yocho, “ABÜDONGBAnü I chongcha nguko ko adelü I nii nü Ih müinung,” hütsünü abükyünü aneng Reuben dsijücho.

³³Adesü afü müdeng kangcho ko azarü khüdu nümüsucho. Abükyünü yocho, “Ih mümüirepü ABÜDONGBAnü müdhe I khyang azarü hisü jüko”; hütsünü abükyünü aneng Simeon dsijücho.

³⁴Adesü abükyü fü müdeng kangcho ko azarü khüdu nümüsucho. Abükyünü yocho, “Adelü I nii tsü I te alaa khüdu kang linung, tunüo Ihnü azarü asang nümüsujüko;” hütsünü abükyünü aneng Levi dsijücho.

³⁵Adesü abükyü fü müdeng kangcho ko azarü khüdu nümüsujücho. Abükyünü yocho, “Adelü Ihnü ABÜDONGBA neng senung”; hütsünü abükyünü aneng Juda dsijücho. Hütsükolü abükyü tsü sihkacho.